បាតុកម្មប្រឆាំងនឹងប្រធានាធិបតីសេណេហ្កាល់ ឈានដល់អំពើហិង្សានិងស្លាប់មនុស្ស
មួយសប្តាហ៍មកហើយដែលប្រជាពលរដ្ឋសេណេហ្កាល់ ពិសេសក្រុមយុវជន សម្តែងក្តីខឹងសម្បារចំពោះប្រធានាធិបតី លោក ម៉ាកគី សាល្ល។ ថ្ងៃចុងសប្តាហ៍ ស្ថានការណ៍នយោបាយ ធ្លាក់ដុនដាបខ្លាំង ពីព្រោះ តែនៅថ្ងៃសុក្រ ទី៩កុម្ភៈ បាតុករម្នាក់ស្លាប់ក្នុងការប៉ះទង្គិចគ្នាជាមួយក្រុមសមត្ថកិច្ច ហើយនិងមានអ្នករងរបួសច្រើន ក្នុងនោះក៏មានអ្នកសារព័ត៌មានដែរ។ កំហឹងរបស់ពលរដ្ឋសេណេហ្កាល់ ឆាប់ឆេះឡើង ក៏ពីព្រោះតែ ប្រធានាធិបតី ម៉ាកគី សាល្ល បានប្រកាសលុបចោលការបោះឆ្នោតប្រធានាធិបតី ដែលត្រូវរៀបចំនៅពីរសប្តាហ៍ខាងមុខ។
ចុះផ្សាយនៅថ្ងៃ៖
ស្តាប់ - ០៣:០៥
បាតុកម្មផ្ទុះឡើងជាច្រើនកន្លែង ពេញផ្ទៃប្រទេសសេណេហ្កាល់! មិនថា នៅខេត្ត ក្រុង ប៉ែកខាងជើង ខាងត្បូង និងកណ្តាលរដ្ឋធានី ដាការ នោះឡើយ។ សង្កាត់ជាច្រើន រួមរឹតដោយផ្សែងឆេះកង់ឡាន និងដុំថ្មហោះ ជាស្នាដៃបាតុករ។ រីឯ ផ្សែងឧស្ម័នបង្ហូរទឹកភ្នែក វិញ ជាស្នាដៃរបស់សមត្ថកិច្ច។ នៅទីប្រជុំជន ហ្វូងយុវជនបាតុករ បានស្រែកថា លោកប្រធានាធិបតី ម៉ាកគី សាល្ល បានកុហកពួកគេ និងថា ម៉ាកគី សាល្ល ជាជនផ្តាច់ការ។ «យើងមិនមែនរស់នៅក្នុងព្រះរាជាណាចក្ររបស់ ម៉ាកគី ទេ។ ទីនេះ ប្រទេសសេណេហ្កាល់ ជាសាធារណរដ្ឋ។ ម៉ាកគី មិនអាចធ្វើអ្វីស្រេចនឹងអំពើចិត្តបានឡើយ»។
ជាងមួយសប្តាហ៍មកហើយ ដែលកំហឹងរបស់ប្រជាពលរដ្ឋសេណេហ្កាល់ ឆាប់ឆេះឡើង។ កំហឹងផ្ទុះឆេះឡើង ក៏ពីព្រោះតែ ប្រធានាធិបតី ម៉ាកគី សាល្ល បានប្រកាសលើកពេលបោះឆ្នោតប្រធានាធិបតី គឺពន្យារពេលរហូតដល់ចុងឆ្នាំនេះ។ បើតាមគម្រោងច្បាប់ គេត្រូវរៀបចំបោះឆ្នោតនៅថ្ងៃទី២៥កុម្ភៈខាងមុខ។ បេក្ខជនឈរឈ្មោះបោះឆ្នោត ចំនួន ១៤ នាក់ បានដាក់ពាក្យប្តឹងទៅកាន់ ក្រុមប្រឹក្សារដ្ឋធម្មនុញ្ញ ដើម្បីស្នើសុំលុបចោលក្រឹត្យប្រធានាធិបតី ដែលពួកគេយល់ថា បំពានខុសច្បាប់កំពូលរបស់ជាតិ។ ប៉ុន្តែ សូម្បីតែ ក្រុមប្រឹក្សារដ្ឋធម្មនុញ្ញ ក៏ត្រូវរងសម្ពាធដែរ ដ្បិតថា សមាជិកពីររូប ត្រូវរងការចោទប្រកាន់ពីអំពើពុករលួយ។
ចំណែក ក្រុមអ្នកនយោបាយគណបក្សប្រឆាំង រងការធ្វើទុក្ខបុកម្នេញពីរដ្ឋអំណាច។ អ្នកនយោបាយប្រឆាំងខ្លះ រងជាប់ពាក្យបណ្តឹងតាមផ្លូវតុលាការ និងអ្នកខ្លះត្រូវជាប់ក្នុងពន្ធនាគារ។
ថ្ងៃកៀកចុងសប្តាហ៍ សភាពការណ៍ ស្រាប់តែធ្លាក់ដុនដាបខ្លាំង ព្រោះតែ ការប៉ះទង្គិចរវាងយុវជនបាតុករ និងកម្លាំងអាជ្ញាធររដ្ឋ បណ្តាលឲ្យស្លាប់យុវបាតុករម្នាក់ នៅទីក្រុង Saint-Louis។ ក្រសួងមហាផ្ទៃសេណេហ្កាល់ បានប្រកាសទទួលស្គាល់ពីមរណភាពរបស់ និស្សិតម្នាក់ អាយុ២២ឆ្នាំ និងរៀនថ្នាក់ឆ្នាំទី២ ផ្នែកភូមិវិទ្យា នៅសកលវិទ្យាល័យ Gaston Berger។ ក៏ប៉ុន្តែ អាជ្ញាធរពុំបានបញ្ជាក់លម្អិតពីមូលហេតុដែលបណ្តាលឲ្យបាតុករបាត់បង់ជីវិតឡើយ គ្រាន់តែឲ្យដឹងថា នគរបាលពុំបានធ្វើអន្តរាគមន៍នៅបរវេណមហាវិទ្យាល័យរបស់និស្សិតនេះឡើយ។
ដោយឡែក អ្នកកាសែតម្នាក់ ជំនាញខាងស៊ើបអង្កេត ត្រូវគេវាយតប់។ អ្នកកាសែតស្រីម្នាក់ទៀត ត្រូវនគរបាលកោះហៅទៅប៉ុស្តិប៉ូលីស ហើយក្រោយមក ស្រាប់តែធ្លាក់ខ្លួនឈឺត្រូវបញ្ចូនទៅសង្គ្រោះនៅមន្ទីរពេទ្យ។ ទូរទស្សន៍ Walf TV ត្រូវ រដ្ឋអំណាច ដកហូតអាជ្ញាប័ណ្ឌ ហើយទីស្នាក់ការសារព័ត៌មាននេះ ក៏ត្រូវចូលជាផ្ទាំងស៊ីបនៃឧស្ម័នបង្ហូរទឹកភ្នែករបស់អាជ្ញាធរថែមទៀត។ អង្គការអ្នកកាសែតគ្មានព្រំដែន បានឲ្យដឹងថា អ្នកសារព័ត៌មាន យ៉ាងហោច ៥នាក់ ត្រូវរងអំពើហិង្សា។
អ្នកវិភាគស្ថានការណ៍ ប្រមើលឃើញថា ប្រធានាធិបតីសេណេហ្កាល់ ម៉ាកគី សាល្ល បានកាន់អំណាច២អាណត្តិរួចមកហើយ ពុំអាចនឹងឈរឈ្មោះអាណត្តិថ្មីទេ។ លោកពន្យារពេលបោះឆ្នោត ទៅចុងឆ្នាំ ដើម្បីនឹងអាចដឹកនាំប្រទេសបានបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ