យោងតាម UN ទឹកជំនន់នៅលីប៊ីបានផ្តាច់ជីវិតមនុស្សយ៉ាងតិច ១១៣០០នាក់ក្នុងក្រុង Derna
នៅក្នុងប្រទេសលីប៊ី ចំនួនអ្នកស្លាប់ និងបាត់ខ្លួនដោយគ្រោះទឹកជំនន់ដែលបង្កឡើងដោយខ្យល់ព្យុះ Daniel និងការបាក់ទំនប់ទឹកកាលពីថ្ងៃអាទិត្យ ទី១០ កញ្ញាបានកើនឡើង។ គ្រាន់តែនៅក្នុងក្រុង Derna តែមួយ ចំនួនមនុស្សស្លាប់មានយ៉ាងតិច ១១៣០០នាក់ និងបាត់ខ្លួនចំនួន ១០១០០នាក់ផ្សេងទៀត នេះបើតាមតួលេខផ្តល់ដោយការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិដែលបានដកស្រង់ចេញពីអង្គការអឌ្ឍចន្ទក្រហមលីប៊ី។
ចុះផ្សាយនៅថ្ងៃ៖
ស្តាប់ - ០៣:៤០
ក្រៅពីទីក្រុង Derna ដែលមានមនុស្សស្លាប់ និងបាត់ខ្លួនច្រើនជាងគេ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិក៏បានប្រាប់ពីចំនួនអ្នកស្លាប់យ៉ាងតិច ១៧០នាក់នៅទីកន្លែងផ្សេងទៀតស្ថិតប៉ែកខាងកើតលីប៊ី។ តែស្ថាប័នរបស់អង្គការសហប្រជាជាតិដដែលនេះមិនភ្លេចបញ្ជាក់ថា ចំនួនអ្នកស្លាប់ និងអ្នកបាត់ខ្លួននឹងកើនឡើងថែមទៀត ខណៈដែលក្រុមអ្នកស្វែងរក និងក្រុមអ្នកជួយសង្រ្គោះកំពុងបន្តធ្វើការងារយ៉ាងសកម្ម។ មួយវិញទៀត ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិបានលើកឡើងពីស្ថានការណ៍មនុស្សធម៌អាក្រក់ខ្លាំងនៅក្នុងក្រុង Derna ពិសេសការខ្វះទឹកស្អាតប្រើប្រាស់។
មានកូនក្មេងយ៉ាងតិចចំនួន ៥៥នាក់ត្រូវបានពុលក្អួតចង្អោរក្រោយពីពួកគេបានបរិភោគទឹកមិនស្អាត។ នៅពីក្រោមគំនរថ្មបាក់បែកតាមសង្កាត់ក្នុងក្រុង Derna ដែលរងការបំផ្លាញដោយកម្លាំងរលកសមុទ្រ ក្រុមអ្នកជួយសង្រ្គោះបានទាញយកសាកសពរាប់សិបនាក់ និងបានកប់សាកសពទាំងនោះនៅទីកណ្តាលវាលជារៀងរាល់ថ្ងៃ។ តាមសាក្សីមួយចំនួន សាកសពភាគច្រើនត្រូវបានកប់នៅក្រោមភក់ ឬមួយហូរអណ្តែតចូលក្នុងសមុទ្រមេឌីទែរ៉ាណេ។ ក្រុមអ្នកជួយសង្រ្គោះមកពីប្រទេសម៉ាត់ត៍បានប្រាប់កាសែត Times of Malta ពីការរកឃើញសាកសពរាប់រយនាក់នៅក្នុងឆកសមុទ្រមួយដោយមិនបញ្ជាក់ទីកន្លែងពិតប្រាកដ។
ចំណែកក្រុមអ្នកជួយសង្រ្គោះលីប៊ីបានបញ្ជាក់ដាច់ដោយឡែកពីការឃើញសាកសពប្រមាណ ៦០០នាក់នៅឆ្នេរសមុទ្រក្នុងតំបន់ Om-al-Briket ដែលមានចម្ងាយប្រមាណជា ២០គីឡូម៉ែត្រនៅប៉ែកខាងកើតក្រុង Derna។ ក្រុមអ្នកជួយសង្គ្រោះលីប៊ី និងបរទេសផ្សេងទៀតបានប្រកាសពីការរកឃើញសាកសពជារៀងរាល់ និងថា ការស្វែងរកសាកសពបានជួបការលំបាកដោយសារតែតំបន់មួយចំនួនកំពុងបន្តគ្របដណ្តប់ដោយភក់រាប់សិបតោន។ ទន្ទឹមគ្នានេះ ការងារសង្រ្គោះរបស់ក្រុមជួយសង្រ្គោះក៏បានជួបឧបសគ្គ និងរារាំងដោយភាពវឹកវរនយោបាយផ្ទៃក្នុងដែរ។ តាំងពីការដួលរលំរបបផ្តាច់ការកាដាហ៊្វីក្នុងឆ្នាំ ២០១១ ប្រទេសអាហ្រ្វិកមួយនេះត្រូវបានពុះចែកជាពីរ។
នៅម្ខាង តំបន់ប៉ែកខាងលិចដឹកនាំដោយរដ្ឋាភិបាលដែលទទួលស្គាល់ដោយអង្គការសហប្រជាជាតិ និងនៅម្ខាងទៀត តំបន់ប៉ែកខាងកើតដឹកនាំដោយសេនាប្រមុខខាលីហ្វា ហាវតាដែលអង្គការសហប្រជាជាតិមិនទទួលស្គាល់។ តែប្រឈមមុខនឹងគ្រោះមហន្តរាយពេលនេះ សហគមន៍អន្តរជាតិបាននាំគ្នាបញ្ជូនជំនួយជាកម្លាំងមនុស្ស និងជំនួយជាចំណីអាហារ ថ្នាំពេទ្យគ្រប់ប្រភេទ។ យន្តហោះដឹកជំនួយបានបន្តចុះចតនៅអាកាសយានដ្ឋាន Benina ក្នុងក្រុង Benghazi ស្ថិតប៉ែកខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ