លីប៊ី៖ទឹកជំនន់នៅប៉ែកខាងកើតបណ្តាលឲ្យមានមនុស្សស្លាប់ជាង ២ ៣០០នាក់ និងបាត់ខ្លួនច្រើនពាន់នាក់
នៅក្នុងប្រទេសលីប៊ី រដ្ឋអំណាចនៅតំបន់ប៉ែកខាងកើតបានបញ្ជាក់ក្នុងថ្ងៃអង្គារ ទី១២ កញ្ញាថា មានមនុស្សស្លាប់ជាង ២ ៣០០នាក់ និងបាត់ខ្លួនជាច្រើនពាន់នាក់នៅក្នុងគ្រោះទឹកជំនន់ដែលបង្កឡើងដោយខ្យល់ព្យុះ Daniel។ អ្វីជាការកត់សម្គាល់ ខ្យល់ព្យុះ Daniel បានធ្វើឲ្យបាក់ធ្លាយទំនប់ទឹកចំនួនពីរនៅក្នុងទន្លេ Wadi Derna។ ការបាក់ធ្លាយទំនប់ទឹកទាំងពីរនេះបានជះផលវិបាកខ្លាំងលើក្រុង Derna ដែលមានប្រជាជនរស់នៅប្រមាណជា ១០ម៉ឺននាក់។
ចុះផ្សាយនៅថ្ងៃ៖
ស្តាប់ - ០២:៤៧
ខ្យល់ព្យុះ Daniel បានបោកបក់លើតំបន់ប៉ែកខាងកើតលីប៊ីនារសៀលថ្ងៃអាទិត្យ ទី១០ កញ្ញា ពិសេសលើទីក្រុងឆ្នេរសមុទ្រ Jabal al-Akhdar និងទីក្រុង Benghazi។ បន្ទាប់មក ឥទ្ធិពលនៃខ្យល់ព្យុះដដែលនេះបានទម្លាយទំនប់ទឹកចំនួនពីរនៅទន្លេ Wadi Derna ដោយបានធ្វើឲ្យទឹកហូរជោរជន់គ្របលើទីក្រុង Derna ដែលមានប្រជាជនរស់នៅចំនួន ១០ម៉ឺននាក់។ អង្គការឧតុនិយមពិភពលោកបានគូសបញ្ជាក់ថា មានសង្កាត់ជាច្រើនក្នុងក្រុង Derna ត្រូវបានលុបចេញពីផែនទី ហើយប្រជាជនរស់នៅក្នុងសង្កាត់ទាំងនោះត្រូវបានទឹកជំនន់លេបត្របាក់ទៅជាមួយ រួមទាំងស្ពាន និងអាគារ ផ្ទះសម្បែងជាច្រើនផងដែរ។
អង្គការឧតុនិយមពិភពលោកបានចាត់ទុកជាស្ថានការណ៍មហន្តរាយដែលមិនអាចគ្រប់គ្រងបាន។ ក្រុមសេវាសង្រ្គោះនៅតំបន់ប៉ែកខាងកើតបានប្រាប់ឲ្យដឹងក្នុងថ្ងៃអង្គារ ទី១២ កញ្ញាថា មានមនុស្សស្លាប់ជាង ២ ៣០០នាក់ របួសប្រមាណជា ៧ ០០០នាក់ និងបាត់ខ្លួនជាង ៥ ០០០នាក់នៅក្នុងទីក្រុង Derna។ តែបើតាមអ្នកនាំពាក្យក្រសួងមហាផ្ទៃនៅតំបន់ប៉ែកខាងកើត ចំនួនអ្នកស្លាប់ក្នុងក្រុង Derna មានរហូតជាង ៥ ២០០នាក់ឯណោះ។ យ៉ាងណាក៏ដោយ នេះគ្រាន់ជាតួលេខបណ្តោះអាសន្ន និងនៅមិនទាន់មានប្រភពណាមួយបញ្ជាក់លើតួលេខនេះនៅឡើយទេ។ អ្វីដែលគេអាចនិយាយបាន ចំនួនអ្នកស្លាប់ និងអ្នកបាត់ខ្លួនអាចមានច្រើនជាងនេះ។
លោក Tamer Ramadan អ្នកទទួលខុសត្រូវអង្គការកាកបាទក្រហម និងអឌ្ឍចន្ទក្រហមអន្តរជាតិបានបញ្ជាក់ក្នុងថ្ងៃអង្គារ ទី១២ កញ្ញាពីក្រុងហ្សឺណែវថា លោកមិនទាន់មានតួលេខពិតប្រាកដស្តីពីចំនួនអ្នកស្លាប់ អ្នករងរបួស និងអ្នកបាត់ខ្លួនទេ។ អ្នកទទួលខុសអង្គការកាកបាទក្រហម និងអឌ្ឍចន្ទក្រហមអន្តរជាតិដដែលរូបនេះបានប្រាប់ឲ្យដឹងថា
តម្រូវការជំនួយមនុស្សធម៌កំពុងមានច្រើនជាងសមត្ថភាពរបស់កាកបាទក្រហមលីប៊ី និងរដ្ឋាភិបាលលីប៊ីទៅទៀត។ ប្រឈមមុខនឹងតម្រូវការធំធេង និងបន្ទាន់នេះ រដ្ឋអំណាចលីប៊ីនៅប៉ែកខាងកើត និងអង្គការកាកបាទក្រហម និងអឌ្ឍចន្ទក្រហមអន្តរជាតិបានអំពាវនាវស្វែងរកជំនួយអន្តរជាតិ។
ប្រទេសតួកគី និងអេមីរ៉ាតអារ៉ាប់រួមបានបញ្ជូនក្រុមអ្នកសង្រ្គោះ។ អាល់ហ្សេរីបានប្រកាសផ្តល់ជំនួយមនុស្សធម៌ជាចំណីអាហារ ថ្នាំពេទ្យ ជំរំសំពត់ និងសម្លៀកបំបាក់ចំនួន ៨យន្តហោះយោធា។ អេហ្ស៊ីប និងអ៊ីតាលីបានប្រកាសពីការបញ្ជូនជំនួយ ហើយសហរដ្ឋអាមេរិក និងសហភាពអឺរ៉ុបបានប្រកាសពីការតាមដានស្ថានការណ៍ និងត្រៀមខ្លួនដើម្បីផ្តល់ជំនួយដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ