ទណ្ឌកម្មអន្តរជាតិធ្វើឲ្យរបបសឹកនីហ្សេប្រកាសកាត់បន្ថយថវិកាជាតិពាក់កណ្តាល
ជាង ២ខែក្រោយរដ្ឋប្រហារយោធាទម្លាក់ប្រធានាធិបតី រដ្ឋាភិបាលសឹកនីហ្សេ នៅថ្ងៃសុក្រទី ៦តុលា ប្រកាសកាត់បន្ថយថវិកាជាតិសម្រាប់ឆ្នាំ ២០២៣ ចំនួន៤០%។ តាមការពន្យាល់របស់របបសឹកនីហ្សេ គឺទណ្ឌកម្មអន្តរជាតិដែលជាដើមហេតុធ្វើឲ្យថវិកាជាតិនីហ្សេត្រូវកាត់បន្ថយជិតពាក់កណ្តាល។ បដិសេធមិនទទួលស្គាល់របបសឹកនីហ្សេ សហរដ្ឋអាមេរិក និងសហភាពអឺរ៉ុបដែលជាប្រភពផ្តល់ជំនួយធំជាងគេរបស់នីហ្សេ ប្រកាសដាក់ទណ្ឌកម្មសេដ្ឋកិច្ច និងទាមទារឲ្យក្រុមយោធាដោះលែង និងស្តារអំណាចប្រធានាធិបតីនីហ្សេ លោកបាហ្សូមឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៧
ផលវិបាកនៃទណ្ឌកម្មអន្តរជាតិ ទៅលើរបបសឹកនីហ្សេបានលេចចេញជារូបរាងបណ្តើរៗ។ នៅក្នុងសេចក្តីប្រកាស នៅចុងសប្តាហ៍នេះ របបសឹកនីហ្សេប្រកាសកាត់បន្ថយថវិកាជាតិឆ្នាំ ២០២៣ ចំនួនជិតពាក់កណ្តាល នៅក្នុងហេតុផលការដាក់ទណ្ឌកម្មសេដ្ឋកិច្ចធ្ងន់ធ្ងរពីសំណាក់ប្រទេសលោកខាងលិច និងប្រទេសអាហ្វ្រិក ក្នុងតំបន់។
នីហ្សេធ្លាប់បានគ្រោងកញ្ចប់ថវិកាជាតិសម្រាប់ឆ្នាំ ២០២៣ ជាង៥ពាន់លានដុល្លារ (៥,៥៣ពាន់លាន) ដែលនៅក្នុងនោះ ជាង ២ពាន់លានដុល្លារជាជំនួយអន្តរជាតិ។ អាចនិយាយបានថា ថវិកាជាតិនីហ្សេ ត្រូវសើរើ កាត់បន្ថយមកនៅប្រមាណ៣ពាន់លានដុល្លារ ក៏ដោយសារតែការកាត់ផ្តាច់ជំនួយពីសហគមន៍អន្តរជាតិ នៅក្នុងរឿងធ្វើរដ្ឋប្រហារផ្តួលអំណាចប្រធានាធិបតីនៅនីហ្សេ។
នៅមុនកើតមានរដ្ឋប្រហារយោធា ដឹកនាំមេក្រុមអង្គរក្សការពារប្រធានាធិបតី កាលពីថ្ងៃទី ២៦កក្កដា នីហ្សេដែលជាប្រទេសក្រីក្រមួយនៅក្នុងពិភពលោកត្រូវពឹងអាស្រ័យមួយភាគធំទៅលើប្រាក់ជំនួយអន្តរជាតិ។
សហភាពអឺរ៉ុបធ្លាប់ផ្តល់ជំនួយហិរញ្ញវត្ថុ ៥៤០លានអឺរ៉ូដល់រដ្ឋាភិបាលនីហ្សេ ពីឆ្នាំ ២០២១ ដល់ឆ្នាំ ២០២៤ ដើម្បីកែលម្អប្រព័ន្ធអភិបាលកិច្ច វិស័យអប់រំនៅនីហ្សេ។ បារាំងដែលធ្លាប់ជាម្ចាស់អាណានិគមលើនីហ្សេ បានផ្តល់កញ្ចប់ជំនួយ ប្រមាណ ១៣០លានអឺរ៉ូ នៅឆ្នាំ ២០២២ ដល់រដ្ឋាភិបាលនីហ្សេ។
ចំណែកអាមេរិកដែលជាដៃគូសំខាន់មួយដែររបស់នីហ្សេ ធ្លាប់ផ្តល់ជំនួយមនុស្សធម៌ និងសន្តិសុខតម្លៃ ១០០លានដុល្លារ សម្រាប់រដ្ឋាភិបាលនីហ្សេ។ ពីឆ្នាំ ២០២២ ដល់ឆ្នាំ ២០២៣ នីហ្សេបានទទួលកញ្ចប់ជំនួយ៦០០លានដុល្លារពីធនាគារពិភពលោក។
ដោយសាររដ្ឋប្រហារយោធាទម្លាក់ប្រធានាធិបតីនីហ្សេ លោកបាហ្សូម នីហ្សេត្រូវរបូតបាត់កញ្ចប់ជំនួយបរទេស។ សហភាពអឺរ៉ុប បារាំង និងអាមេរិក បានកាត់ផ្តាច់រាល់ជំនួយរបស់ខ្លួន ចំណែកក្រុមប្រទេសអាហ្វ្រិកខាងលិច ដែលថ្កោលទោសការប្លន់អំណាចតាមរយៈការធ្វើរដ្ឋប្រហារ បានប្រកាសដាក់ទណ្ឌកម្មសេដ្ឋកិច្ច បិទផ្លូវមិនឲ្យមានការដោះដូរពាណិជ្ជកម្មជាមួយនីហ្សេ។ លើសពីនោះ ដោយសារទណ្ឌកម្មរបស់ក្រុមប្រទេសអាហ្វ្រិកខាងលិច នីហ្សេរីយ៉ាបានសម្រេចលែងផ្គត់ផ្គង់ភ្លើងអគ្គិសនីទៅឲ្យប្រជាជននីហ្សេ។
ប្រទេសលោកខាងលិច និងប្រទេសតំបន់អាហ្វ្រិកខាងលិចបានទាមទារឲ្យរបបសឹកដោះលែង ប្រធានាធិបតី បាហ្សូម និងស្តារអំណាចរដ្ឋាភិបាលស៊ីវិល ជាថ្នូរនឹងការផ្តល់កញ្ចប់ជំនួយបរទេសឡើងវិញ។ ប៉ុន្តែ មេដឹកនាំរបបសឹកនីហ្សេអះអាងថា គេត្រូវការពេលវេលាយ៉ាងតិច ៣ឆ្នាំ ដើម្បីស្តាររបបប្រជាធិបតេយ្យ។
នាយករដ្ឋមន្រ្តីនីហ្សេ ដែលមេដឹកនាំរបបសឹកលើកបន្តុប ថ្មីៗនេះអះអាងថា ជាមួយការរឹតត្បិតថវិកាជាតិ រដ្ឋាភិបាលនឹងផ្តល់អាទិភាពសំខាន់ទៅលើការចំណាយសម្រាប់កងទ័ព និងការបើកប្រាក់ខែសម្រាប់បុគ្គលិករដ្ឋកា។ ជាប្រទេសសំបូរអ៊ុយរ៉ានីញ៉ូមធំទី៧ នៅក្នុងពិភពលោក របបសឹកនីហ្សេរំពឹងផ្តោតក្តីសង្ឃឹមលើការលក់នាំចេញវត្ថុធាតុរ៉ែ ដូចជា អ៊ុយរ៉ានីញ៉ូម មាស និងប្រេងដើម្បីយកមកប៉ះប៉ូវថវិកាជាតិ តាមរយៈការស្វែងរកជំនួយពីម៉ាលី ប៊ួគីណាហ្វាសូ ជាទីដែលពួកយោធា ធ្វើរដ្ឋប្រហារប្លន់អំណាចពីរដ្ឋាភិបាលស៊ីវិល មុននីហ្សេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ