UN៖ ទឹកជន់នៅលីប៊ី បើមានវិធានការជម្លៀសទាន់ពេល គឺមិនធ្ងន់ធ្ងរស្លាប់មនុស្សជាង ៤ ពាន់នាក់ទេ
ទុក្ខជាន់លើទុក្ខ ប្រទេស លីប៊ី ដែលជួបវិបត្តិនយោបាយនិងជម្លោះប្រដាប់អាវុធច្រើនឆ្នាំ នៅពេលនេះ ត្រូវរងគ្រោះថ្នាក់ខ្យល់ព្យុះ ទឹកជន់ ធ្ងន់ធ្ងរថែមទៀត។ ខ្យល់ព្យុះស៊ូណាមិ បានបោកបក់ ប៉ះប៉ែកខាងកើតប្រទេស តាំងពីថ្ងៃអាទិត្យ។ វាបណ្តាលឲ្យស្លាប់មនុស្ស យ៉ាងហោច ៤ ០០០ នាក់។
ចុះផ្សាយនៅថ្ងៃ៖
ស្តាប់ - ០១:៥០
នៅមាន ប្រជាជន រាប់ពាន់នាក់ផ្សេងទៀត កំពុងបាត់ខ្លួន។ អ្នកខ្លះ ត្រូវកម្លាំងទឹកហូរកួចយកទៅជាមួយ និងធ្លាក់ចូលក្នុងសមុទ្រម៉េឌីតែរ៉ាណេ។ ភ្លាមៗនេះ ពលរដ្ឋរងគ្រោះ សល់ពីស្លាប់ ប្រហែលជាង ៣ ម៉ឺននាក់ គ្មានកន្លែងស្នាក់នៅ។ ដ្បិតថា ផ្ទះសំប្បែងខូចខាត។
ខ្មោចឡាន រាយបាយ រប៉ាត់រប៉ាយ។ បីថ្ងៃក្រោយហេតុការណ៍ ប្រព័ន្ធទឹក ភ្លើង និង បណ្តាញទាក់ទងផ្សេងៗ នៅមិនទាន់តភ្ជាប់ឡើងវិញនៅឡើយទេ។
ពីទីក្រុងហ្សឺណែវ នាថ្ងៃព្រហស្បតិ៍ លោក Petteri Taalas នាយកអង្គការឧតុនិយមពិភពលោក បានប្រាប់អ្នកកាសែតថា ប្រសិនបើ គេរៀបចំចាត់វិធានការសង្គ្រោះបន្ទាន់ និងជូនដំណឹងទុកជាមុន ហើយនិង ជម្លៀសប្រជាជន ឲ្យបានទាន់ពេល ម្ល៉េះសម គ្រោះថ្នាក់ មិនធ្លាក់ធ្ងន់ធ្ងរដល់ម្លឹងទេ។
គ្រោះថ្នាក់នេះ នឹងធ្វើឲ្យសេដ្ឋកិច្ចជាតិលីប៊ីកាន់តែដុនដាប់ខ្លាំងថែមទៀត។ ប្រទេសផ្សេងៗ ដូចអាមេរិក សហភាពអឺរ៉ុប និងអង្គការសហប្រជាតិ បានសន្យាផ្តល់ជំនួយមនុស្សធម៌ដល់លីប៊ីនៅក្នុងគ្រាលំបាកនេះ។
គ្រោះថ្នាក់ធម្មជាតិនៅលីប៊ី ពេលនេះ គឺជាចំហាយខ្យល់ព្យុះឈ្មោះ ដានីញ៉ែល ដែលបានបោកបក់លើប្រទេស តួកគី ប៊ុលហ្គារី និងក្រិក។ ឧត្តមស្នងការអង្គការសហប្រជាជាតិ Volker Turk បានដាស់តឿនជាថ្មីអំពីផលវិបាកអវិជ្ជមាននៃការកើនឡើងកម្តៅផែនដី ដែលបង្កឲ្យមានគ្រោះថ្នាក់ធម្មជាតិ ស្លាប់មនុស្ស។ ហើយរឿងបញ្ហាបរិស្ថានអាកាសធាតុនេះ ដែល ប្រទេសរដ្ឋសមាជិកនីមួយៗត្រូវយកចិត្តទុកដាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ