ក្រោយពីមេប្រឆាំងស្លាប់ ឧត្តមសេនីយ អ៊ីតណូ ប្រកាសឈរឈ្មោះជាបេក្ខជនប្រធានាធិបតី
នៅប្រទេសឆាដ ឧត្តមសេនីយយោធា អ៊ីតណូ ជាកូនប្រុសអតីតប្រធានាធិបតីឆាត អ៊ីដ្រីស្ស ដេប៊ី បានប្រកាសឈរឈ្មោះបោះឆ្នោតរើសប្រធានាធិបតី។ ការប្រកាសនេះ ធ្វើឡើងនៅថ្ងៃសៅរ៍ ទី២ មីនា គឺក្រោយពី មេប្រមុខប្រឆាំងដ៏លេចធ្លោ ត្រូវពួកយោធាធ្វើឃាត បានចំនួន ៣ ថ្ងៃ។
ចុះផ្សាយនៅថ្ងៃ៖
ស្តាប់ - ០២:៤៦
ឆាដ ជាប្រទេសក្រីក្រខ្លាំងមួយ នៅតំបន់ក្នុងអាហ្វ្រិកកណ្តាល។ មេដឹកនាំប្រទេសសម័យអន្តរកាល ឧត្តមសេនីយយោធា មហាម៉ាត់ អ៊ីដ្រីស្ស ដេប៊ី អ៊ីតណូ បានសម្រេចប្រកាសជាសាធារណៈ ពីការឈរឈ្មោះបោះឆ្នោតប្រធានាធិបតី ឆ្នាំ២០២៤។ វ័យ ៣៧ ឆ្នាំ លោកអះអាងថា គណបក្សដើម្បីប្រទេសឆាតរួមគ្នាតែ១ បានស្នើសុំដាក់បេក្ខភាពរបស់លោក ជាតំណាងតែ១គត់របស់បក្សសម្រាប់ការបោះឆ្នោតជុំទី១ ដែលនឹងត្រូវរៀបចំប្រព្រឹត្តិទៅ នៅថ្ងៃទី៦ ឧសភា ខាងមុខ។
ការប្រកាសបេក្ខភាពនេះ ត្រូវទម្លាយចេញ បន្ទាប់ពីមេប្រមុខប្រឆាំងដ៏លេចធ្លោ ត្រូវពួកយោធាបាញ់សម្លាប់ជាមួយសមាជិកផ្សេងទៀត នៅទីស្នាក់ការគណបក្ស កាលពី ៣ ថ្ងៃមុន។ មរណភាពរបស់ប្រធានបក្សសង្គមនិយមគ្មានព្រំដែន លោក យ៉ាយ៉ា ឌីលឡូ ដ្យេរ៉ូ កំពុងតែត្រូវឋិតក្នុងភាពមិនច្បាស់លាស់។ រដ្ឋាភិបាលបណ្តោះអាសន្នឆាដ បានច្រានចោលរាល់ការប្រកាន់ថា បានកម្ចាត់កម្ទេចសំឡេងប្រឆាំងនៅក្នុងស្រុក ហើយនិង បានចាត់តាំងរដ្ឋអាជ្ញាស៊ើបករណីឃាតកម្មដ៏ហិង្សានេះផង។ អង្គការការពារសិទ្ធិមនុស្ស Human Rights Watch ប្រចាំតំបន់អាហ្វ្រិក ទាមទារឲ្យបើកការស៊ើបអង្កេតជាលក្ខណៈអន្តរជាតិ ឲ្យបានត្រឹមត្រូវ ជុំវិញឃាតកម្មលើអ្នកនយោបាយប្រឆាំងរូបនេះ។
កាលពីនៅមានជីវិត អ្នកនយោបាយប្រឆាំង លោក យ៉ាយ៉ា ឌីលឡូ ដ្យេរ៉ូ ជាបន្លាក្នុងកែវភ្នែក របស់ ឧត្តមសេនីយយោធា មហាម៉ាត់ អ៊ីដ្រីស្ស ដេប៊ី អ៊ីតណូ។ តែតាមពិត អ្នកទាំងពីរ គឺជាបងប្អូនជីដូនមួយនឹងគ្នា។ មេបក្សប្រឆាំង លោក ឌីលឡូ ជាក្មួយបង្កើតរបស់អតីតប្រធានាធិបតី អ៊ីដ្រីស្ស ដេប៊ី ហើយ អ៊ីដ្រីស្ស ដេប៊ី ជាឪពុករបស់ឧត្តមសេនីយយោធា អ៊ីតណូ។
គួរជ្រាបថា អតីតប្រធានាធិបតី អ៊ីដ្រីស្ស ដេប៊ី បានកាន់ក្រាប់អំណាចស្រុកទេស ជាង ៣០ ឆ្នាំ បន្ទាប់ពីបានធ្វើរដ្ឋប្រហារ នៅទសវត្សរ៍១៩៩០។ លោកស្លាប់កាលពី៣ឆ្នាំមុន ព្រោះរងរបួសក្នុងការប្រយុទ្ធជាមួយក្រុមឧទ្ទាម ហើយឧត្តមសេនីយយោធា ១៥ រូប បានជ្រើសលោក អ៊ីតណូ កាលណោះ វ័យទើបតែ ៣៤ ឆ្នាំ ឲ្យកាន់អំណាចប្រទេសជំនួសឪពុក។
នៅពេលឡើងកាន់អំណាចប្រទេសជាបណ្តោះអាសន្ន ឧត្តមសេនីយ អ៊ីតណូ សន្យាថានឹងកែប្រែប្រទេស ឲ្យអំណាចស៊ីវិលដឹកនាំរដ្ឋ ក្នុងអំលុងពេល១៨ខែ ប៉ុន្តែ នេះជាសន្យាខ្យល់ ព្រោះថា ជាង២ឆ្នាំទៅហើយ ពួកយោធានៅតែក្តាប់អំណាចរដ្ឋយ៉ាងតឹង។ មិនត្រឹមតែប៉ុណ្ណោះ នៅថ្ងៃប្រកាសបេក្ខភាពឈរឈ្មោះធ្វើប្រធានាធិបតី លោកឧត្តមសេនីយ អ៊ីតណូ អះអាងថា នឹងរឹតបន្តឹងកម្លាំងយោធាថែមទៀត ដើម្បីរក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ