យូនីសេហ្វ៖កុមារជាង៣៣៣លាននាក់រស់ក្នុងភាពមហាក្រីក្រ
ដោយហេតុមានជំងឺរាតត្បាតកូវីដ១៩ យុទ្ធនាការប្រយុទ្ធប្រឆាំងនឹងភាពក្រីក្រកុមារ បានបន្ថយល្បឿនខ្លាំងណាស់។ អង្គការសហប្រជាជាតិមិនអាចសម្រេចកម្មវត្ថុប្រកបដោយមហិច្ឆតារបស់ខ្លួនបានទេ ព្រោះបើតាមរបាយការណ៍របស់អង្គការយូនីសេហ្វ និងធនាគារពិភពលោក ចំនួនកុមាររស់ក្នុងស្ថានភាពក្រីក្រខ្លាំងបំផុតនៅលើពិភពលោកបានឡើងដល់៣៣៣លាននាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
អង្គការសហប្រជាជាតិបានកំណត់កម្មវត្ថុប្រកបដោយមហិច្ឆតា លុបបំបាត់ភាពក្រីក្រហួសហេតុរបស់កុមារឱ្យបានទាំងស្រុងនៅឆ្នាំ២០៣០ ប៉ុន្តែបើតាមរបាយការណ៍របស់អង្គការយូនីសេហ្វ និងធនាគារពិភពលោកដែលនឹងចេញផ្សាយនៅថ្ងៃព្រហស្បតិ៍ទី១៤កញ្ញា២០២៣ មានកុមារជាង៣៣៣លាននាក់កំពុងរស់ក្នុងស្ថានភាពមហាក្រីក្របំផុត ពោលគឺមួយភាគ១០នៃកុមារនៅលើពិភពលោក(ម្នាក់ក្នុងចំណោម១០នាក់) រស់ដោយមានលុយមិនដល់២,១៥ដុល្លារផងក្នុងមួយថ្ងៃ។ របាយការណ៍ដដែលបានគូសបញ្ជាក់ទៀតថា បើគ្មាន រោគរាតត្បាតកូវីដផ្ទុះមករំខានទេ នោះកុមារប្រមាណ៣០លាននាក់ទំនងជាត្រូវអាចដើរចេញផុតពីភាពក្រីក្រ។
“វិបត្តិកាន់តែធ្ងន់ធ្ងរ បង្កឡើងដោយផលវិបាកនៃជំងឺកូវីដ១៩ ជម្លោះប្រដាប់អាវុធ ការប្រែប្រួលអាកាសធាតុ និងវិបត្តិសេដ្ឋកិច្ច បានមកបិទខ្ទប់វឌ្ឍនភាពនិងបានធ្វើឱ្យក្មេងរាប់លាននាក់ត្រូវរស់ក្នុងភាពក្រីក្រហួសហេតុ” នេះបើតាមសេចក្តីប្រកាសរបស់លោកស្រីអគ្គនាយិកាអង្កាករយូនីសេហ្វ Catherine Russel នៅក្នុងសេចក្តីថ្លែងការណ៍។ លោកស្រីអគ្គនាយិកាបានបន្ថែមទៀតថា ការដែលមានកុមារជាង៣៣៣លាននាក់ត្រូវរស់ក្នុងភាពមហាក្រីក្រហើយ មិនអាចទទួលបាននូវសេចក្តីត្រូវការជាមូលដ្ឋាន មិនអាចរស់ក្នុងភាពថ្លៃថ្នូរ គ្មានឱកាសនិងគ្មានក្តីសង្ឃឹមទៀត ជាពិភពលោកដែលមិនអាចអនុគ្រោះឱ្យទេ។
នៅក្នុងចំណោមកុមាររស់ក្នុងភាពក្រីក្រខ្លាំងបំផុត ៤០%ជាក្មេងនៅអាហ្វ្រិកសាហារ៉ា។ ផ្ទុយពីតំបន់ផ្សេងៗនៅលើពិភពលោកដែលភាពក្រីក្រកុមារបានចុះថយជាលំដាប់ នៅតំបន់អាហ្វ្រិកសាហារ៉ា ចំនួនកុមារក្រីក្រកើនឡើងជាលំដាប់ ស្របទៅតាមកំណើនដ៏លឿននៃអត្រាប្រជាពលរដ្ឋ និងដោយហេតុវិបត្តិកូវីដ១៩ ព្រមទាំងមហន្តរាយធម្មជាតិបង្កឡើងដោយការប្រែប្រួលអាកាសធាតុ។
ធនាគារពិភពលោកនិងអង្គការយូនីសេហ្វ បានអំពាវនាវឱ្យគ្រប់ប្រទេសគិតគូរប្រយុទ្ធប្រឆាំងនឹងភាពក្រីក្រជាអាទិភាព និងសម្របវិធានការទៅតាមការស្ថានការណ៍ជាក់ស្តែង ដូចជាពង្រីកកម្មវិធីផ្តល់ជំនួយឧបត្ថម្ភដល់គ្រួសារក្រីក្រជាដើម។ បិទបញ្ចប់ភាពក្រីក្រកុមារជាជម្រើសនយោបាយ។ នេះបើតាមប្រសាសន៍របស់លោកនាយកធនាគារពិភពលោកទទួលបន្ទុកភាពក្រីក្រនិងសមធម៌ Felipe Lopez-Calva៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ