ប្រធានាធិបតីអាហ្សង់ទីន៖ ទោះក្នុងតម្លៃណាក៏ដោយ ក៏ត្រូវតែកែទម្រង់ស៊ីជម្រៅ
ប្រធានាធិបតីអាហ្សង់ទីន លោក រ៉ាវីយេ មីឡី ប្រកាសបន្តកែទម្រង់ប្រទេសជាតិ បើទោះបីជា មានឬគ្មាន ការគាំទ្រពីសមាជិកសភា ក៏ដោយ។ គម្រោងកែទម្រង់ស៊ីជម្រៅក្នុងផ្នែកនយោបាយនិងសេដ្ឋកិច្ច របស់ ប្រធានាធិបតីអាហ្សង់ទីន បានសើរើកែប្រែរបត់សង្គមជាខ្លាំង និងបង្កឲ្យប៉ះពាល់ជាទូទៅដល់ស្រទាប់អ្នកនយោបាយនិងរាស្ត្រសាមញ្ញ។ ទោះយ៉ាងនេះក្តី ថ្នាក់ដឹកនាំអាហ្សង់ទីន នៅតែមានះថា មានតែទៅមុខ និងមិនថយក្រោយជាដាច់ខាត។ នេះជាខ្លឹមសារនៅក្នុងការថ្លែងសុន្ទកថាទៅកាន់ប្រជាជាតិ របស់ប្រមុខរដ្ឋអាហ្សង់ទីន នាឱកាសបើកអង្គប្រជុំសភា ថ្ងៃសុក្រ ទី១ មីនា នៅរដ្ឋធានី Buenos Aires។
ចុះផ្សាយនៅថ្ងៃ៖
ស្តាប់ - ០៣:០៥
ចំពោះមុខអ្នកតំណាងរាស្ត្រនិងសមាជិកព្រឹទ្ធសភា ប្រធានាធិបតីអាហ្សង់ទីន អួតថា នេះជាលើកទី១ ដែលការកែទម្រង់ ចាក់ចំចំណុចស្នូលនៃបញ្ហា ហើយនិងអះអាងថា ការផ្លាស់ប្តូរក្នុងប្រទេសលើកនេះ ដើម្បីទៅរកវឌ្ឈនភាព។ អាស្រ័យហេតុនេះ ទោះបីគ្មានការគាំទ្រពីអ្នកនយោបាយបក្សដទៃ គ្មានការគាំទ្រពីសំណាក់អ្នកតំណាងរាស្ត្រ ឬសមាជិកព្រឹទ្ធសភា ឬក៏ ថ្នាក់ដឹកនាំរដ្ឋបាលខេត្តក្តី ក៏លោក រ៉ាវីយេ មីឡី នៅតែត្រូវកែទម្រង់សេដ្ឋកិច្ចថ្មីដែរ។
គោលការណ៍កែទម្រង់សេដ្ឋកិច្ចស៊ីជម្រៅរបស់ប្រធានាធិបតីអាហ្សង់ទីន មាន១០ចំណុចធំៗ ជារួមការធ្វើឲ្យមានតុល្យភាពកញ្ចប់ថវិកាជាតិ ការលើកកម្ពស់កម្មសិទ្ធិទ្រព្យសម្បត្តិឯកជន ហើយនិងកាត់កាត់បន្ថយចំណាយសាធារណៈ ពោលគឺកាត់បន្ថយចំណាយរដ្ឋ ឲ្យអស់យ៉ាងហោច ២៥% នៃចំណុលផលិតផលក្នុងស្រុកសរុប។ គម្រោងកាត់បន្ថយចំណាយថវិកាជាតិ ប៉ះពាល់ដល់វណ្ណៈអ្នកនយោបាយធំៗផង និងរាស្ត្រសាមញ្ញ ជាទូទៅដែរ។ ពួកអ្នកនយោបាយធំៗ បាត់បង់ផលប្រយោជន៍ជាច្រើន ដែលធ្លាប់មាននៅក្នុងអាណត្តិចាស់ៗ។ សូម្បីតែ អតីតប្រធានាធិតបីអាហ្សង់ទីន លោក Cristina Kirchner ក៏រងបាត់បង់អត្ថប្រយោជន៍ច្រើនដែរ។ មិនតែប៉ុណ្ណោះ ប្រធានាធិបតីអាហ្សង់ទីន ក៏ប្រកាសថា នឹងត្រូវបិទទីភ្នាក់ងារព័ត៌មានរដ្ឋ Telam ដែលមានបុគ្គលិករដ្ឋ ប្រមាណ ៧០០ នាក់។ បើតាមការចោទប្រកាន់របស់លោក រ៉ាវីយេ មីឡី, ស្ថាប័នព័ត៌មានរដ្ឋនេះជាប្រព័ន្ធឃោសនាបម្រើឲ្យអតីតប្រធានាធិបតីចាស់។
ចំណែក មន្ត្រីរដ្ឋការ ជាទូទៅ ក៏ជួបការលំបាកព្រោះតែគម្រោងកាត់បន្ថយចំណាយរដ្ឋដែរ។ មន្ត្រីរដ្ឋការ គ្រូបង្រៀន កម្មកររដ្ឋវិស័យដឹកជញ្ជូន និងសង្គមស៊ីវិល បាននាំគ្នាធ្វើបាតុកម្មជាហូរហែ ជាច្រើនសប្តាហ៍មកហើយ ពីព្រោះតែ គម្រោងកាត់បន្ថយប្រាក់ខែគ្រូបង្រៀន កាត់ជំនួយឧបត្ថម្ភដល់គម្រោងសិក្សា និងកាត់បន្ថយជំនួយដល់អាហារដ្ឋាននៅសាលារៀន ជាដើម។
មានទំនោរនិន្នាការសេរីនិយម មូលធននិយម បែបគំរូបែបសហរដ្ឋអាមេរិក ប្រធានាធិបតីអាហ្សង់ទីន ជាអ្នកដែលគាំទ្រដើរតាមគន្លងរបស់លោក ដូណាល់ ត្រាំ។ លោក រ៉ាវីយេ មីឡី ចង់ដឹកនាំប្រទេសយកគំរូតាមអាមេរិក និងចង់ប្តូរនយោបាយរូបិយវត្ថុទៅចាយប្រាក់ដុល្លារទៀតផង។
ប្រធានាធិបតីអាហ្សង់ទីន លោក រ៉ាវីយេ មីឡី បានពន្យល់ថា នយោបាយកែទម្រង់ វះកាត់សង្គមដ៏ធំដូច្នេះ ពីដំបូងៗឡើយ ប៉ះពាល់ច្រើនហើយ ប៉ុន្តែ កំណែទម្រង់ស៊ីជម្រៅផ្នែកសេដ្ឋកិច្ច នឹងហុចផលវិញ គ្រាន់តែថា ត្រូវការពេលវេលាច្រើន និងការអត់ធ្មត់ខ្លាំង។ លោក រ៉ាវីយេ មីឡី ស្នើឲ្យប្រជាជាតិ ខាំមាត់ សន្កត់ចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ