ប្រធានាធិបតីបារាំង៖ខ្ញុំមិនមែនមកប្រទេសអាល់ហ្សេរីដើម្បីសុំទិញឧស្ម័នបន្ថែមពីអាល់ហ្សេរីទេ
ថ្ងៃសុក្រ ទី២៦ សីហាជាថ្ងៃទី២ នៃដំណើរទស្សនកិច្ចរយៈពេល ៣ថ្ងៃរបស់ប្រធានាធិបតីបារាំងលោកម៉ាក្រុងក្នុងប្រទេសអាល់ហ្សេរី។ នាព្រឹកថ្ងៃទី២ នៃទស្សនកិច្ច លោកម៉ាក្រុងបានទៅទស្សនកិច្ចនៅទីបញ្ចុះសពមួយស្ថិតជាយក្រុងអាល់ហ្សេដើម្បីគោរពវិញ្ញាណក្ខន្ទដល់ក្រុមទាហានដែលបានស្លាប់ដើម្បីប្រទេសបារាំង។ ក្នុងថ្ងៃព្រហស្បតិ៍ ទី២៥ សីហា លោកម៉ាក្រុងបានប្រកាសពីការបង្កើតគណៈកម្មាការប្រវត្ដិវិទូចម្រុះមួយដើម្បីធ្វើការងារលើអាណានិគមរបស់បារាំងនៅអាល់ហ្សេរីពីឆ្នាំ ១៨៣០រហូតដល់អាល់ហ្សេរីទទួលបានឯករាជ្យក្នុងឆ្នាំ ១៩៦២។ គួររម្លឹកថា រឿងរ៉ាវអតីតកាលមួយបាន និងកំពុងបន្តបំពុលទំនាក់ទំនងរវាងប្រទេសទាំងពីរ។ ក្នុងបញ្ហានេះ លោកម៉ាក្រុងបានអំពាវនាវឲ្យក្រឡេកមើលរឿងរ៉ាវអតីតកាលជាមួយនឹងភាពក្លាហាន។ ក្រៅពីនេះ មានការលើកឡើងថា លោកម៉ាក្រុងទៅអាល់ហ្សេរីដើម្បីប្រយោជន៍ឧស្ម័ននៅក្នុងបរិបទនៃសង្រ្គាមអ៊ុយក្រែន។ តែលោកម៉ាក្រុងបានពន្យល់ថា ថាមពលបារាំងពឹងតិចតួចលើឧស្ម័ន ហើយបារាំងបានទិញឧស្ម័នអាល់ហ្សេរីតិចជាង ១០%។
ចុះផ្សាយនៅថ្ងៃ៖
ស្តាប់ - ០១:៣៣
« ខ្ញុំដឹងថាប្រធានបទឧស្ម័ននេះពិតជារឿងដែលគ្រប់គ្នាចាប់អារម្មណ៍។ វាពិតជារឿងមួយធម្មតានៅក្នុងបរិបទសព្វថ្ងៃ។ តែខ្ញុំចង់បញ្ជាក់ឲ្យបានច្បាស់នៅទីនេះ ហើយដូចអស់លោកដឹងស្រាប់ថា បារាំងពឹងលើឧស្ម័នតិចតួចសម្រាប់បម្រើនៅក្នុងវិស័យថាមពលរបស់ខ្លួន។ វិស័យថាមពលបារាំងត្រូវការឧស្ម័នប្រមាណជា ២០% ប៉ុណ្ណោះ គឺតិចតួចណាស់។ មួយវិញទៀត នៅក្នុងបរិមាណឧស្ម័នទាំងប្រមាណ ២០% នេះ យើងបាននាំចូលពីអាល់ហ្សេរីប្រមាណជា ៨ ទៅ ៩%។
ដូច្នេះអស់លោកឃើញទេថា យើងមិនបានស្ថិតនៅក្នុងស្ថានភាពមួយដូចបណ្តាប្រទេសផ្សេងទៀតដែលឧស្ម័នរបស់អាល់ហ្សេរីអាចនាំឲ្យមានការផ្លាស់ប្តូរនោះឡើយ។ ខ្ញុំចង់បញ្ជាក់បន្ថែមនៅត្រង់ចំណុចនេះថា រវាងបារាំង និងអាល់ហ្សេរី យើងគ្មានបំពង់បង្ហូរឧស្ម័នរវាងគ្នាទេ។ គឺខុសពីមិត្តអ៊ីតាលីរបស់យើងដែលមានបំពុងបង្ហូរឧស្ម័នជាមួយអាល់ហ្សេរីដោយសារតែចម្ងាយដែនដីរវាងប្រទេសទាំងពីរនៅជិតគ្នា។
បារាំងបានទិញឧស្ម័នអាល់ហ្សេរីជាឧស្ម័នពង្រាវ រួចត្រូវបំប្លែងជាឧស្ម័នធម្មតាវិញដើម្បីអាចប្រើបាន។ ដូច្នេះ បារាំងបាននាំចូលឧស្ម័នអាល់ហ្សេរី តែមិនមែនឧស្ម័ននេះទេដែលជារឿងសំខាន់សម្រាប់យើង។ នៅពេលដែលខ្ញុំឮថា ប្រធានាធិបតីបារាំងមកអាល់ហ្សេរីដើម្បីទទួលបានឧស្ម័នបន្ថែមពីអាល់ហ្សេរីនោះ វាជារឿងមិនសមហេតុសមផលទាល់តែសោះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ