ទាហានហូឡង់៣នាក់ត្រូវកងកម្លាំងកាដាហ្វ៊ីចាប់ខ្លួននៅលីប៊ី
រដ្ឋមន្រ្តីក្រសួងការពារជាតិហូឡង់បានឲ្យដឹងនៅថ្ងៃព្រហស្បតិ៍នេះថា ទាហានរបស់ខ្លួនចំនួន ៣រូប ត្រូវកងកម្លាំងស្ម័គ្រស្មោះនឹងលោកកាដាហ្វ៊ីចាប់ខ្លួន នៅពេលពួកគេចូលទៅជួយជម្លៀសពលរដ្ឋអឺរ៉ុបចេញពីប្រទេសលីប៊ី។ ចាប់តាំងពីមានចលនាបះបោរនៅលីប៊ីមក នេះគឺជាលើកទីមួយហើយ ដែលមានសេចក្តីរាយការណ៍អំពីការចាប់ខ្លួនជនបរទេស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
យោងតាមរដ្ឋមន្រ្តីក្រសួងការពារជាតិហូឡង់ ទាហានហូឡង់ទាំង៣រូប ត្រូវបានចាប់ខ្លួន កាលពីថ្ងៃអាទិត្យកន្លងទៅ នៅពេលដែលពួកគេធ្វើដំណើរតាមឧទ្ធម្ភាកចក្រចេញពីនាវាចម្បាំងទៅចុះចតនៅលីប៊ី ដើម្បីជម្លៀសពលរដ្ឋអឺរ៉ុប។ ជនស៊ីវិល២រូបក៏ត្រូវបានចាប់ខ្លួនដែរ នៅពេលនោះ ក៏ប៉ុន្តែ ក្រោយមកជនស៊ីវិលទាំង២រូបត្រូវបានអាជ្ញាធរលីប៊ីដោះលែងមកវិញ ដោយទុកតែទាហាន និងឧទ្ធម្ភាកចក្រ។
គួរបញ្ជាក់ថា ចាប់តាំងពីមានអំពើបះបោរមក មិនមែនតែហូឡង់មួយទេ ដែលបញ្ជូនទាហានកុម្ម៉ង់ដូចូលទៅជួយជម្លៀសប្រជាជនចេញពីលីប៊ី។ កាលពីចុងសប្តាហ៍កន្លងទៅនេះ កាសែតអង់គ្លេសបានចុះផ្សាយថា រាជាណាចក្រអង់គ្លេសក៏បានបញ្ជូនទាហានកុម្ម៉ង់ដូចូលទៅលីប៊ីដែរ ដើម្បីជម្លៀសពលរដ្ឋអង់គ្លេស ដែលបម្រើការនៅការដ្ឋានអណ្តូងប្រេងលីប៊ី។ បារាំង និងអាមេរិក ដែលសុទ្ធតែបានបញ្ជូនយន្តហោះទៅជម្លៀសពលរដ្ឋចេញពីលីប៊ីនោះ ក៏ទំនងជាមានទាហានកុម្ម៉ងដូទៅតាមការពារដែរ។ ក៏ប៉ុន្តែ កន្លងមក ក្រៅពីទាហានហូឡង់ គេមិនដែលលេចឮព័ត៌មានអំពីការចាប់ខ្លួនទាហានបរទេសដោយអាជ្ញាធរលីប៊ីនោះទេ។
នៅពេលនេះ នាវាចម្បាំងបរទេសជាច្រើនគ្រឿងត្រូវបានបញ្ជូនទៅកាន់ប្រទេសលីប៊ី។ នាវាពិឃាតមួយគ្រឿង និងនាវាផ្ទុកឧទ្ធម្ភាចក្រពីរគ្រឿងរបស់អាមេរិក បានទៅដល់សមុទ្រម៉េឌីទេរ៉ានេហើយ។ ទាហានម៉ារីនអាមេរិក ចំនួន ៤០០នាក់ កំពុងធ្វើដំណើរទៅកាន់នាវាផ្ទុកយន្តហោះទាំងពីរនោះ ដើម្បីបន្ថែមពីលើម៉ារីន ៨០០នាក់ ដែលមាននៅលើនោះស្រាប់។ ក្រៅពីនោះ នាវាចម្បាំងផ្សេងទៀតក៏កំពុងតែធ្វើដំណើរទៅកាន់ប្រទេសលីប៊ីដែរ ក្នុងនោះបារាំងបញ្ជូនពីរគ្រឿង អង់គ្លេសមួយគ្រឿង កាណាដាមួយគ្រឿង កូរ៉េខាងត្បូងមួយគ្រឿង និងមួយគ្រឿងទៀតរបស់អ៊ីតាលីនឹងត្រូវចេញដំណើរនៅថ្ងៃស្អែក ឬថ្ងៃសៅរ៍។ នាវាទាំងនេះ អាចប្រើសម្រាប់ប្រតិបត្តិការយោធាក៏បាន និងការជម្លៀសជនភៀសខ្លួនក៏បាន។
នៅពេលនេះ គេនៅមិនទាន់ឯកភាពគ្នានៅឡើយទេ អំពីការធ្វើអន្តរាគមន៍យោធានៅលីប៊ី។ ក៏ប៉ុន្តែ គ្រប់គ្នាបានទទួលស្គាល់ថា ជនភៀសខ្លួន គឺជាបញ្ហាដ៏ចម្បងមួយ ដែលគេចាំបាច់ត្រូវតែដោះស្រាយជាបន្ទាន់។ ជនភៀសខ្លួនរាប់សិបម៉ឺននាក់ ដែលក្នុងនោះមានទាំងពលរដ្ឋបរទេស និងពលរដ្ឋលីប៊ី កំពុងតែនាំគ្នាព្យាយាមឆ្លងដែនតាមច្រកព្រំដែនគោកទៅទុយនីស៊ី និងអេហ្ស៊ីប។ ទីជម្រក ចំណីអាហារ ទឹកស្អាត និងថ្នាំពេទ្យ គឺជាតម្រូវការចាំបាច់ និងបន្ទាន់បំផុត សម្រាប់ជនភៀសខ្លួនទាំងនេះ។ ពលរដ្ឋបរទេស ដែលមិនទាន់អាចចាកចេញពីលីប៊ីបាន ភាគច្រើនគឺជាពលរដ្ឋមកពីប្រទេសក្រីក្រ មិនមានលទ្ធភាពបញ្ជូននាវា ឬយន្តហោះមកជម្លៀសពលរដ្ឋរបស់ខ្លួនបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ