កិច្ចព្រមព្រៀងសន្តិភាពនៅម៉ាលី ត្រូវបានចុះហត្ថលេខានៅក្រុងអាល់ហ្ស៊េ
ក្រុមពហុភាគីដែលចរចាគ្នា ស្តីពីសន្តិភាពនៅម៉ាលី ដោយមានប្រទេសអាល់ហ្ស៊េរី ជាអាជ្ញាកណ្តាល បានយល់ស្របគ្នា ចុះហត្ថលេខាលើកិច្ចព្រមព្រៀងសន្តិភាព បន្ទាប់ពីចំណាយពេលអស់ ៨ខែ។ ទោះបីជាយ៉ាងណា នៅមានភាគីតំណាងក្រុមឧទ្ទាមមួយចំនួនទៀត ពុំទាន់បានចុះហត្ថលេខា លើកិច្ចព្រមព្រៀងសន្តិភាពនេះទេ ដោយសុំយកពេលទៅពិចារណា និងស្វែងរកការគាំទ្រ ឲ្យបានច្រើនពីក្រុមខ្លូន។ លោក ប្រមុខការទូតអាល់ហ្ស៊េរី បានសម្តែងសុទិដ្ឋិនិយមថា មិនយូរមិនឆាប់ គ្រប់គ្នានឹងព្រមទទួលយកកិច្ចព្រមព្រៀងសន្តិភាពនេះ ព្រោះនេះជាមធ្យោបាយតែមួយគត់ ដើម្បីផ្សះផ្សារប្រទេសម៉ាលីឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ជម្លោះដែល ប្រឈមមុខដាក់គ្នារវាង ក្រុមឧទ្ទាមដែលតំណាងឲ្យជនជាតិភាគតិចជាច្រើនក្រុម បានទាញប្រទេសម៉ាលី ឲ្យធ្លាក់ចូលភ្លើងសង្គ្រាមស៊ីវីល យ៉ាងធ្ងន់ធ្ងរ។ ទាហានបារាំងបានធ្វើអន្តរាគមន៍ ដោយបានវាយបង្រ្កាបក្រុមឧទ្ទាមអាល់កាយអ៊ីដា នៅភាគខាងជើងម៉ាលី។
ក្រុមចរចាទាំង៦ភាគី បានចាប់ផ្តើមជួបប្រជុំគ្នា ស្វែងរកដំណោះស្រាយសន្តិភាព ដោយមានអន្តរាគមន៍ពីសំណាក់អាល់ហ្ស៊េរី។ ការចរចាគ្នាយ៉ាងលំបាក ដែលបានចំណាយពេលអស់៨ខែមកហើយ ត្រូវបានបិទបញ្ចប់នៅថ្ងៃអាទិត្យទី ១ មិនា នេះ ដោយបានត្រូវរូវគ្នា ព្រមចុះហត្ថលេខាលើកិច្ចព្រមព្រៀងមួយ ដែលគេដាក់ឈ្មោះថា កិច្ចព្រមព្រៀងសន្តិភាព និងផ្សះផ្សារជាតិម៉ាលី។ ទោះបីជាយ៉ាងណា កិច្ចព្រមព្រៀងនេះ នៅមិនទាន់បានចុះហត្ថលេខា ដោយក្រុមសហប្រតិបត្តិការចលនាអាហ្សាវាដ ដែលជាភាគីមួយ ក្នុងចំណោមភាគីទាំង៦ នៅឡើយទេ។ ក្រុមនេះ បានសុំយកពេលបន្ថែមទៀត ដើម្បីស្វែងរកការគាំទ្រ និងយល់ព្រម របស់ក្រុមខ្លួន ព្រោះថាក្រុមនេះ ជាសម្ព័ន្ធដែលមានបក្សពួកច្រើនទៀត។
លោករដ្ឋមន្ត្រីក្រសួងការបទេសអាល់ហ្ស៊េរី បានថ្លែងថា ការដែលមានភាគីមួយ មិនទាន់ចុះហត្ថលេខានេះ មិនមែនមានន័យថាភាគីនេះទាត់ចោលកិច្ចព្រមព្រៀងនេះទេ។ គេគ្រាន់តែយកពេលទៅពិចារណា នឹងបញ្ចុះបញ្ចូលផ្ទៃក្នុងគ្នាគេ មុននឹងសម្រេចយល់ព្រមចុះហត្ថលេខា។ លោកថា លោកសង្ឃឹមយ៉ាងមុតមាំថា ភាគីទាំងអស់ នឹងអនុម័តកិច្ចព្រមព្រៀងនេះ នៅក្រុងបាម៉ាកូ នាពេលឆាប់ៗខាងមុខនេះ។ ដូចគ្នាដែរ លោក ឡូរង់ ហ្វាប៊ីយូស រដ្ឋមន្រ្តីការបរទេសបារាំង បានថ្លែងថានេះជាដំណឹងល្អ ហើយលោកអំពាវនាវ ឲ្យគ្រប់ភាគី គោរពទៅតាមអ្វីដែលបានចែង ក្នុងកិច្ចព្រមព្រៀង ដើម្បីនាំសន្តិភាព និងការបង្រួបបង្រួមជាតិនៅម៉ាលី ត្រឡប់មកវិញ។
តាមការផ្តល់ដំណឹង កិច្ចព្រមព្រៀងដែលបានចុះហត្ថលេខានេះ មានខ្លឹមសារជារួម សំដៅបង្រួបបង្រួមគ្នា ដោយឈរលើបូរណភាពទឹកដី ម៉ាលី តែមួយ ពោលគឺគ្មានការបែងចែក ចេញជាតំបន់ស្វ័តយ័តឯករាជ្យ សំរាប់ជនជាតិផ្សេងៗគ្នានោះទេ។ ក្រុមជនជាតិទាំងអស់ ត្រូវតែរួមរស់ជាមួយគ្នា ដោយសុខសន្តិភាព ស្រលាញ់រាប់អានគ្នា ដូចបងប្អូនតែមួយ ក្រោមដំបូលប្រទេសតែមួយ គឺសាធារណៈរដ្ឋម៉ាលី ដោយមិនយកនិន្នការសាសនា មកចោទជាជម្លោះទៀតឡើយ។
កិច្ចព្រមព្រៀងនេះ ក៏បានចែងផងដែរ ថានឹងបង្កើតជាសភា តំណាងឲ្យតំបន់នីមួយៗ ដែលជ្រើសតាំងតាមរយៈការបោះឆ្នោតដោយសេរីយុត្តិធម៌ ហើយនឹងធ្វើយ៉ាងណា ឲ្យគ្រប់ភាគីទាំងអស់ មានអ្នកតំណាងរបស់ខ្លួន សមាមាត្រទៅតាមចំនួនប្រជាជន ជាពិសេស ប្រជាជននៅភាគខាងជើង។ ចំណែកកងទាហានពីគ្រប់ភាគី នឹងត្រូវធ្វើសមាហរណកម្ម ចូលជាមួយទាហានជាតិម៉ាលីតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ