លោកប្រធានាធិបតីម៉ាលីត្រឡប់ពីចិនវិញជាមួយនឹងកាដូពេញដៃ
នៅថ្ងៃសៅរិ៍ ទី១៣ កញ្ញានេះ លោកប្រធានាធិបតីម៉ាលីអ៊ីប្រាហ៊ីម ប៊ូបាការ កេតាទើបបានត្រឡប់ដល់ប្រទេសវិញ បន្ទាប់ពីបានធ្វើដំណើរទៅកាន់ប្រទេសចិនដើម្បីចូលរួមនៅក្នុងអង្គ Forum សេដ្ឋកិច្ចពិភពលោករៀបចំនៅក្នុងស្រុកជំាងយីនក្នុងសប្តាហ៍នេះ។ នេះជាលើកទី១ ដែលមានប្រធានាធិបតីម៉ាលីម្នាក់បានដាក់ជើងជាន់ប្រទេសចិន។ គឺនៅក្នុងក្រៅក្របខ័ណ្ឌនៃ អង្គ Forum សេដ្ឋកិច្ចពិភពលោកដែលចិន និងម៉ាលីបានពង្រឹងកិច្ចសហប្រតិបត្តិការរវាងគ្នា។ មានកិច្ចព្រមព្រៀងជាច្រើនដែលម៉ាលី និងចិនបានចុះហត្ថលេខា និងដែលចិនបានឲ្យកាដូម៉ាលីយ៉ាងច្រើនសម្បើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ពិតមែនតែលោកប្រធានាធិបតីម៉ាលី អ៊ីប្រាហ៊ីម ប៊ូបាការ កេតាបានចាកចេញពីប្រទេសចិនបាត់ទៅហើយក្តី ក៏ដំណើរទៅកាន់ប្រទេសចិនរបស់លោកបានបន្សល់ទុកនូវសក្ខីកម្មមួយមិនអាចសាបសូន្យនៅក្នុងកិច្ចសហប្រតិបត្តិរវាងប្រទេសទំាងពីរ ចិន ម៉ាលី។ ចិន និងម៉ាលីដែលគ្មាននរណាម្នាក់ខកចិត្តឡើយ ហើយអ្នកដែលត្រេកត្រអាល ញញឹមបិទមាត់មិនជិតនោះ គឺលោក អ៊ីប្រាហ៊ីម ប៊ូបាការ កេតាតែម្តង។ នេះក៏ដោយសារថា លោកអ៊ីប្រាហ៊ីម ប៊ូបាការ កេតាបានវិលត្រឡប់ទៅប្រទេសវិញជាមួយនឹងកាដូរបស់ចិនពេញដៃ។ មិនមែនជាកាដូសម្រាប់រូបលោកផ្ទាល់ទេ តែជាកាដូដែលចិនបានផ្តល់ឲ្យប្រទេសម៉ាលី ក្នុងនោះ ប្រាក់ជំនួយផ្លូវការគ្មានសំណង និងគ្មានលក្ខខណ្ឌជាង ៣០លានដុល្លារ និង ប្រាក់កម្ចីគ្មានការប្រាក់ជិត ១៥លានដុល្លារផ្សេងទៀត។
វាមិនខុសអ្វីនឹងសុភាសិតមួយចែងថា « មានទៅ មានមក » នោះទេ ព្រោះថា ទន្ទឹមនឹងហោប៉ៅរបស់លោកប្រមុខរដ្ឋម៉ាលីដាក់ពេញដោយលុយដុល្លាររបស់ចិន ទីក្រុងប៉េកំាងក៏ទទួលបានត្រឡប់វិញពីទីក្រុងបាម៉ាកូនូវកិច្ចព្រមព្រៀងជាច្រើនសម្រាប់ក្រុមហ៊ុនចិនធ្វើវិនិយោគនៅក្នុងប្រទេសម៉ាលី រួមមាននៅក្នុងវិស័យថាមពល រ៉ែ ឬមួយក៏ការស្ថាបនាហេដ្ឋារចនាសម្ព័ន្ធរបស់ប្រទេសម៉ាលីជាដើម។ ជាក់ស្តែង ទី១ ការសាងសង់ផ្លូវដែកដែលត ភ្ជាប់ពីទីក្រុងបាម៉ាកូ ប្រទេសម៉ាលី ទៅកាន់ទីក្រុងកូណាគ្រី ប្រទេសហ្គីណេ ទី២ ការសាងសង់ស្ពានថ្មីឆ្លងកាត់ទន្លេនីហ្សេក្នុងស្រុកសេហ៊្គូ ទី៣ ការសាងសង់ផ្លូវជាច្រើនដែលតភ្ជាប់រវាងស្រុកនានាស្ថិតប៉ែកខាងជើង ឬមួយក៏ការសាងសង់កំពុងផែថ្មីចំនួន ៧កន្លែង ។ល។ និង។ល។
ទន្ទឹមគ្នានេះ រដ្ឋាភិបាលចិនបានផ្តល់អាហារូបករណ៍ដល់និស្សិតម៉ាលីចំនួន ៦០០នាក់សម្រាប់រយៈពេលសិក្សា ៣ឆ្នំា។ ដូច្នេះ វាពិតជាគ្មានអ្វីគួរឲ្យភ្ញាក់ផ្អើលទេដែលចិនកំពុងបន្តពង្រឹងកិច្ចសហប្រតិបត្តិការជាមួយទ្វីបអាហ្រ្វិកពេលនេះ ព្រោះវាជាដែនដីមួយដែលចិនត្រូវការដោយខានមិនបានដើម្បីបង្កើនសក្តានុពលរបស់ខ្លួននៅក្នុងផ្នែកនយោបាយ សេដ្ឋកិច្ច និងការទូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ