អង្គការសហប្រជាជាតិ អាហ្វ្រិក នាំគ្នារិះគន់វិធានការបិទព្រំដែនប្រឆាំងអូមីក្រុង
ក្រុមប្រទេសនៅទ្វីបអាហ្វ្រិក បានសម្តែងការសោកស្តាយនិងខឹងសម្បារ ចំពោះវិធានការរបស់ប្រទេសជាច្រើននៅលើពិភពលោក ដែលសម្រេចបិទព្រំដែនជាមួយអាហ្វ្រិកខាងត្បូង ក្រោយពីមានការលេចឡើងនូវមេរោគកូវីដបំប្លែងខ្លួនថ្មី អូមីក្រុង។ អគ្គលេខាធិការអង្គការសហប្រជាជាតិ ក៏បានសម្តែងការព្រួយបារម្ភយ៉ាងខ្លាំងដែរ នៅពេលបានឃើញវិធានផ្តាច់តំបន់អាហ្វ្រិកប៉ែកខាងត្បូងឱ្យនៅឯកាយ៉ាងដូច្នេះ។
ចុះផ្សាយនៅថ្ងៃ៖
ស្តាប់ - ០១:៥៩
ការដាក់ក្រុមប្រទេសនៅអាហ្វ្រិកប៉ែកខាងត្បូង ឱ្យនៅឯកា ពិតជាគួរឱ្យព្រួយបារម្ភខ្លាំងណាស់។ បើតាមលោកអគ្គលេខាធិការអង្គការសហប្រជាជាតិ អាហ្វ្រិកមានវ៉ាក់សាំងតិចតួច និងចាក់ជូនប្រជាពលរដ្ឋបានក្នុងអត្រាដ៏ទាប ដែលកត្តាសម្រួលឱ្យមេរោគកូវីដមានឱកាសនិងងាយធ្វើបំប្លែងខ្លួន មិនមែនជាកំហុសរបស់ប្រជាពលរដ្ឋអាហ្វ្រិកទេ។ ដូច្នេះអាហ្វ្រិកខាងត្បូងមិនគួរណាត្រូវរងទណ្ឌកម្ម ដោយហេតុគ្រាន់តែបានរកឃើញមេរោគបំប្លែងខ្លួនថ្មី និងចែកចាយព័ត៌មានបែបវិទ្យាសាស្ត្រនិងសុខាភិបាលដល់ពិភពលោកឡើយ។ នេះជាសេចក្តីថ្លែងការណ៍របស់លោកអគ្គលេខាធិការអង្គការសហប្រជាជាតិ។
ជាមួយពាក្យការកោតសរសើររដ្ឋាភិបាល និងអ្នកវិទ្យាសាស្ត្រ អាហ្វ្រិកខាងត្បូង ដែលបានបញ្ចេញសកម្មភាពយ៉ាងលឿនរហ័សនៅពេលឃើញលេចអូមីក្រុងភ្លាម លោក អង់តូនីញ៉ូ ហ្គូទែករ៍ បានអំពាវនាវឱ្យគ្រប់ប្រទេស គ្រោងធ្វើតេស្តហើយតេស្តទៀតលើអ្នកដំណើរ និងចាត់វិធានការសមស្រប និងមានប្រសិទ្ធភាព ជាក់ស្តែងពិតៗ ក្នុងការទប់ស្កាត់ការរីករាតត្បាតនៃមេរោគ ជាជាងបិទខ្ទប់ការធ្វើការដំណើរទាំងស្រុងយ៉ាងដូច្នេះ។
វិធានការបិទខ្ទប់ព្រំដែន គ្មានប្រសិទ្ធភាពទប់ស្កាត់ការរីករាលដាលនៃមេរោគបំប្លែងអូមីក្រុងទេ។ នេះបើតាមការបញ្ជាក់របស់អង្គការសុខភាពពិភពលោក កាលពីម្សិលមិញ។ ចំណែក អាហ្វ្រិកខាងត្បូង ទីដែលលេចករណីមេរោគកូវីដបំប្លែង អូមីក្រុង ដំបូងគេកាលពីថ្ងៃព្រហស្បតិ៍ទី ២៥វិច្ឆិកា វិធានការបិទខ្ទប់ការធ្វើដំណើរទៅមកតំបន់អាហ្វ្រិកខាងត្បូង ជាដំណឹងដ៏សោកសៅ និងគួរសោកស្តាយខ្លាំងណាស់ សម្រាប់ពលរដ្ឋអាហ្វ្រិក ព្រោះនរណាក៏បានដឹងអំពីភាពលំបាករបស់ទ្វីបអាហ្វ្រិកដែរ។ នេះជាសេចក្តីប្រកាសរបស់អ្នកនាំពាក្យក្រសួងការបរទេសអាហ្វ្រិកខាងត្បូង។ ចាត់ទុកថាជាទណ្ឌកម្ម ប្រទេសអាហ្វ្រិកខាងត្បូង បានអំពាវនាវឱ្យគ្រប់ប្រទេសទាំងបើកចំហព្រំដែន វិញ ភ្លាមនិងជាបន្ទាន់ និងកំពុងចរចាជាមួយបណ្តារដ្ឋាភិបាលនៃប្រទេសពាក់ព័ន្ធដើម្បីសុំលុបវិធានការបិទខ្ទប់នោះវិញ ព្រោះការបិទខ្ទប់ការធ្វើដំណើរ អាចនឹងធ្វើប៉ះពាល់ខ្លាំងដល់សេដ្ឋកិច្ចជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ