ឥណ្ឌូណេស៊ី ផ្អាកបណ្តោះអាសន្ន មិនឲ្យមានចំការដូងប្រេងថ្មី
ក្រឹត្យប្រធានាធិបតីមួយបានសម្រេចផ្អាក ការផ្តល់ដីថ្មី សម្រាប់កសិកម្មដាំដើមដុងប្រេង នៅប្រទេសឥណ្ឌូណេស៊ី។ ទៅតាម សេចក្តីប្រកាសរបស់រដ្ឋាភិបាល ក្រឹត្យផ្អាកជាបណ្តោះអាសន្ន លើការដាំដូងប្រេងថ្មី ត្រូវចុះហត្ថលេខាដោយលោកប្រធានាធិបតី ហ្សូកូ វីដូដូ កាលពីថ្ងៃពុធ នឹងមានសុពលភាពរយៈពេល៣ឆ្នាំ។ ក្រុមអ្នកការពារបរិស្ថានបានស្វាគមអបអរចំណាត់ការរបស់រដ្ឋាភិបាល ក្នុងការគ្រប់គ្រង អាជីវកម្ម ដាំដូងប្រេង ដែលជាប្រភពនៃការបំផ្លាញបរិស្ថានដ៏ធ្ងន់ធ្ងរនៅឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
នៅក្នុងគោលដៅជួយការពារអភិរក្សព្រៃឈើ រដ្ឋាភិបាលឥណ្ឌូណេស៊ីបានចេញក្រឹត្យ បញ្ជាមិនឲ្យផ្តល់ដីថ្មីសម្រាប់ការដាំដូងប្រេង នៅក្នុងរយៈពេល៣ឆ្នាំ។ ទៅតាមក្រឹត្យ ប្រធានាធិបតី ដែលមន្រ្តីរដ្ឋាភិបាលឥណ្ឌូណេស៊ីបង្ហាញដល់អ្នកកាសែត កាលពីថ្ងៃព្រហស្បតិ៍ អាជ្ញាធរមូលដ្ឋាន ត្រូវកែលម្អ និងអភិវឌ្ឍដោយចីរកាល កសិកម្មដាំដូងប្រេង ព្រមទាំងធានាឲ្យបានផងដែរ ការពារបរិស្ថាន។ ក្រៅតែពីបញ្ជាឲ្យគេផ្អាក មិនផ្តល់អាជ្ញាប័ណ្ណថ្មី សម្រាប់ការដាំដូងប្រេង រដ្ឋាភិបាលរបស់លោកហ្សូកូ បញ្ជាក់ផងដែរ ថា នឹងសិក្សាពិចារណាឡើងវិញ លើអាជ្ញាប័ណ្ណធ្វើអាជីវកម្ម ដូងប្រេង ដែលស្ថិតក្នុងតំបន់ព្រៃ។
ក្រឹត្យប្រធានាធិបតីសំដៅផងដែរ លើកទឹកចិត្តគេធ្វើអាជីវកម្មដាំដុះដូងប្រេងនៅលើកន្លែងដែលធ្លាប់ដាំដូងប្រេង រួចហើយ ជាជាង កាប់ឆ្ការព្រៃ ដើម្បីរានយកកន្លែងដាំដូងប្រេងថ្មី។
ក្នុងនាមជាប្រទេសផលិត និងនាំចេញដូងប្រេងច្រើនជាងគេនៅលើពិភពលោក ឥណ្ឌូណេស៊ី មានផ្ទៃដី ចំការដូងប្រេងដល់ទៅ ១២លានហិចតា។ តម្រូវការដូងប្រេងចេះតែកើនឡើង បានធ្វើឲ្យអាជីវកម្មដាំដូងប្រេង រីកចម្រើនខ្លាំង នៅប៉ុន្មានឆ្នាំចុងក្រោយនេះ។ ការពង្រីកដីដាំដូងប្រេង នៅលើកោះសូម៉ាត្រា ប៉ាពួ ឬ នៅបរណេអូជាដើម បានធ្វើឲ្យក្រុមហ៊ុន ឈ្មួញធ្វើអាជីវកម្មបានប្រាក់ចំណេញ ច្រើន ចំណែករដ្ឋក៏បានចំនូលច្រើនដែរពីការប្រមូលពន្ធលើអាជីវកម្មដូងប្រេង។
ប៉ុន្តែ ទន្ទឹមនឹងការពង្រីកវិសាលភាពដីចំការដូងប្រេង ក្រុមអ្នកការពារបរិស្ថានបានតវ៉ាផងដែរ ថា អាជីវកម្មដូងប្រេងជាអ្នកបំផ្លាញបរិស្ថាន នៅឥណ្ឌូណេស៊ី។ សកម្មភាព ខុសច្បាប់ ដើម្បីដុតព្រៃ យកដីធ្វើចំការដូងប្រេង ជាដើមហេតុមួយ ដែលធ្វើឲ្យគេកាប់បំផ្លាញព្រៃឈើ បំផ្លាញជំរកសត្វដែលជិតផុតពូជ និងបង្កឲ្យមានភ្លើងឆេះព្រៃ ជាញឹកញយនៅប្រទេសឥណ្ឌូណេស៊ី។ នៅថ្ងៃសុក្រ អ្នកការពារបរិស្ថានចេញមុខស្វាគមអបអរចំណាត់ការរបស់រដ្ឋាភិបាល ដែលគេវាយតម្លៃថា គួរអនុវត្តក្នុងរយៈពេល២៥ឆ្នាំ ប៉ុន្តែ មិនមែនត្រឹម៣ឆ្នាំនោះទេ។ សម្រាប់ក្រុមវិនិយោគលើផលិតកម្មដូងប្រេង វិញ វិធានការរបស់រដ្ឋាភិបាលនឹងបន្ទុចបង្អាក់ផលចំណេញរបស់ប្រជាជនឥណ្ឌូណេស៊ី ដែលបានមកពីដូងប្រេង។
វិធានការរបស់រដ្ឋាភិបាលឥណ្ឌូណេស៊ីដើម្បី បង្អង់ អាជីវកម្មដាំដូងប្រេង ធ្វើឡើងផងដែរ នៅក្រោយការសម្រេចរបស់សភាអឺរ៉ុបដែលបានបោះឆ្នោត ហាមឲ្យគេឈប់ប្រើដូងប្រេង សម្រាប់ផលិតជាប្រេងឥន្ធនៈសរីរាង្គ ចាប់ពីឆ្នាំ ២០៣០តទៅ។ តាមរយៈច្បាប់ថ្មី សភាអឺរ៉ុបចង់បញ្ចុះបញ្ចូលឲ្យគេឈប់ប្រើដូងប្រេង ដែលប៉ះពាល់ខ្លាំង លើបរិស្ថាន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ