លោកប្លីងកិនទៅចិនជាថ្មីដើម្បីបន្ថែមសម្ពាធលើប៉េកាំង និងស្វែងរកស្ថិរភាព
ប្រមុខការទូតអាមេរិកលោកអង់តូនី ប្លីងកិន ត្រូវផ្តើមទស្សនកិច្ចបីថ្ងៃនៅប្រទេសចិនជាលើកទីពីរ ចាប់ពីថ្ងៃពុធទី ២៤មេសា២០២៤នេះទៅ ដោយពាំនាំនូវសំណុំរឿងមួយជម្លៀសធំទៅជជែកជាមួយដៃគូ។ អាមេរិកបង្កើនសម្ពាធបន្ថែមលើចិនចំពោះប្រធានបទខ្វែងគ្នាខ្លះ តែក៏ចង់រក្សាស្ថិរភាពនៃទំនាក់ទំនងចិន-អាមេរិកដែលនៅមិនធូរស្វាងសោះ។ ចំណែកចិនមិនបណ្តោយឱ្យនរណាជាន់ទេ នេះបើតាមសេចក្តីថ្លែងការណ៍ផ្លូវការចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នេះជាទស្សនកិច្ចនៅប្រទេសចិនលើកទីពីរ ក្នុងរយៈពេលមិនដល់មួយឆ្នាំផង សម្រាប់លោកអង់តូនី ប្លីងកិន។ ផ្តើមទស្សនកិច្ចដោយមានការជួបជុំក្រុមនិស្សិតនិងសហគ្រិននៅក្រុងសៀងហៃ លោកប្រមុខការទូតអាមេរិកនឹងមានជំនួបពិភាក្សាជាមួយប្រមុខដឹកនាំចិននៅប៉េកាំង នៅថ្ងៃសុក្រទី ២៦មេសា។ នាឱកាសនោះ លោកប្លីងកិន នឹងដាក់សម្ពាធលើចិន ក្នុងសំណុំរឿងចម្រូងចម្រាសជាច្រើន មានជាអាទិ៍ការជំរុញឱ្យប៉េកាំងអត់ធ្មត់ពេលតៃវ៉ាន់ពិធីទទួលប្រធានាធិបតីថ្មីឱ្យចូលកាន់តំណែង ឬកង្វល់របស់អាមេរិកជុំវិញទម្លាប់ធ្វើពាណិជ្ជកម្មរបស់ចិនដែលវ៉ាស៊ីនតោនយល់ថាគ្មានលក្ខណៈប្រកួតប្រជែងត្រឹមត្រូវ។
ប៉ុន្តែជាកិច្ចស្វាគមន៍ដំណើរមកដល់ជាលើកទីពីររបស់ប្រមុខការទូតអាមេរិក កាសែតផ្លូវការចិន (ស៊ីនហួរ) បានចេញវិចារណកថានៅព្រឹកថ្ងៃពុធបញ្ជាក់ជំហររបស់ខ្លួនថា ទោះបីជាថ្មីៗនេះ ទំនាក់ទំនងទ្វេភាគីចិន-អាមេរិកចាប់មានលំនឹងល្អបន្តិចមែន តែនៅល្អក់កករខ្លាំងជានិច្ច មកពីវ៉ាស៊ីនតោនងប់ក្នុងភាពភ័យខ្លាចជ្រុល ប្រឆាំងយ៉ាងងឹតងងុលនឹងពាណិជ្ជកម្មនាំ ចេញរបស់ចិន។ ស្តីពីសំណុំរឿងដ៏ក្តៅគគុក តៃវ៉ាន់និងសមុទ្ទចិនខាងត្បូងវិញ កាសែតចិនបានរំលឹកថា គោលការណ៍ចិនតែមួយ ជាគ្រឹះស្ថាបនាទំនាក់ទំនងទ្វេភាគីរវាងប្រទេសទាំងពីរ តែអាមេរិកចូលជ្រៀតជ្រែក និងសាបព្រោះភាពមិនចុះសម្រុងឱ្យចិននិងបណ្តាប្រទេសជិតខាង។
ជាចុងក្រោយ ជាចម្លើយតបទៅនឹងឆន្ទៈរបស់រដ្ឋបាលលោកចូបៃដិនដែលចង់មកដាក់សម្ពាធបន្ថែមលើចិន តាមរយៈបំណងប្រាថ្នាសហការជាមួយចិន និងចង់ឃើញចិនបង្ហាញជំហរជាក់លាក់ជាមួយប្រធានាធិបតីរុស្ស៊ីពូទីននោះ សារព័ត៌មានរដ្ឋចិនបែរជារុញឱ្យសហរដ្ឋអាមេរិកវិញថា ត្រូវបញ្ឈប់ទម្លាប់ទម្លាក់កំហុស មកលើចិន។ ប៉េកាំងសុំឱ្យវ៉ាស៊ីនតោន ទទួលស្គាល់តួនាទីមិនអាចខ្វះបានរបស់ចិនក្នុងវិបត្តិអន្តរជាតិធំៗ ជាក់ស្តែងសង្គ្រាមនៅអ៊ុយក្រែនតែម្តង។ មានន័យថា មហាអំណាចទាំងពីរមើលឃើញបញ្ហាផ្ទុយគ្នាស្រលះលើគ្រប់ផ្នែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ