អ.ស.ប.បង្កើតមូលនិធិថ្មីជួយជនភៀសខ្លួនព្រោះតែការប្រែប្រួលអាកាសធាតុ
នៅថ្ងៃពុធ ទី២៤មេសា អង្គការសហប្រជាជាតិ បានប្រកាសសម្ពោធគម្រោងមូលនិធីថ្មី១ សំដៅដល់ការជួយជនភៀសខ្លួននិងជនរងគ្រោះព្រោះតែការប្រែប្រួលអាកាសធាតុ។ ដើម្បីសម្រេចកម្មវត្ថុនេះ អង្គការសហប្រជាជាតិសង្ឃឹមនឹងប្រមូលថវិកាមូលនិធិ ១០០លានដុល្លារ ចាប់ពីពេលនេះដល់ចុងឆ្នាំ២០២៥។ ការប្រកាសជំនួយជនរងគ្រោះព្រោះតែការប្រែប្រួលអាកាសធាតុនេះ ស្របពេលដែលប្រទេសជាច្រើនកំពុងតែត្អូញត្អែរពីរលកកម្តៅក្តៅខ្លាំង ពិសេសនៅក្នុងតំបន់អាស៊ី។
ចុះផ្សាយនៅថ្ងៃ៖
ស្តាប់ - ០២:៥២
គម្រោងមូលនិធិសម្របខ្លួនបន្សាំនឹងអាកាសធាតុ របស់ អង្គការសហប្រជាជាតិ ប្រមូលផ្តុំច្របាច់បញ្ចូលកិច្ចការមួយផ្នែករបស់ឧត្តមស្នងការជនភៀសខ្លួន ហើយនិង មូលធិនិការពារបរិស្ថានអាកាសធាតុដើម្បីគាំពារជនរងគ្រោះព្រោះអាកាសធាតុប្រែប្រួល ដាក់ចេញកាលពីឆ្នាំ២០២១។ គម្រោងមូលនិធិថ្មីនេះ នឹងជួយដល់សហគមន៍ងាយរងគ្រោះគំរាមកំហែងព្រោះតែកំណើនកម្តៅផែនដី ដោយផ្តល់លទ្ធភាព មធ្យោបាយ ដើម្បីត្រៀមទប់ទល់ហានិភ័យ ហើយប្រឈមមុខនឹងបម្រែបម្រួលអាកាសធាតុ។
ការប្រែប្រួលអាកាធាតុ កាន់តែជះឥទ្ធិពលផលប៉ះពាល់កាន់តែខ្លាំងៗឡើង ហើយជាកត្តាចម្បងមួយ ដែលជំរុញឲ្យមានជនភៀសខ្លួន ធ្វើចំណាកស្រុក។ នេះបើតាមសេចក្តីថ្លែងការណ៍ របស់ ឧត្តមស្នងការជនភៀសខ្លួន នៃ អង្គការសហប្រជាជាតិ ដោយផ្តល់ទិន្នន័យបញ្ជាក់ថា ក្នុងឆ្នាំ២០២២កន្លងទៅ យ៉ាងហោច ជាង ៧០% នៃជនភៀសខ្លួននិងអ្នកសុំសិទ្ធិជ្រកកោន គឺមកពីប្រទេសដែលរងគ្រោះខ្លាំងព្រោះតែការប្រែប្រួលអាកាសធាតុ។
នៅតំបន់អាហ្វ្រិក ក្រៅតែវិបត្តិជម្លោះដែលបង្ខំឲ្យគេភៀសខ្លួន, ការប្រែប្រួលអាកាសធាតុ ជាហេតុចម្បងមួយជាប់ទាក់ទងដោយផ្ទាល់ ទៅនឹងការសម្រេចចិត្តផ្លាស់ទីរបស់ក្រុមជនភៀសខ្លួន។
ក្នុងតំបន់អាស៊ីវិញ ការប្រែប្រួលអាកាសធាតុប៉ះពាល់ប្រទេសជាច្រើន។ នៅប្រទេសថៃ ជួបបាតុភូតអែលនីញូ (El Niño) ធ្វើឲ្យមានរលកកម្តៅក្តៅខ្លាំង ដែលអាចប្រឈមនឹងបញ្ហាសុខភាពប្រជាជន។ នៅរាជធានីបាំងកក សប្តាហ៍នេះ កម្តៅបានហក់ឡើងដល់ ៥២ អង្សាសេ។ នៅថ្ងៃពុធ ទី២៤មេសា អាជ្ញាធរសំណូមពរឲ្យប្រជាពលរដ្ឋសម្រាកនៅក្នុងផ្ទះ បើមិនចាំបាច់ខ្លាំង កុំចេញខាងក្រៅ។
ស្រដៀងគ្នានេះដែរ នៅហ្វីលីពីន, ព្រោះតែកម្តៅក្តៅខ្លាំងពេក រដ្ឋាភិបាលទីក្រុងម៉ានីល អំពាវនាវកុំឲ្យប្រជាជនចេញក្រៅផ្ទះ ហើយគ្រិះស្ថានសិក្សា បានផ្អាកបង្រៀនដោយផ្ទាល់ មួយរយៈសិន។ នៅហ្វីលីពីន អាកាសធាតុក្តៅ៤៤-៤៥អង្សាសេ ជាប់ៗគ្នាពីរបីថ្ងៃ។ សាលារៀន ៦ ៧០០ កន្លែង ផ្អាករៀនសូត្រដោយផ្ទាល់ ហើយគ្រាន់តែនៅក្នុងរដ្ឋធានីម៉ានីល សាលារៀន ជាង ៤០០ កន្លែង ត្រូវរៀបចំបង្រៀនពីចម្ងាយ តាមប្រព័ន្ធអ៊ិនធ័រនែត កាលពីថ្ងៃពុធ។ នេះបើតាមក្រសួងអប់រំហ្វីលីពីន។
នៅបង់ក្លាដែស ជួបរលកកម្តៅក្តៅខ្លាំង ៤២ អង្សាសេ។ សប្តាហ៍មុន អាកាសធាតុនៅរដ្ឋធានីដាកកា ជាមធ្យមជាង ៣០អង្សាសេ តែសប្តាហ៍នេះ កម្តៅហក់ឡើងជាង ៤០អង្សាសេ ដែលក្តៅខ្លាំងបំផុតក្នុងប្រវត្តិសាស្ត្របង់ក្លាដែស នារយៈពេលជាង ៧០ឆ្នាំចុងក្រោយ។ បង់ក្លាដែស ដែលមានប្រជាជនភាគច្រើនកាន់សាសនាអ៊ីស្លាម បាននាំគ្នាថ្វាយបង្គំបន់ស្រន់ព្រះ នៅតាមវិហារមូស្កេ សុំឲ្យមានភ្លៀងធ្លាក់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ