របាយការណ៍អ-ស-ប៖ រយៈពេល ៥០ឆ្នាំ គ្រោះមហន្តរាយធម្មជាតិក្នុងពិភពលោកកើនឡើង ៥ដង
ចំនួនគ្រោះមហន្តរាយធម្មជាតិ នៅក្នុងពិភពលោកបានកើនឡើង ៥ដង និងបង្កការខូចខាតកាន់តែធ្ងន់ធ្ងរ ក្នុងរយៈពេល៥០ឆ្នាំចុងក្រោយនេះ។ តាមរបាយការណ៍របស់អង្គការឧតុនិយមរបស់អង្គការសហប្រជាជាតិ ដែលចេញផ្សាយនៅថ្ងៃពុធទី ១កញ្ញានេះ ចាប់ពីឆ្នាំ ១៩៧០ដល់ឆ្នាំ ២០១៩ គ្រោះមហន្តរាយធម្មជាតិកើតមានកាន់តែញឹកញាប់ និងធ្ងន់ធ្ងរ ដោយបានបង្កឲ្យមានការខាតបង់ទ្រព្យសម្បត្តិក្រាស់ក្រែល។ សព្វថ្ងៃនេះ គ្រោះមហន្តរាយធម្មជាតិ មានកាន់តែច្រើនមែន ប៉ុន្តែ សម្លាប់មនុស្សក្នុងចំនួនតិច ជាងកាលពី ៥០ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
នៅក្នុងរបាយការណ៍ដែលផ្តោតទៅលើគ្រោះមហន្តរាយធម្មជាតិ ពីឆ្នាំ ១៩៧០ ដល់ឆ្នាំ ២០១៩ ទីភ្នាក់ងារឧតុនិយមរបស់អង្គការសហប្រជាជាតិ បានរកឃើញថា ក្នុងរយៈពេល៥០ឆ្នាំចុងក្រោយនេះ គ្រោះមហន្តរាយធម្មជាតិ បានកើនឡើងចំនួន ៥ដង ចំណែក ការខូចខាតផ្នែកសេដ្ឋកិច្ចវិញ បានកើនឡើង ៧ ដង ប្រៀបធៀបនឹងទសវត្សរ៍ ឆ្នាំ ១៩៧០។
របាយការណ៍របស់អង្គការឧតុនិយមរបស់អង្គការសហប្រជាជាតិ ចេញផ្សាយ នៅចំពេលដែលកំពុងកើតមាន ភ្លើងឆេះព្រៃនៅអឺរ៉ុប នៅរដ្ឋភាគខាងលិចអាមេរិក ទឹកជំនន់នៅអាល្លឺម៉ង់ ចិន ជប៉ុន ឥណ្ឌូណេស៊ី ហើយនិងខ្យល់ព្យុះសង្ឃរា Ida ដែលកំពុងវាយបោក បង្កឲ្យមានទឹកជំជន់ នៅភាគខាងត្បូងអាមេរិក។
ដោយសារកត្តាប្រែប្រួលអាកាសធាតុ គ្រោះធម្មជាតិ ដែលបណ្តាលមកពីអាកាសធាតុ (បាតុភូតឧតុនិយម អាកាសធាតុ និងជលសាស្រ្ត) នឹងមានកាន់តែញឹកញាប់ ហើយនិងធ្ងន់ធ្ងរ នៅតាមកន្លែងជាច្រើននៅលើផែនដី។ នេះបើតាមអគ្គលេខាធិការរបស់ទីភ្នាក់ងារឧតុនិយម លោក Petteri Taalas។
តាមរបាយការណ៍ដែលពឹងផ្អែកលើទិន្នន័យរបស់មជ្ឈមណ្ឌលស្រាវជ្រាវគ្រោះមហន្តរាយធម្មជាតិនៅប្រទេសបែលហ្ស៊ិក នៅក្នុងអំឡុងទសវត្សរ៍ឆ្នាំ ១៩៧០ គ្រោះមហន្តរាយធម្មជាតិ ក្នុងពិភពលោក មានចំនួនជាង៧០០ (៧១១) ក្នុងមួយឆ្នាំៗ ប៉ុន្តែ ចាប់ពីឆ្នាំ ២០០០ ដល់ឆ្នាំ ២០០៩ ចំនួនគ្រោះធម្មជាតិ បានកើនឡើង ដល់ ជាង ៣០០០ (៣៥៣៦) ក្នុងមួយឆ្នាំ ឬគេអាចថា ក្នុង១ថ្ងៃ មានគ្រោះធម្មជាតិ ចំនួន១០ បានកើតឡើង នៅក្នុងពិភពលោក។
គ្រោះធម្មជាតិបានកើនឡើងចំនួន ៥ដង ប៉ុន្តែ វាបានសម្លាប់មនុស្សតិចជាងមុន ពី ៥ម៉ឺននាក់ ក្នុងមួយឆ្នាំ ក្នុងអំឡុងទសវត្សរ៍ឆ្នាំ ១៩៧០ មកនៅត្រឹម ២ម៉ឺននាក់ ចាប់ពីឆ្នាំ ២០០០។ នេះក៏ដោយមកពីមានវិធានការប្រុងប្រយ័ត្ន និងការដាក់ឲ្យប្រើប្រាស់ ប្រព័ន្ធប្រកាសអាសន្ន ទុកជាមុន។ ផ្ទុយទៅវិញ ការខាតបង់សេដ្ឋកិច្ចបានកើនឡើងពី ១៧៥លានក្នុងមួយឆ្នាំ នៅទសវត្សរ៍ឆ្នាំ ១៩៧០ ទៅដល់ ១៣៨០លាន នៅឆ្នាំ ២០១០។
ជាក់ស្តែង នៅក្នុងរយៈពេលតែ ៥ឆ្នាំចុងក្រោយនេះ គេរាប់ឃើញមានគ្រោះធម្មជាតិ ដល់ទៅជាង ១១០០០ ដែលបានសម្លាប់មនុស្សជាង ២លាននាក់ និងបង្កការខូចខាតសេដ្ឋកិច្ច ក្នុងតម្លៃ ជាង ៣ទ្រីលានដុល្លារ។ នៅពេល ប្រទេសកំពុងអភិវឌ្ឍ មានចំនួនមនុស្សស្លាប់ច្រើនដោយសារគ្រោះមហន្តរាយធម្មជាតិ (៩០%នៃ ២លាននាក់) ក្រុមប្រទេសអ្នកមានរងការខូចខាតសេដ្ឋកិច្ចធ្ងន់ធ្ងរ គឺស្មើនឹង ៦០%នៃការខាតបង់សរុបក្នុងពិភពលោក។
ជាមធ្យម សម្រាប់រយៈពេល សរុប ៥០ឆ្នាំចុងក្រោយនេះ គ្រោះមហន្តរាយធម្មជាតិកើតមានរៀងរាល់ថ្ងៃ នៅក្នុងពិភពលោក ដោយបានសម្លាប់មនុស្ស ១១៥នាក់ និង បង្ហិនបំផ្លាញសេដ្ឋកិច្ច ប្រមាណ ២០២លានដុល្លារ ក្នុងមួយថ្ងៃ។ គេវាយតម្លៃថា គ្រោះរាំងស្ងួត ខ្យល់ព្យុះ ទឹកជំនន់ និងអាកាសធាតុក្តៅខ្លាំង ជាមូលហេតុធ្វើឲ្យមនុស្សស្លាប់ច្រើន និងបង្កការខាតបង់ធ្ងន់ធ្ងរផ្នែកសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ