ផ្សែងពុលចេញពីភ្លើងឆេះព្រៃនៅតំបន់ភូមិភាគអាស៊ីអាគ្នេយ៍បានសម្លាប់ជីវិតមនុស្ស១០ម៉ឺននាក់
យោងតាមការស្រាវជ្រាវថ្មីមួយដែលចេញផ្សាយនៅថ្ងៃចន្ទ១៩កញ្ញានេះ បានបង្ហាញថា “ ផ្សែងពុលចេញពីភ្លើងឆេះព្រៃដ៏សម្បើមអស្ចារ្យនៅឥណ្ឌូណេស៊ីកាលពីឆ្នាំមុន បានបង្កបញ្ហាសុខភាពនិងបានបណ្តាលឲ្យមនុស្សស្លាប់ប្រមាណ១០ម៉ឺននាក់នៅក្នុងតំបន់អាស៊ីអាគ្នេយ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
យោងតាមរបាយការមួយរបស់ក្រុមអ្នកស្រាវជ្រាវនៅសកលវិទ្យាល័យ Columbia និងHarward សហរដ្ឋអាមេរិក បានបង្ហាញថា ផ្សែងពុលដែលកើតចេញពីភ្លើងឆេះព្រៃ បានសម្លាប់ជីវិតមនុស្សប្រមាណជា ៩ម៉ឺន ១៦០០នាក់នៅឥណ្ឌូណេស៊ី ហើយភាគច្រើននៅតាមតំបន់នានាដែលវាយលុកដោយផ្សែងអគ្គីភ័យ។ ការបាត់បង់ជីវិតមនុស្សដោយហេតុផ្សែងពុលនេះ មិនគ្រាន់តែនៅឥណ្ឌូណេស៊ីប៉ុណ្ណោះទេ ក៏ប៉ុន្តែ ប្រទេសជិតខាងនឹងឥណ្ឌូណេស៊ីក៏ត្រូវរងផលប៉ះពាល់ដូចគ្នា ដូចជាម៉ាឡេស៊ី មនុស្សស្លាប់មាន ៦៥០០ នាក់និង សិង្ហបូរី មានចំនួន២២០០នាក់។
ការព្យាករថ្មីនេះ មិនស្របគ្នាជាមួយនឹងស្ថិតិនានាចុងក្រោយបង្អស់របស់អាជ្ញាធរឥណ្ឌូណូស៊ីទេ ដោយករណីយមនុស្សស្លាប់ដោយផ្សែងពុល មាន តែ១៩នាក់កាលពីឆ្នាំមុន។ សូមបញ្ជាក់ថាការសិក្សាថ្មីនេះ ដែលចុះផ្សាយដោយទស្សវនាត្តីEnvironmental Research Letters ធ្វើឡើងដោយផ្អែកទៅលើទិន្ន័យដែលគេបានមកពីផ្កាយរណប។
រីឯអង្គការការពារបរិស្ថាន Greenpeace ឥណ្ឌូណេស៊ីវិញ ក៏បានធ្វើការព្រមានដល់អាជ្ញាធរឥណ្ឌូណេស៊ី ដែរថា បើឥណ្ឌូណេស៊ី គ្មានចាត់វិធានការបន្ទាន់នោះទេ នោះផ្សែងពុលដែលចេញពីភ្លើងឆេះព្រៃនឹងកាន់តែសម្លាប់ជីវិតមនុស្សយ៉ាងធ្ងន់ធ្ងរថែមទៀតពីមួយឆ្នាំទៅមួយឆ្នាំ។ អង្គការ Greenpeace ឥណ្ឌូណេស៊ី ថែមចោទប្រកាន់យ៉ាងធ្ងន់ៗទៀតថា “ ការមិនព្រមអើពើចាត់វិធានការដើម្បីលុបបំបាត់ចំនួនបាត់បង់នៃជីវិតមនុស្សនេះ គឺជាការប្រព្រឹត្តបទឧក្រឹដ្ឋមួយ។
សូមបញ្ជាក់ថា ព្រៃឈើនៅឥណ្ឌូណេស៊ីចំនួន២លាន៦សែនហិកតា ត្រូវបានឆាបឆេះហិនហោចកាលពីឆ្នាំមុនដោយ ការដុតបំផ្លាញព្រៃឈើខុសច្បាប់ដើម្បីយកដីធ្លីធ្វើជីសម្រាប់ដំណាំដាំដុះ ជាពិសេស ការបង្កើនដំណាំដូងប្រេង ដែលឥណ្ឌូណេស៊ី ជាប្រទេសផលិតទីមួយនៅលើលោក។
ម្យ៉ាងទៀត ផ្សែងក្រាស់នៃភ្លើងឆេះព្រៃ ដែលបានវាយលុកយ៉ាងខ្លាំងក្លានៅក្នុងប្រទេសជាច្រើននៃតំបន់ភូមិភាគអាស៊ីអគ្នេយ៍ បានបណ្តាលឲ្យប្រជាជនរបស់ខ្លួន រាប់សិនពាន់នាក់ ឆ្លងមេរោគតាមផ្លូវដង្ហើម រីឯ សាលារៀន ក៏ត្រូវគេ បិទទ្វារ ហើយជើងហោះហើរ ជាច្រើនក៏ត្រូវបានលុបចោល។ សូមបញ្ជាក់ថា ភ្លើងឆេះព្រៃនៅឥណ្ឌូណេស៊ី នាឆ្នាំនេះ បានកើតមានឡើង ជាអាទិ៍នៅកោះ Sumatra និង Kalimantan ក៏ប៉ុន្តែ ផលប៉ះពាល់របស់វានៅពេលនេះ មានកំរិតទាបជាងកាលពីឆ្នាំទៅមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ