ប៉ាគីស្ថានឆ្លងកាត់ខែមេសា ជាមួយនឹងទឹកភ្លៀងច្រើនបំផុតមិនធ្លាប់មាន គិតពីឆ្នាំ១៩៦១
ប៉ាគីស្ថាន – ស្របពេលដែលប្រទេសសឹងតែទាំងអស់ នៅតំបន់អាស៊ីបានឆ្លងកាត់រលកកម្តៅ ក្តៅហួតហែងក្នុងខែមេសាកន្លងទៅ នៅប៉ាគីស្ថានឯនោះ គឺទឹកភ្លៀងបានធ្លាក់យ៉ាងច្រើនសន្ធឹកមិនធ្លាប់មាន បើគិតចាប់ពីឆ្នាំ១៩៦១មក។ ជំនន់ទឹកភ្លៀង ព្រមទាំងការបាក់ដីផង បានផ្តាច់ជីវិតមនុស្ស យ៉ាងហោច១៤៤នាក់ ក្នុងខែមេសាកន្លងទៅនៅប៉ាគីស្ថាន។ ប៉ាគីស្ថានគឺជាប្រទេសក្រីក្រមួយ ដែលរងគ្រោះធ្ងន់ធ្ងរបំផុត ដោយកត្តាបម្រែបម្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៦
ខែមេសាកន្លងទៅ គឺជាខែដែលមានភ្លៀងធ្លាក់ច្រើនបំផុតមិនធ្លាប់មានទេ ក្នុងប្រវត្តិសាស្ត្រប៉ាគីស្ថាន បើគិតចាប់ពីឆ្នាំ១៩៦១មក។ យោងតាមអាជ្ញាធរឧតុនិយមប៉ាគីស្ថាន ក្នុងខែមេសា ទឹកភ្លៀងបានធ្លាក់ក្នុងកម្រិត ៥៩,៣មីលីម៉ែត្រ ខណៈដែលជាមធ្យមតាមធម្មតា គឺមានត្រឹមតែ ២២,៥មីលីម៉ែត្រ។ ខេត្តបាលីជីស្ថាន ជាប់ព្រំដែនអ៊ីរ៉ង់ ជាទីដែលទឹកភ្លៀងបានធ្លាក់ច្រើនជាងគេ លើសកម្រិតធម្មតាដល់ទៅ ៤,៥ដង។
ជំនន់ទឹកភ្លៀងក្នុងខែមេសា បានសម្លាប់ជីវិតប្រជាជនប៉ាគីស្ថានចំនួន១៤៤នាក់។ ខេត្តដែលមានមនុស្សស្លាប់ច្រើនបំផុត គឺខេត្ត Khyber Pakhtunkhwa ស្ថិតនៅភាគពាយ័ព្យ ដែលមានមនុស្សស្លាប់ ៨៤នាក់ ក្នុងនោះ៣៨នាក់ជាកុមារ។ អាជ្ញាធរប៉ាគីស្ថានកំពុងព្រួយបារម្ភជាខ្លាំង ខណៈរដូវភ្លៀងមូសុងមែនទែននៅមិនទាន់ដល់នៅឡើយនោះទេ តែភ្លៀងធ្លាក់ជន់ជោរម្លឹងទៅហើយ។ តាមធម្មតា រដូវភ្លៀងមូសុង គឺត្រូវបន្តរហូតដល់ខែកញ្ញាទើបផុត។
លោក Zaheer Ahmad Babar អ្នកនាំពាក្យអាជ្ញាធរឧតុនិយមប៉ាគីស្ថាន បានអះអាងថា កត្តាបម្រែបម្រួលអាកាសធាតុ គឺជាមូលហេតុនៅពីក្រោយបញ្ហានេះ។ ស្របពេលដែលប្រទេសផ្សេងៗទៀតក្នុងតំបន់អាស៊ី មិនថាឥណ្ឌា ភូមា ថៃ វៀតណាម ហ្វីលីពីន ដែលឆ្លងកាត់ខែមេសាដ៏ក្តៅហួតហែង សីតុណ្ហភាពនៅប៉ាគីស្ថានបែរជាធ្លាក់ចុះត្រជាក់ ត្រឹម២៣,៦៧°c ជាមធ្យម ខណៈតាមធម្មតាគឺមាន ២៤,៥៤°c។
គួរកត់សំគាល់ថា ថ្នាក់ដឹកនាំប៉ាគីស្ថាន តែងតែបរិហារថា ប្រជាជនប៉ាគីស្ថានទាំង២៤០លាននាក់ បានចូលរួមបញ្ចេញឧស្ម័នផ្ទះកញ្ចក់ មិនដល់១%ផងទេទូទាំង។ តែផ្ទុយទៅវិញ ប៉ាគីស្ថាន គឺជាអ្នករងគ្រោះ ដោយសារតែកត្តាឧតុនិយម ដែលកាន់តែកាចសាហាវ ធ្ងន់ធ្ងរខ្លាំងឡើងពីមួយឆ្នាំទៅមួយឆ្នាំ មិនថាទឹកជំនន់ និងសីតុណ្ហភាពក្តៅហួតហែង។
គួរបញ្ជាក់ថា ប៉ាគីស្ថានគឺជាប្រទេសក្រីក្រ ដែលរងគ្រោះធ្ងន់ធ្ងរដោយសារតែកត្តាបម្រែបម្រួលអាកាសធាតុ និងដោយសារតែកត្តាភូមិសាស្ត្រ។ អ្នកជំនាញបានលើកឡើងថា ប៉ាគីស្ថានរងគ្រោះខ្លាំង គឺមួយផ្នែកដោយសារតែ គ្មានហេដ្ឋរចនាសម្ព័ន្ធរឹងមាំ ដើម្បីទប់ទល់នឹងគ្រោះមហន្តរាយធម្មជាតិ ព្រមទាំងបញ្ហាគ្មានអភិបាលកិច្ចត្រឹមត្រូវពីអាជ្ញាធររដ្ឋ។ គ្រោះមហន្តរាយធម្មជាតិ មិនត្រឹមតែបានផ្តាច់ជីវិតមនុស្ស បំផ្លាញស្ពានថ្នល់ និងផ្ទះសម្បែងប្រជាជនប៉ុណ្ណោះទេ តែវាបានធ្វើឲ្យខូចខាតយ៉ាងដំណំ ដល់ភោគផលដំណាំរបស់កសិករប៉ាគីស្ថាន ដែលក្រីក្រខ្លាំងណាស់ទៅហើយ។ ទន្ទឹមពេលដែលខែមេសាឆ្នាំនេះ មានភ្លៀងធ្លាក់ខ្លាំងបំផុត តែបច្ចុប្បន្នប៉ាគីស្ថានខ្វះទឹកប្រើប្រាស់ ប្រមាណជា៣០% បើប្រៀបធៀបទៅនឹងតម្រូវការ ខណៈរដូវសាបព្រោះដំណាំស្រូវនិងកប្បាស់ ត្រូវចាប់ផ្តើម។
សូមរំលឹកថា កាលពីឆ្នាំ២០២២ ប៉ាគីស្ថានបានជួបគ្រោះមហន្តរាយទឹកជំនន់ធ្ងន់ធ្ងរបំផុតក្នុងប្រវត្តិសាស្ត្រ ដោយត្រូវទឹកជន់លិច១ភាគ៣ប្រទេស មនុស្សស្លាប់ប្រមាណ១៧០០នាក់ និងប៉ះពាល់ដោយផ្ទាល់ដល់ប្រជាជន៣៣លាននាក់។ ជិត២ឆ្នាំកន្លងមកនេះ អង្គការសហប្រជាជាតិលើកឡើងថា យ៉ាងហោចណាស់កុមារប៉ាគីស្ថាន១០លាននាក់ ដែលស្ថិតនៅតំបន់រងគ្រោះ នៅតែបន្តរស់រំពឹងលើជំនួយស្បៀងអាហារមនុស្សធម៌។ អង្គការUnicef បានទាញសញ្ញាអាសន្នថា គ្រោះមហន្តរាយធម្មជាតិ ទឹកជំនន់ គ្រោះរាំងស្ងួត គឺជាកត្តាប្រឈមយ៉ាងខ្លាំង ប៉ះពាល់ទៅលើការលូតលាស់ធំធាត់ ទាំងរូបរាងកាយនិងសតិស្មារតី របស់កុមារប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ