ដើម្បីការពារសត្វព្រៃ អាមេរិកលុបចោលបំណុលមួយផ្នែកជាមួយឥណ្ឌូណេស៊ី
រដ្ឋាភិបាលអាមេរិកបានចុះកិច្ចព្រមព្រៀងមួយសំដៅកាត់បន្ថយបំណុលប្រមាណ ១២លានដុល្លារ ដែលរដ្ឋាភិបាលឥណ្ឌូណេស៊ីជំពាក់អាមេរិក។ ជាថ្នូរមកវិញ ទីក្រុងហ្សាកាតាត្រូវបង្វែរទឹកប្រាក់ដែលត្រូវសង សម្រាប់ការពារ និងអភិរក្សសត្វព្រៃ ដែលជិតផុតពូជ នៅកោះស៊ូម៉ាត្រា។ នេះបើតាមដំណឹងផ្តល់ដោយអង្គការការពារបរិស្ថាន កាលពីថ្ងៃសុក្រ ទី ៣ តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
សម្រាប់អង្គការការពារបរិស្ថាន ការបង្វែរប្រាក់បំណុលឲ្យក្លាយជាជំនួយ នឹងជួយកោះស៊ូម៉ាត្រាក្នុងការរក្សា ការពារជីវិតសត្វព្រៃ និងប្រព័ន្ធជីវចម្រុះដែលមាននៅលើកោះមួយនេះ។ យោងតាមកិច្ចព្រមព្រៀងដែលចុះរវាងតំណាងរដ្ឋាភិបាលរបស់ប្រទេសទំាងពីរនៅសប្តាហ៍នេះ ជាជាងសងបំណុល១២លានដុល្លារ ដែលខ្លួនជំពាក់រដ្ឋាភិបាលអាមេរិក ឥណ្ឌូណេស៊ីត្រូវប្រើទឹកប្រាក់នេះ ដើម្បីឧបត្ថម្ភដល់សកម្មភាពរបស់អង្គការ សមាគមដែលធ្វើការខាងអភិរក្សជីវិតសត្វព្រៃ នៅលើកោះស៊ូម៉ាត្រា។
កោះស៊ូម៉ាត្រា ដែលមានផ្ទៃដី ទំហំស្មើ៧០ភាគរយនៃប្រទេសបារាំង ជាដែនដីកោះដែលសំបូរដោយព្រៃធម្មជាតិ សត្វរមាស និងខ្លា ដែលជិតផុតពូជពីផែនដី។
សូមបញ្ជាក់ថា អាមេរិកធ្លាប់បានចុះកិច្ចព្រមព្រៀងដូចគ្នាជាមួយឥណ្ឌូណេស៊ី កាលពីឆ្នាំ ២០០៩។ កាលណោះ ជាថ្នូរនឹងការកាត់បន្ថយប្រាក់បំណុល៣០លានដុល្លារពីសហរដ្ឋអាមេរិក រដ្ឋាភិបាលឥណ្ឌូណេស៊ីបានសន្យាចូលរួមការពារ និងបង្កើនស្រទាប់ព្រៃនៅកោះស៊ូម៉ាត្រា។
តាមលោកKristen Beaer មន្រ្តីទទួលបន្ទុកកិច្ចការនៅស្ថានទូតអាមេរិកប្រចាំឥណ្ឌូណេស៊ី អាមេរិកមានមោទនភាព នឹងធ្វើជាដៃគូជាមួយរដ្ឋាភិបាល និងអង្គការឥណ្ឌូណេស៊ី ដើម្បីការពារ អភិរក្សសត្វព្រៃ និងរុក្ខជាតិនៅលើកោះស៊ូម៉ាត្រា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ