ប្រធានាធិបតីអ៊ីរ៉ង់ទៅប៉ាគីស្ថាន ដើម្បី “ពង្រឹងសហប្រតិបត្តិការ” ឲ្យល្អឡើងវិញ
លោកអេប្រាហ៊ីម រ៉ៃស៊ី ប្រធានាធិបតីអ៊ីរ៉ង់ បានធ្វើដំណើរទៅទស្សនកិច្ចនៅរដ្ឋធានីអ៊ីស្លាម៉ាបាដ ប្រទេសប៉ាគីស្ថាន កាលពីថ្ងៃចន្ទ ទី២២មេសា។ ជាដំណើរទស្សនកិច្ច ដែលធ្វើឡើងក្នុងកម្មវត្ថុពង្រឹងទំនាក់ទំនងពាណិជ្ជកម្ម រវាងប្រទេសជិតខាងទាំង២នេះ និងជាពិសេសគឺដើម្បីស្តារចំណងសហការផ្នែកការទូត ឲ្យបានល្អប្រសើរឡើងវិញ បន្ទាប់ពីប្រទេសទាំង២ បានប្រទូស្តរាយគ្នាដោយអាវុធ កាលពីខែមករា។
ចុះផ្សាយនៅថ្ងៃ៖
ស្តាប់ - ០២:៥៧
លោកអេប្រាហ៊ីម រ៉ៃស៊ី ប្រធានាធិបតីអ៊ីរ៉ង់ បានចុះយន្តហោះដល់ទីក្រុងអ៊ីស្លាម៉ាបាដ រដ្ឋធានីប៉ាគីស្ថាន នៅព្រឹកថ្ងៃចន្ទទី២២មេសា ដោយមានមន្ត្រីជាន់ខ្ពស់អ៊ីរ៉ង់ជាច្រើននាក់អមដំណើរ។ យោងតាមក្រុមការងារខុទ្ទកាល័យលោកនាយករដ្ឋមន្ត្រីប៉ាគីស្ថាន Shehbaz Sharif ទស្សនកិច្ចរបស់ប្រធានាធិបតីអ៊ីរ៉ង់នៅប៉ាគីស្ថាន គឺដើម្បីចុះហត្ថលេខា លើកិច្ចព្រមព្រៀងសហប្រតិបត្តិការ ក្នុងច្រើនវិស័យ។
ដោយឡែក លោកស្រី Maleeha Lodhi អតីតមន្ត្រីទូតប៉ាគីស្ថាន បានលើកឡើងថា ទស្សនកិច្ចរបស់អេប្រាហ៊ីម រ៉ៃស៊ីនៅពេលនេះ គឺជាឱកាស ដើម្បីស្តារទំនាក់ទំនងការទូត រវាងប្រទេសជិតខាងទាំង២ ឲ្យល្អប្រសើរឡើងវិញ បន្ទាប់ពីជួបបញ្ហារកាំរកូសកាលពីពេលថ្មីៗ។
សូមរំលឹកថា កាលពីថ្ងៃទី១៦ខែមករា អ៊ីរ៉ង់បានបាញ់មីស៊ីល និងដ្រូនអត្តឃាត ចូលទៅក្នុងទឹកដីប៉ាគីស្ថាន ដោយអះអាងថា ដើម្បីវាយប្រហារទីតាំងលាក់ខ្លួន របស់ក្រុមភេរវកម្ម។ ប៉ាគីស្ថានបានវាយបកវិញ ២ថ្ងៃក្រោយមក ដោយអះអាងដែរថា វាយទៅលើក្រុមភេរវកម្មលាក់ខ្លួនក្នុងទឹកដីអ៊ីរ៉ង់។ ក្រោយភាពតានតឹងផ្នែកការទូតរំលងទៅអស់ជាច្រើនថ្ងៃ ទីបំផុតរដ្ឋាភិបាលទាំងសងខាង បានព្យាយាមបន្ធូបន្ថយស្ថានការណ៍ និងចាប់ផ្តើមស្វែងរកច្រកដើម្បីនិយាយគ្នា។
គួររំលឹកដែរថា អ៊ីរ៉ង់ និង ប៉ាគីស្ថានមានព្រំដែនជាប់គ្នា ត្រង់តំបន់បាលូជីស្ថាន ដែលទាំងសងខាងសុទ្ធតែមានសហគមន៍ជនជាតិបាលូជីស្ថានរស់នៅ។ ការផ្ទុះអាវុធកាលពីខែមករា បានបណ្តាលឲ្យស្លាប់មនុស្សចំនួនយ៉ាងហោច១១នាក់ ភាគច្រើនជាកុមារនិងស្ត្រី។ អ៊ីរ៉ង់និងប៉ាគីស្ថាន តែងតែចោទគ្នាទៅវិញទៅមក ថាបានបើកដៃឲ្យក្រុមភេរវកម្មលាក់ខ្លួន។ លោកស្រី Maleeha Lodhi បានពន្យល់ប្រាប់ទីភ្នាក់ងារព័ត៌មានបារាំងAFP តាមរយៈទស្សនកិច្ចនៅពេលនេះ គឺរដ្ឋាភិបាលទាំងសងខាង ចង់ស្វែងរកផ្លូវធ្វើការជាមួយគ្នា គ្រប់គ្រងបញ្ហា និងបញ្ចៀសកុំឲ្យមានរឿងកើតឡើងដូចកាលខែមករា។
ដោយឡែក លោក Qamar Cheema អ្នកជំនាញផ្នែកសន្តិសុខតំបន់ បានលើកឡើងថា ទស្សនកិច្ចរបស់លោកអេប្រាហ៊ីម រ៉ៃស៊ី នៅអ៊ីស្លាម៉ាបាដនាពេលនេះ គឺវាសំខាន់មែនហើយ ដើម្បីកាត់បន្ថយការមិនទុកចិត្តគ្នារវាងប្រទេសទាំង២។ តែអ្វីដែលសំខាន់ទៀតនោះ គឺការរៀបចំពង្រឹងទំនាក់ទំនងពាណិជ្ជកម្មរវាងប្រទេសទាំង២ ឲ្យវាមានលក្ខណៈស្តង់ដា ត្រឹមត្រូវស្របច្បាប់ និងឈានទៅទប់ស្កាត់ទំនិញគេចពន្ធឆ្លងព្រំដែន និងការជួញដូរខុសច្បាប់។
យ៉ាងណាមិញ មុននឹងឡើងយន្តហោះ លោកអេប្រាហ៊ីម រ៉ៃស៊ី បានបញ្ជាក់ថា អ៊ីរ៉ង់មានកម្មវត្ថុធ្វើឲ្យទំនាក់ទំនងពាណិជ្ជកម្មរវាងអ៊ីរ៉ង់និងប៉ាគីស្ថាន កើនទំហំដល់ ១០ពាន់លានដុល្លារក្នុងមួយឆ្នាំ ខណៈបច្ចុប្បន្នមានទំហំត្រឹមតែ២៥០០លានដុល្លារ។ បន្ថែមពីនេះទៀត មេដឹកនាំអ៊ីរ៉ង់និងប៉ាគីស្ថាន នឹងជជែកគ្នាផងដែរ អំពីគម្រោងសាងសង់បំពង់បង្ហូរឧស្ម័ន ដែលបានចាប់ផ្តើមកាលពីឆ្នាំ២០១៣ តែត្រូវអាក់ខានទៅវិញ ដោយសារតែបញ្ហានយោបាយនៅខាងប៉ាគីស្ថាន និងដោយសារតែភាគីអាមេរិកបានជំទាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ