ហ្វីលីពីននិងសហរដ្ឋអាមេរិកធ្វើសមយុទ្ធបែបប្រើកម្លាំងដណ្តើមយកដីជាប់ជម្លោះ
នៅថ្ងៃចន្ទទី ២២មេសា២០២៤នេះ យោធាហ្វីលីពីននិងអាមេរិកប្រមាណជិត១៧០០០នាក់ បានបើកធ្វើសមយុទ្ធប្រចាំឆ្នាំរួមគ្នា នៅជិតតៃវ៉ាន់ និងតំបន់ដែលជាប់ជម្លោះជាមួយចិននៃសមុទ្ទចិនខាងត្បូង។ ជាលើកទីមួយ សមយុទ្ធនេះ បានការចូលរួមពីសំណាក់បារាំងនិងសម្ព័ន្ធមិត្តអាស៊ី-អឺរ៉ុបចំនួន១៤ប្រទេសផ្សេងទៀត។
ចុះផ្សាយនៅថ្ងៃ៖
ស្តាប់ - ០៣:២៨
លំហាត់សឹកប្រចាំឆ្នាំដែលមានឈ្មោះថា បាលីកាតង់ ជាភាសាអ្នកស្រុកមានន័យ “ស្មាទល់ស្មា” ត្រូវចាប់ផ្តើមនៅថ្ងៃចន្ទទី២២មេសារហូតដល់ថ្ងៃទី១០ឧសភា នៅភាគខាងជើងនិងខាងលិចប្រទេសហ្វីលីពីន ត្រង់ជិតតំបន់ជាប់ជម្លោះនៃសមុទ្ទចិនខាងត្បូងផង និងជិតតៃវ៉ាន់ផង។ ជាសរុបមានទាហានអាមេរិកប្រមាណ១១០០០នាក់ និងទាហានហ្វីលីពីន ៥០០០នាក់ ព្រមទាំងទាហានអូស្ត្រាលីនិងបារាំងមួយចំនួនផង បានចូលរួមធ្វើសមយុទ្ធ នៅលើកនេះ។
នេះជាលើកទីមួយហើយដែលសមយុទ្ធប្រព្រឹត្តនៅក្នុងដែនទឹកឆ្ងាយហួសពីដីគោកហ្វីលីពីនដល់ទៅប្រមាណ២២គីឡូម៉ែត្រពីឆ្នេរ។ នៅឆ្នាំនេះ ក៏ជាលើកទីមួយដែរ ដែលឆ្មាំសមុទ្ទហ្វីលីពីន ធ្លាប់ប្រឈមនឹងក្រុមឆ្មាំសមុទ្ទចិន បានចូលរួមធ្វើសមយុទ្ធ ដែលមានហាត់សមប្រើកម្លាំងវាយដណ្តើមយកខេត្តប៉ាឡាវ៉ាន់ ដែលស្ថិតនៅជិតប្រជុំកូនកោះស្ព្រាតលី ក្នុងសមុទ្ទចិនខាងត្បូងជាប់ជម្លោះជាមួយប៉េកាំង។ សមយុទ្ធមួយផ្នែកទៀត នឹងប្រព្រឹត្តទៅនៅខេត្ត កាហ្កាយាន និងបាតានេស ខេត្តភាគខាងជើងបំផុតរបស់ហ្វីលីពីន ដែលមានចម្ងាយមិនដល់៣០០គីឡូម៉ែត្រទេពីតៃវ៉ាន់។ ដូចឆ្នាំទៅដែរ នាវាមួយនឹងត្រូវពន្លិចចោលនៅក្នុងមហាសាគរនៃខេត្តខាងជើងអ៊ីឡូកូសណ័រតេ។ បន្ទាប់មក ក៏មានដែរការធ្វើលំហាត់សឹកបែបសង្គ្រាមព័ត៌មាន បែបការពារសន្តិសុខផ្លូវទឹក និងការពារដែនអាកាសដោយបញ្ចូលកម្មវិធីប្រឆាំងមីស៊ីលផង។ ប៉ុន្តែទោះបីមានការពង្រាយមីស៊ីលបាញ់ពីដីទៅលើអាកាសប្រភេទSM-6 នៅលើដីហ្វីលីពីនក៏ដោយ ក៏គ្មានការសាកល្បងប្រើអាវុធមីស៊ីលនេះពេលធ្វើសមយុទ្ធដែរ។
ក្នុងឱកាសបើកសម្ពោធសមយុទ្ធ លោកឧត្តមសេនីយឯកWilliam Jurney មេបញ្ជាការកងទ័ពជើងទឹកអាមេរិកប្រចាំតំបន់ប៉ាស៊ីហ្វិក បានប្រកាសថា សមយុទ្ធមានកម្មវត្ថុបង្ហាញប្រាប់ពិភពលោកទាំងមូល និងប្រជាពលរដ្ឋហ្វីលីពីនថា កងកម្លាំងយោធាមានសមត្ថភាពប្រសើរឡើងជានិច្ច និងមិនបញ្ឈប់សកម្មភាពសហការរួមគ្នាហាត់សមទេ។ កម្លាំងសម្ព័ន្ធមិត្តកាន់តែប្រសើរ ហ្វីលីពីនកាន់តែខ្លាំង កាន់តែប្រាកដ និងកាន់តែមានសុវត្ថិភាព។ នេះបើតាមប្រសាសន៍របស់មេបញ្ជាការអាមេរិកដដែល។
ដោយមានទីតាំងភូមិសាស្ត្រនៅជិតតៃវ៉ាន់ និងជិតសមុទ្ទចិនខាងត្បូង ហ្វីលីពីនបានក្លាយជាដៃគូគន្លឹះរបស់សហរដ្ឋអាមេរិក ក្នុងប្រឈមនឹងចិនដែលមានមហិច្ឆតាពង្រីកឥទ្ធិពលកាន់តែខ្លាំងឡើងៗឥតឈប់ និងក្នុងករណីអាមេរិកមានជម្លោះជាមួយចិន។ សម្ព័ន្ធមិត្តដែលមានចំណែកក្នុងសមយុទ្ធក្នុងនាមជាអ្នកសង្កេតការណ៍មានដល់ទៅ១៤ប្រទេស មកពីអាស៊ីនិងអឺរ៉ុប។ បារាំងដែលកន្លងមកធ្លាប់ជាប្រទេសសង្កេតការណ៍ បានបញ្ជូននាវាចម្បាំងVendémiaire មកចូលរួមធ្វើសមយុទ្ធដោយសកម្ម ជាលើកទីមួយ តែត្រូវចាកចេញទៅវិញនៅពេលលំហាត់សឹកចូលដល់ដំណាក់កាលប្រយុទ្ធខ្លាំង។ ក្នុងក្របខ័ណ្ឌនៃនយោបាយពង្រឹងវត្តមាននៅអាស៊ីប៉ាស៊ីហ្វិក ចាប់ពីខែក្តៅខាងមុខទៅ បារាំងនឹងមានតំណាងយោធាប្រចាំនៅហ្វីលីពីន។
ក្រសួងការបរទេសចិន បានបញ្ចេញប្រតិកម្មចោទប្រកាន់សហរដ្ឋអាមេរិកថាកំពុងប្រទាក់ក្រឡាឱ្យមានភាពប្រឈមយោធានៅសមុទ្ទចិនខាងត្បូង និងបានស្នើសុំឱ្យភាគីហ្វីលីពីនបញ្ឈប់សកម្មភាពដើរខុសផ្លូវនេះ។ ចំណែកប្រជាពលរដ្ឋហ្វីលីពីនមួយក្រុមតូចបាននាំគ្នាធ្វើបាតុកម្មដោយលើកបដាសម្តែងក្តីព្រួយបារម្ភខ្លាចសមយុទ្ធបាលីកាតង់បញ្ឆេះឱ្យមានជម្លោះកាន់តែធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ