បញ្ជូនយុវជនសិង្ហបុរីម្នាក់ទៅតុលាការ ដោយសារបង្ហោះវីដេអូបរិហារលោកលី ក្វាន់យូ
នៅថ្ងៃអង្គារនេះ យុវជនសិង្ហបុរីម្នាក់នឹងត្រូវបញ្ជូនទៅកាន់តុលាការ ក្រោយពីយុវជននេះ បង្ហោះវីដេអូរិះគន់លោកលី ក្វាន់យូ និងសាសនាគ្រីស្ទាន នៅលើគេហទំព័រ Youtube។ បើតាមសម្ដីមន្ដ្រីប៉ូលីស យុវជនរូបនេះ អាចនឹងត្រូវចោទប្រកាន់ពីបទធ្វើឲ្យប៉ះពាល់ដល់សាសនា ការយាយីរំខាន និងការចរាចរមាតិកាបំផុសបំផុលជ្រុលនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
យុវជនសិង្ហបុរីម្នាក់អាយុ១៦ឆ្នាំ ឈ្មោះ Amos Yee ត្រូវបានចាប់ខ្លួនកាលពីថ្ងៃអាទិត្យ ទី២៩ខែមីនា។ ការចាប់ខ្លួននេះ ត្រូវបានធ្វើឡើងបន្ទាប់ពី Amos Yee បង្ហោះវីដេអូរិះគន់ស្ថាបនិកសិង្ហបុរី គឺលោក លី ក្វាន់យូ ថាជាមេដឹកនាំផ្ដាច់ការម្នាក់ និងបានផ្ចាញ់ផ្ចាលឲ្យលោក លី សៀនឡុង នាយករដ្ឋមន្ដ្រីសិង្ហបុរីបច្ចុប្បន្ន ដែលជាកូនប្រុសច្បងលោក លី ក្វាន់យូ ប្ដឹងខ្លួនទៅកាន់តុលាការថែមទៀត។
នៅក្នុងវីដេអូរយៈពេលប្រមាណ៨នាទីដដែលនេះ Amos Yee ក៏បាននិយាយមាក់ងាយដល់សាសនាគ្រីស្ទានផងដែរ។ វីដេអូរិះគន់លោក លី ក្វាន់យូ ដែល Amos Yee បានបង្ហោះនៅលើបណ្ដាញ Youtube មានអ្នកចូលមើលជាងកន្លះលាននាក់ ក្នុងរយៈពេលតែបីថ្ងៃប៉ុណ្ណោះ។ គួរជម្រាបថា វីដេអូរបស់ Amos Yee វាយប្រហារលោក លី ក្វាន់យូ បានទទួលទាំងការចូលចិត្ត និងការបរិហាររិះគន់ ហើយក្រោយមកវីដេអូនេះបានដាក់ជាឯកជន លែងបើកឲ្យមើលជាសាធារណៈដូចមុនទៀតហើយ។
នៅថ្ងៃអង្គារនេះ បើតាមមន្ដ្រីប៉ូលីស យុវជនអាយុ១៦ឆ្នាំ Amos Yee នឹងត្រូវបញ្ជូនទៅកាន់តុលាការ ដើម្បីធ្វើការចោទប្រកាន់។ បទចោទសំខាន់ៗរួមមាន ការធ្វើឲ្យប៉ះពាល់ដល់សាសនា ការយាយីរំខាន និងការចរាចរមាតិកាបំផុសបំផុលជ្រុលនិយម។ ក្រោមការចោទប្រកាន់ទាំងនេះ Amos Yee អាចនឹងត្រូវជាប់គុករហូតដល់ទៅ៣ឆ្នាំ និងការផាកពិន័យថែមទៀតផង។
គួរជម្រាបជូនថា រឿងរ៉ាវក្ដីក្ដាំនេះ កើតឡើងភ្លាមៗបន្ទាប់ពីពិធីបុណ្យសពផ្លូវរដ្ឋរបស់លោក លី ក្វាន់យូ បានបញ្ចប់ទៅកាលពីថ្ងៃអាទិត្យ ទី២៩ខែមីនា។ លោក លី ក្វាន់យូ ត្រូវបានប្រជាជនសិង្ហបុរី និងពិភពលោកទាំងមូលលើកតម្កើងថា ជាស្ថាបនិកនៃភាពរុងរឿងរបស់សិង្ហបុរី។ លោកបានទទួលមរណភាពកាលពីថ្ងៃទី២៣ខែមីនា ឆ្នាំ២០១៥ ក្នុងជន្មាយុ៩១ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ