កិច្ចព្រមព្រៀងអាកាសធាតុដ៏សំខាន់មួយទៀតត្រូវបានចុះនៅរវ៉ាន់ដា
ប្រមាណជាជិតមួយឆ្នាំក្រោយពីបានចុះកិច្ចព្រមព្រៀងអាកាសធាតុដ៏សំខាន់មួយ នៅក្នុងទីក្រុងប៉ារីស សហគមន៍អន្តរជាតិទើបនឹងបានចុះកិច្ចព្រមព្រៀងអាកាសធាតុដ៏សំខាន់មួយទៀត នៅព្រឹកថ្ងៃសៅរ៍នេះ នៅក្នុងទីក្រុងគីហ្កាលី ប្រទេសរវ៉ាន់ដា គឺកិច្ចព្រមព្រៀងកាត់បន្ថយឧស្ម័នអ៊ីដ្រូហ៊្វ្លុយអូកាបោន (Hydrofluorocabure) ដែលជាប្រភេទឧស្ម័នដ៏ចម្បងមួយ នាំឲ្យឡើងកម្តៅអាកាសធាតុ។
ចុះផ្សាយនៅថ្ងៃ៖
ស្តាប់ - ០២:០៥
អ៊ីដ្រូហ៊្វ្លុយអូកាបោន (ឬ HFC) គឺជាប្រភេទឧស្ម័នដែលគេច្រើនប្រើនៅក្នុងម៉ាស៊ីនត្រជាក់ ទូទឹកក ឬប្រភេទស្ប្រៃត៍ (Spray) មួយចំនួនផ្សេងទៀត ហើយជាប្រភេទឧស្ម័នមួយ ក្នុងចំណោមឧស្ម័នផ្ទះកញ្ចក់ ដែលជាដើមហេតុនៃការឡើងកម្តៅអាកាសធាតុ ហើយដែលកំពុងតែមានកំណើនខ្លាំងជាងគេ។
តាមការពិត ឧស្ម័ន HFC មានការកើនឡើងខ្លាំង ចាប់ពីអំឡុងឆ្នាំ១៩៩០ ក្រោយពីមានការចុះកិច្ចព្រមព្រៀងអន្តរជាតិ (ពិធីសារក្រុងម៉ុងរ៉េអាល់) ស្តីពីការការពារស្រទាប់អូហ្សូន តាមរយៈការកាត់បន្ថយការបញ្ចេញឧស្ម័ន ក្លរ៉ូហ៊្វ្លុយអូកាបោន (ឬ CFC)។ ចាប់ពីពេលនោះហើយ ដែល ឧស្ម័ន HFC ត្រូវបានគេប្រើប្រាស់យ៉ាងទូលំទូលាយ ដើម្បីជំនួសឧស្ម័ន CFC។ ក៏ប៉ុន្តែ ប៉ុន្មានឆ្នាំក្រោយមក គេរកឃើញថា ឧស្ម័ន HFC មិនបំផ្លាញស្រទាប់អូហ្សូនក៏ពិតមែន តែវាបង្កនូវផលប៉ះពាល់ធ្ងន់ធ្ងរមួយផ្សេងទៀត គឺបង្កឲ្យឡើងកម្តៅអាកាសធាតុ។
ហេតុដូច្នេះហើយបានជា ចាប់ពីឆ្នាំ២០០៩មក សហគមន៍អន្តរជាតិបានចាប់ផ្តើមបើកការចរចាសាជាថ្មី ដើម្បីធ្វើវិសោធនកម្មលើពិធីសារក្រុងម៉ូរ៉េអាល់ ហើយឈានទៅលុបបំបាត់ឧស្ម័ន HFC ក៏ប៉ុន្តែ ការចរចានេះត្រូវប្រឈមមុខនឹងបញ្ហាស្មុគស្មាញច្រើន ដោយសារតែការលុបបំបាត់ឧស្ម័ន HFC អាចបង្កផលប៉ះពាល់ទៅដល់សេដ្ឋកិច្ចរបស់បណ្តាប្រទេសមួយចំនួន រួមមានដូចជា ឥណ្ឌា ជាដើម។
ក្រោយពីឆ្លងកាត់ការចរចាយ៉ាងស្វិតស្វាញ នៅទីបំផុត សហគមន៍អន្តរជាតិបានឈានដល់ការចុះកិច្ចព្រមព្រៀង កាលពីព្រឹកមិញ ដោយបានកាតព្វកិច្ច និងកាលបរិច្ឆេទខុសគ្នា រវាងក្រុមប្រទេស ៣ប្រភេទ គឺប្រទេសអភិវឌ្ឍ ត្រូវកាត់បន្ថយការបញ្ចេញឧស្ម័ន HFC ឲ្យបាន ១០% នៅត្រឹមឆ្នាំ២០១៩ និង ៨៥% នៅត្រឹមឆ្នាំ២០៣៦។ ក្រុមប្រទេសកំពុងអភិវឌ្ឍដូចជា ចិន និងបណ្តាប្រទេសនៅអាហ្វ្រិក ត្រូវចាប់ផ្តើមរកផលិតផលជំនួសនិងកាត់បន្ថយឧស្ម័ន HFC នៅឆ្នាំ២០២៤ ដើម្បីឈានទៅកាត់បន្ថយឲ្យបាន ៨០% នៅឆ្នាំ២០៤៥។ ចំណែកក្រុមប្រទេសកំពុងអភិវឌ្ឍផ្សេងទៀត រួមមាន ឥណ្ឌា ប៉ាគីស្ថាន និងបណ្តាប្រទេសនៅឈូងសមុទ្រពែក្ស ត្រូវចាប់ផ្តើមកាត់បន្ថយ នៅឆ្នាំ២០២៨ ដើម្បីឈានទៅសម្រេចគោលដៅ កាត់បន្ថយ ៨៥% នៅឆ្នាំ២០៤៧។
បន្ថែមពីលើនេះទៅទៀត បណ្តាប្រទេសមហាអំណាចឧស្សាហកម្មចំនួន ១៦ ក្នុងនោះ រួមមានដូចជា សហរដ្ឋអាមេរិក អាល្លឺម៉ង់ បារាំង និង ជប៉ុន ជាដើម សន្យាផ្តល់ជំនួយហិរញ្ញវត្ថុដល់បណ្តាប្រទេសកំពុងអភិវឌ្ឍ ដើម្បីសម្របខ្លួនទៅនឹងការផ្លាស់ប្តូរនេះ។
យោងតាមអ្នកជំនាញអាកាសធាតុ ការលុបបំបាត់ឧស្ម័ន HFC អាចនឹងជួយកាត់បន្ថយការកើនឡើងនៃសីតុណ្ហភាពមធ្យមលើភពផែនដី បានរហូតដល់ទៅ ០,៥អង្សា នៅត្រឹមឆ្នាំ២១០០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ