អង្គការភេរវនិយមរដ្ឋអ៊ីស្លាមជីហាត បានវាយប្រហារសម្លាប់មនុស្សយ៉ាងរង្គាលជាថ្មីទៀតប្រឆាំងប្រទេសយេម៉ែន
នៅយេមែន កាលពីថ្ងៃចន្ទ២៩សីហា ភេរវជនអត្តឃាតម្នាក់ បានបើករថយន្តបង្កប់គ្រាប់បែកវាយប្រហារប្រឆាំងសំដៅទៅលើការប្រមូលផ្តុំរបស់ក្រុមទាហានយេមែនដែលទើបត្រូវបានគេជ្រើសរើសថ្មីថ្មោង។ ក្នុងពេលនេះ តុល្យការនៃជនរងគ្រោះ មានស្លាប់៦០នាក់និងរងរបួសជនចំនួន២៩នាក់ផ្សេងទៀត។ អំពើភេរវកម្មអត្តឃាតនេះ ត្រូវបានក្រុមប្រដាប់អាវុធជីហាតប្រកាសភ្លាមថា ជាស្នាដៃរបស់ពួកគេ។
ចុះផ្សាយនៅថ្ងៃ៖
ស្តាប់ - ០២:១៧
ប្រទេសយេមែនជាថ្មីម្តងទៀត ត្រូវបាន ទទួលរងដោយអំពើភេរវនិយម។ ដោយនៅព្រឹកថ្ងៃចន្ទ២៩សីហា ជនចំនួន៦០នាក់ ត្រូវបានស្លាប់និង២៩នាក់ផ្សេងទៀត ត្រូវរងរបួសនៅក្នុង អំពើភេរវកម្មអត្តឃាតមួយនៅអាដែន(Aden) ក្រុងដ៏សំខាន់ មួយនៅប៉ែកខាងត្បូងប្រទេសយេមែន។
ភេរវជនអត្តឃាត បានបំផ្ទុះគ្រាប់បែកដែលបង្កប់ក្នុងរថយន្តរបស់ខ្លួន ប្រឆាំងទៅលើពួកទាហានដែលទើបត្រូវបានគេជ្រើសរើសថ្មីៗនិងដែលកំពុងប្រមូលផ្តុំគ្នានៅចំពីមុខសាលារៀនមួយនៅច្រកចេញប៉ែកខាងជើងទីក្រុងអាដែន(Aden) ខណៈពេលដែលកងទាហានថ្មីៗនេះកំពុងបំពេញសំណុំបែបបទរបស់ពួកគេ។
បន្ទាប់ពីបានបញ្ចប់សំណុំបែបបទរួចរាល់ហើយ ពួកទាហានថ្មីៗទាំងនេះ ត្រូវទៅចូលរួមជាមួយក្រុមទាហានយេមែនចំនួន៥០០០នាក់ មុននឹងត្រូវបានទទួលការហាត់ហ្វឹកហ្វឺន ដើម្បីអាចទៅចូលរួមការប្រយុទ្ធប្រឆាំងទល់នឹងពួកឧទ្ទាមស៊ីអ៊ីត Houthis នៅភាគខាងជើងប្រទេស-នេះបើយោងតាមប្រភពយោធាយេម៉ែន។
ម្យ៉ាងទៀតយោងតាមសាកសីៗខ្លះៗ បានឲ្យដឹងថា “ឆ្លៀតពេលដែលរថយន្តកាមីញ៉ុងមួយគ្រឿង កំពុងបើកបរចូលទីធ្លាសាលារៀនដើម្បីធ្វើការចែកចាយភស្តុភា ភេរវជនអត្តឃាត បានបើកសម្រុករថយន្តបង្កប់គ្រាប់បែករបស់ខ្លួនដើម្បីវាយប្រហារប្រឆាំងទៅលើក្រុមទាហានជ្រើសរើសថ្មីៗទាំងនោះភ្លាមដែរ។ ភេរវកម្មអត្តឃាតនេះ បានសម្លាប់ជីវិតមនុស្សយ៉ាងរង្គាល។យោងតាមតុល្យាការនាខណៈនេះ មានស្លាប់ជន៦០នាក់និងរងរបួសជន២៩នាក់ផ្សេងទៀត។
ការវាយប្រហារលើកនេះ បានឆ្លុះបញ្ចាំងផងដែរ អំពីភាពលំបាកលំបិនយ៉ាងខ្លាំងរបស់អាជ្ញាធរយេមែននៅក្នុងការរៀបចំប្រព័ន្ធការពារសន្តិសុខនៅក្រុងអាដែន ក្រុងអាដែនដែលធ្លាប់ត្រូវបានប្រកាសចាត់ទុកជារដ្ឋធានីបណ្តោះអាសន្នរបស់យេមែន។
បន្ទាប់ពីអំពើភេរវកម្មនេះភ្លាម ក្រុមអង្គការភេរវនិយមនៃរដ្ឋអ៊ីស្លាម បានប្រកាសទាមទារថា ភេរវកម្មអត្តឃាតនេះ ជាស្នាដៃរបស់ក្រុមគេភ្លាម។
សូមបញ្ជាក់ថា ក្រុមអ៊ីស្លាមជីហាត បានបង្កើនអំពើភេរវកម្មនិង ការវាយប្រហារប្រឆាំងទល់នឹងកងកម្លាំងរក្សាសណ្តាប់ធ្នាប់យេមែន ក៏ព្រមទាំងបណ្តាអ្នកទទួលខុសត្រូវផ្នែកនយោបាយនៅក្រុងអាដែន ទោះបីជាមានវិធានការការពារជាច្រើនបែបនិងផែនការជាច្រើនយ៉ាងដើម្បីធានាការពារសន្តិសុខនៅក្នុងទីក្រុងក៏ដោយក្តី។ ហើយភេរវកម្មចុងក្រោយដែលប្រព្រឹត្តទៅកាលពីថ្ងៃទី២០កក្កដាមុននេះ និងដែលក៏ជាស្នាដៃរបស់ពួកអ៊ីស្លាមជីហាតនោះ បានផ្តាច់ជីវិតប៉ូលីសយេមែនចំនួន៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ