រដា្ឋភិបាល "បង្រួបបង្រួមជាតិទុយនីស៊ី” ត្រូវគេរិះគន់ថាជា ”ឆាកល្ខោននយោបាយ”
ការបង្កើត”រដ្ឋាភិបាលបង្រួបបង្រួមជាតិ” ដោយលោកនាយករដ្ឋមន្ត្រី Mohammed Ghannouchi នៅថ្ងៃចន្ទ ១៧ មករា ម្សិលមិញ ញ៉ាំងឲ្យមានការទិតៀនរិះគន់រួចស្រេចទៅហើយ រហូតដល់ទៅការប្រឆាំងទៀតផង ពីបណ្តាជនទុយនីស៊ីមួយភាគដែលបានបះបោរក្រោកឈរឡើង ដើម្បីរលាស់ខ្លួនឲ្យផុតពី “របបចាស់ “។ ទោះបីជាក្នុងសមាសភាពនៃរដ្ឋាភិបាលអន្តរកាលនេះ មានមន្ត្រីទើបលេចចេញមកពីគណបក្សប្រឆាំងឬពីសង្គមស៊ីវិលក្តីក៏ មុខតំណែងជាគន្លឹះស្ថិតនៅក្នុងកណ្តាប់ដៃនៃមន្ត្រីគណបក្សកាន់ អំណាចផ្តាច់ការ RCD របស់លោកអតីតប្រធានាធិបតី Ben Ali។ អ្នកប្រឆាំង ជាប្រវត្តិសាស្រ្តMoncef Marzouki បានបរិហារក្រាតរដ្ឋាភិបាល ថា ជា“ឆាកល្ខោននយោបាយ” ដោយហេតុនៅតែរក្សាទុករដ្ឋមន្ត្រីនៃអតីតប្រធានាធិបតីរត់ចោលស្រុក Ben Ali។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
គឺជារដ្ឋាភិបាលពុំធ្លាប់មានសោះសំរាប់ប្រទេសទុយនីស៊ី ដ្បិតជារដ្ឋាភិបាលបើកចំហសំរាប់គណបក្សនយោបាយដទៃទៀតអាចចូលរួម។អ្នកប្រឆាំងបីនាក់នឹងលោកអតីតប្រធានាធិបតីBen Ali ត្រូវបានតែងតាំងជារដ្ឋមន្ត្រី ក៏ព្រមទាំងឥស្សរជនឯករាជ្យម្ចាស់ការលេចចេញមកពីសង្គមស៊ីវិលដូចយ៉ាងលោកស្រីMoufida Tlatli ជាសមិទ្ធិការិនីភាពយន្តទុយនីស៊ីតែងតាំងជារដ្ឋមន្ត្រីក្រសួងវប្បធម៌ឬក៏អ្នកប្រឆាំងរឹងរូសតាមគេហទំព័រអាំងទែរណេត Slim Amamou ជាប់ពន្ធនាគារប៉ុន្មានថ្ងៃនៅដើមខែមករានេះ។
ប៉ុន្តែ ការបើកចំហពិតប្រាកដនិងការបង្រួបបង្រួមជាតិសន្មតឲ្យជ្រើសរើសទាំងអ្នកតំណាងគណបក្សដូចយ៉ាងគណបក្សកុម្មុយនិស្តឬអ៊ីស្លាមនិយមជ្រុល។ គឺអ្នកទាំងនេះហើយដែលបានប្រយុទ្ធតស៊ូខ្លាំងជាងគេប្រឆាំងនឹងរបបបិន អាលីប៉ុន្តែគេពុំត្រូវបានពិគ្រោះយោបល់ផង។ អ្នកប្រឆាំងជាប្រវត្តិសាស្ត្រMoncef Marzouki ចាត់ទុករដ្ឋាភិបាលនេះថាបាន”បើកចំហខុស”ឬជា”ឆាកល្ខោននយោបាយ”ដោយហេតុនៅតែរក្សាទុករដ្ឋមន្ត្រីជាច្រើននៃរបបអតីតប្រធានាធិបតី បិន អាលី។ គណបក្សRCD គឺបក្សប្រមូលផ្តុំរដ្ឋធម្មនុញ្ញប្រជាធិបតេយ្យកាន់រដ្ឋអំណាចរក្សាមុខតំណែងសំខាន់ៗជាច្រើនដូចយ៉ាងក្រសួងមហាផ្ទៃដែលនឹងមានភារកិច្ចត្រូវរៀបចំការបោះឆ្នោតក្នុងចន្លោះពេល៦ខែទៀត។
រដ្ឋាភិបាលនេះជាសញ្ញាបង្ហាញថា លោកនាយករដ្ឋមន្ត្រីធ្វើពើជាពុំដឹងពុំស្គាល់ឆន្ទៈរបស់ប្រជាជនចង់ជីកគាស់រំលើងឫសនៃអតីតរបប។ ពួកបាតុករតាមផ្លូវថ្នល់ដែលបានទទួលជ័យជំនះនិងបានបះបោរក្រោកឈរឡើងតែម្នាក់ឯងដោយគ្មានជំនួយពីគណបក្សនយោបាយនានាលែងត្រូវការបុគ្គលទាំងនេះទៀតឡើយ។ បាតុកម្មបានផ្ទុះឡើងមុនការប្រកាសរបស់រដ្ឋាភិបាលព្រមជាមួយពាក្យស្លោក”គេត្រូវតែកាច់បំបាក់គណបក្សRCD”និងការអំពាវនាវឲ្យឡោមព័ទ្ធទីស្នាក់ការរបស់គណបក្សកាន់អំណាចនេះនៅក្នុងរដ្ឋធានី។ និយាយរួម ជាជាងធ្វើឲ្យស្ងប់ចិត្តប្រជាជន រដ្ឋាភិបាលថ្មីនេះបែរជាធ្វើឲ្យខកចិត្តពួកជនដែលបានសង្ឃឹមថា នឹងបិទទំព័រចាស់ចោលដោយពិតប្រាកដ។
លោក Moncef Marzoukiនៅថ្ងៃចន្ទម្សិលមិញបានប្រកាសមុនគេឈរឈ្មោះជាបេក្ខជនប្រធានាធិបតីទុយនីស៊ី។ អ្នកប្រឆាំងនឹងរបបផ្តាច់ការបិន អាលីដែលនិរទេសខ្លួនរស់នៅប្រទេសបារាំងបានអំពាវនាវឲ្យលុបបំបាត់គ្រប់តែឧបករណ៍នៃរបបបិន អាលីនិងច្បាប់បំបាត់សេរីភាពនៃរបបនេះ។ ជាអតីតប្រធានសម្ព័ន្ធការពារសិទ្ធិមនុស្សនៅទុយនីស៊ី លោក Moncef Marzoukiបានបង្កើតគណបក្សឆ្វេងនិយមឈ្មោះសមាជដើម្បីសាធារណរដ្ឋ”CPR “នៅឆ្នាំ២០០១ដែលត្រូវបានហាមប្រាមក្រោមរបបបិនអាលី។ គាត់បានទទួលទោសជាប់គុក១ឆ្នាំនៅឆ្នាំ២០០០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ