លោកBernard Kouchnerសន្យាថានឹងបន្តប្រយុទ្ធទល់នឹងភេរវនិយម
បន្ទាប់ពីឃាតកម្មទៅលើរូប លោកMichel Germaneau នៅតំបន់Sahelខាងត្បូងវាលខ្សាច់Saharaមក លោកប្រធានាធិបតីNicolas Sarkozyបានបញ្ជូនលោកBernard Kouchnerឱ្យទៅកាន់បណ្តាប្រទេសនៅក្នុងតំបន់Sahel។លោករដ្ឋមន្ត្រី ក្រសួងការបរទេសបារាំង នៅល្ងាចថ្ងៃចន្ទម្សិលមិញ បានអញ្ជើញទៅកាន់រដ្ឋធានីនៃប្រទេសម៉ូរីតានីជាទីដែលបានជួបសន្ទនា ជាមួយលោកប្រធានាធិបតី Abdelazizនិងក្រុមអាណិកជនជាតិបារាំង។លោកBernard Kouchner នៅព្រឹកថ្ងៃអង្គារ២៧កក្កដានេះត្រូវអញ្ជើញទៅកាន់ទីក្រុងBamako នៃប្រទេសMaliមុននឹងអញ្ជើញទៅកាន់ទីក្រុងNiameyនៃប្រទេសNiger។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
លោកBernard Kouchner បាននិយាយរំលឹកអំពីប្រតិបត្តិការវាយឆ្មក់ទៅលើមូលដ្ឋានមួយរបស់អាល់-កៃដា កាលពីថ្ងៃព្រហស្បតិ៍២២កក្កដា។ គាត់បានបញ្ជាក់ប្រាប់ថា ការវាយប្រហារនេះគឺជាប្រតិបត្តិការមួយដែលកងទ័ពម៉ូរីតានីបានគ្រោងទុកជាយូរមកហើយនិងដែលប្រទេសបារាំងបានរួមចំណែកនៅក្នុងក្របខ័ណ្ឌនៃកិច្ចព្រមព្រៀងសហប្រតិបត្តិការនិងនៅក្នុងក្តីសង្ឃឹមរកឃើញលោកMichel Germaneauឡើងវិញ។ គឺជាការប៉ុនប៉ងចុងក្រោយបង្អស់ ពីព្រោះស្របតាមលោកBernard Kouchner ការគ្មានទំនាក់ទំនងអ្វីសោះជាមួយពួកអ្នកចាប់ពង្រត់គាត់នាំឲ្យគិតថាចំណាប់ខ្មាំងសឹងតែត្រូវបានគេកាត់ទោសរួចស្រេចទៅហើយ។
“ការធ្វើប្រតិបត្តិការសឹកពុំមានន័យថា ប្រទេសបារាំងបានផ្លាស់ប្តូរយុទ្ធសាស្ត្រនិងលះបង់ការចរចានោះឡើយ”។ នេះជាការបញ្ជាក់ប្រាប់របស់លោករដ្ឋមន្ត្រី ប៉ុន្តែក្នុងករណីនេះ គ្មានទំនាក់ទំនងអ្វីមួយអាចត្រូវធ្វើជាមួយពួកអ្នកចាប់ពង្រត់បានឡើយ។ “ខ្ញុំពុំដឹងជា លោកMichel Germaneauត្រូវបានគេសម្លាប់ទុកជាការសងសឹកឬក៏គាត់បានស្លាប់មុនហ្នឹងទៅទៀតផង”។ នេះជាការគូសបញ្ជាក់របស់លោកប្រមុខការទូតបារាំងដែលបានប្រាប់ឲ្យដឹងថាលោកប្រធានាធិបតីម៉ូរីតានីគិតថា គាត់បានស្លាប់មុនហ្នឹងទៅទៀត។
ដូច្នេះគឺជា”សារគាំទ្រនិងប្តេជ្ញាចិត្ត”ដែលលោករដ្ឋមន្ត្រីបារាំងបាននាំមកដោយសរសើរប្រទេសម៉ូរីតានីចំពោះ”ការខំប្រឹងប្រែងនិងជោគជ័យរបស់ខ្លួនក្នុងការប្រយុទ្ធទល់នឹងជំនឿផ្កាប់មុខ" ម្យ៉ាងទៀតគាត់បានប្រកាសឲ្យដឹងថាប្រទេសបារាំងនឹងពង្រឹងសហប្រតិបត្តិការយោធារបស់ខ្លួនជាមួយប្រទេសម៉ូរីតានី។
ដោយថ្លែងទៅកាន់ក្រុមអាណិកជនបារាំង លោកBernard Kouchner បានអំពាវនាវគេសូមឲ្យមានស្មារតីប្រុងប្រយ័ត្នវាងវៃខ្លាំងបំផុត ប៉ុន្តែសូមកុំធ្លាក់ដល់ថ្នាក់ភ័យព្រួយចិត្តតក់ស្លុត។ "ក្នុងរយៈពេលប៉ុន្មានខែទៀតដែលខ្ញុំពុំដឹងជាប៉ុន្មានទេ ដែលប្រាកដជានឹងពិបាកខ្លាំង ពីព្រោះក្តីប្តេជ្ញាចិត្តរបស់ប្រទេសម៉ូរីតានីនឹងផ្តល់ផ្លែផ្ការបស់ខ្លួន ពីព្រោះប្រទេសនេះនឹងបង្ហាញផ្លូវឲ្យប្រទេសដទៃទៀតធ្វើតាមខ្លួន”។ នេះជាការពោលបន្ថែមរបស់លោក Bernard Kouchner ។ បន្ទាប់ពីបានពិសាបាយល្ងាចជាមួយលោកប្រធានាធិបតីAbdelaziz លោកBernard Kouchner បានអញ្ជើញទៅកាន់ទីក្រុងបាម៉ាកូជាទីដែលនៅថ្ងៃទី២៧កក្កដានេះគាត់នឹងជួបសន្ទនាជាមួយលោកប្រធានាធិបតីនៃប្រទេសម៉ាលីAmadou Tourmani Touré៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ