អាហ្វ្រិកខាងត្បូង៖ ស្លាប់យ៉ាងហោច៧៤នាក់ក្នុងគ្រោះអគ្គិភ័យកណ្តាលរដ្ឋធានី
បើតាមតួលេខចុងក្រោយផ្តល់ដោយអាជ្ញាធរ អគ្គិភ័យបានផ្តាច់ជីវិតមនុស្សអស់យ៉ាងហោច៧៤នាក់ ក្នុងនោះ១២នាក់ជាកូនក្មេង។ ជាគ្រោះអគ្គិភ័យដ៏សន្ធោសន្ធៅឆាបឆេះអគារស្នាក់នៅរខេករខាកមួយកណ្តាលរដ្ឋធានីសេដ្ឋកិច្ចរបស់ប្រទេសអាហ្វ្រិកខាងត្បូង នាពេលកណ្តាលអាធ្រាត្រយប់ថ្ងៃពុធឆ្លងមកថ្ងៃព្រហស្បតិ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ក្រុមសង្គ្រោះបានរកឃើញសាកសពស្ត្រី២៤នាក់ បុរស៤០នាក់ និង១០ផ្សេងទៀតមិនអាចកំណត់ភេទបានព្រោះឆេះខ្លោចខ្លាំងពេក ព្រមទាំងសាកសពក្មេងយ៉ាងហោច១២នាក់។ អ្នករងរបួសប្រមាណ៦០នាក់ផ្សេងទៀត ត្រូវបានបញ្ជូនទៅព្យាបាលនៅតាមមន្ទីរពេទ្យនានាក្នុងតំបន់។ ចំណែកប្រតិបត្តិការសង្គ្រោះនិងរុករក បានបិទបញ្ចប់នៅយប់ថ្ងៃព្រហស្បតិ៍ម្សិលមិញ។
ប្រធានាធិបតីអាហ្វ្រិកខាងត្បូងលោក Cyril Ramaphosa បានអញ្ជើញទៅដល់កន្លែងកើតហេតុផ្ទាល់និងបានចាត់ទុកគ្រោះអគ្គិភ័យនេះថាជាសោកនាដកម្មដ៏ធំដែលសម្លាប់ជីវិតមនុស្សដ៏ច្រើនជាងគេបំផុត ក្នុងចំណោមគ្រោះអគ្គិភ័យដ៏កំណាចនៅលើពិភពលោកសម្រាប់រយៈពេល២០ឆ្នាំចុងក្រោយនេះ។ ក្នុងទឹកមុខក្រៀមក្រំ លោកប្រធានាធិបតីបានសន្យាចាប់យកវិបត្តិលំនៅដ្ឋានមកដោះស្រាយ។ នៅចំពោះមុខសោកនាដកម្មបែបនេះ លោកអគ្គលេខាធិការអង្គការសហប្រជាជាតិ បានស្នើបញ្ជូនក្រុមការងារទៅសហការជាមួយអាជ្ញាធរដើម្បីការពារកុំឱ្យមានគ្រោះអគ្គិភ័យបែបនេះទៀត។
សូមបញ្ជាក់ថា បើតាមអ្នកទទួលខុសត្រូវម្នាក់ ភ្លើងទៀនឬប្រដាប់បំភ្លឺបន្ថែម ទំនងជាដើមហេតុនាំឱ្យមានអគ្គិភ័យឆាបឆេះអគារស្នាក់នៅ ជាកម្មសិទ្ធិក្រុង ដែលមានបួនជាន់ និងដែលមានអ្នកចូលមករស់នៅដោយខុសច្បាប់។ សង្កាត់នេះធ្លាប់ជាទីប្រជុំពាណិជ្ជកម្មដ៏ធំក្នុងសម័យរើសអើងប្រកាន់ពណ៌សម្បុរApartheid តែលែងមានសកម្មភាព និងក្លាយជាសង្កាត់ដ៏សែនគ្រោះថ្នាក់ដែលមានអត្រាឧក្រិដ្ឋកម្មខ្ពស់បំផុតមួយនៅលើពិភពលោក នាពេលបច្ចុប្បន្ន។ អគារស្នាក់នៅជាច្រើនត្រូវបានគេបោះបង់ចោល ចាស់រខេករខាក គ្មានប្រព័ន្ធអគ្គិសនីត្រឹមត្រូវ ហើយច្រើនធ្លាក់ក្នុងដៃក្រុមអ្នកឈ្មួញជួលផ្ទះទុច្ចរិត។ ដើម្បីសុវត្ថិភាព អគារស្នាក់នៅនីមួយៗមានបំពាក់ទៅដោយចំរ៉ឹងដែកជាច្រើន។ ជាក់ស្តែងអគាររងអគ្គិភ័យម្សិលមិញនេះ មានចំរ៉ឹងដែកឃាំងគ្រប់ជាន់ បិទចាក់សោរជាច្រើនជុំ ការពារកុំឱ្យមនុស្សក្រៅចូល តែបានរារាំងមិនឱ្យពលរដ្ឋស្លន់ស្លោររត់គេចពីភ្លើងឆេះកណ្តាលអាធ្រាត្របានទេ។ បើតាមសាក្សី ក្រោយភ្លើងអគ្គិភ័យរលត់គេឃើញសាកសពជាច្រើនស្លាប់គគ្នានៅក្រោយចំរ៉ឹងដែក។ ខ្លះទៀតបានឃើញគេគប់ទារកតាមបង្អួចដើម្បីគេចពីអណ្តាតភ្លើង។
អ្នកស្នាក់នៅក្នុងអគារនេះច្រើនជាជនបរទេស។ មានសេដ្ឋកិច្ចខ្លាំងនិងជាប្រទេសឧស្សាហកម្មធំជាងគេនៅលើទ្វីប អាហ្វ្រិកខាងត្បូងទាក់ទាញអន្តោប្រវេសន៍រាប់លាននាក់មកពីគ្រប់ប្រទេសនៅអាហ្វ្រិក ហើយភាគច្រើនជាអន្តោប្រវេសន៍ខុសច្បាប់។ កាលពីឆ្នាំ២០១៩ អាជ្ញាធរក្រុងបានចូលឆែកឆេរតាមអគារស្នាក់នៅនិងចាប់ខ្លួនអន្តោប្រវេសន៍បរទេសជាង១៤០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ