OMS/WHO ៖ មនុស្សជិត១៣ម៉ឺននាក់នៅតំបន់ស្នែងអាហ្វ្រិក កំពុងប្រឈមនឹងការស្លាប់ដោយដាច់ពោះ
ប្រជាជនប្រមាណ៤៨លាននាក់ នៅតាមប្រទេសមួយចំនួន ក្នុងតំបន់ស្នែងអាហ្វ្រិក កំពុងតែប្រឈមខ្លាំងបំផុតនឹងគ្រោះអត់ឃ្លាន។ យោងតាមអង្គការសុខភាពពិភពលោក យ៉ាងហោចណាស់ មានមនុស្សចំនួន១២៩០០០នាក់ ដែលកំពុងប្រឈមនឹងការស្លាប់ ដោយដាច់ពោះគ្មានអ្វីបរិភោគ។ គ្រោះរាំងស្ងួតដ៏ធ្ងន់ធ្ងរ ប៉ុន្មានឆ្នាំជាប់គ្នាមកនេះ បានប៉ះពាល់យ៉ាងខ្លាំង ដល់សន្តិសុខស្បៀងអាហារ របស់ប្រជាជននៅតំបន់ដ៏ក្រីក្រមួយនេះ។
ចុះផ្សាយនៅថ្ងៃ៖
ស្តាប់ - ០២:៣៦
ថ្លែងតាមប្រព័ន្ធវីដេអូខុនហ្វឺរិនស៍ ពីទីក្រុងណៃរ៉ូប៊ី នៅថ្ងៃសុក្រទី១០មីនា លោកស្រី Liesbeth Aelbrecht តំណាងអង្គការសុខភាពពិភពលោក ប្រចាំតំបន់ស្នែងអាហ្វ្រិក បានទាញសញ្ញាអាសន្នថា បច្ចុប្បន្នេះ ប្រជាជននៅតំបន់នេះ កំពុងតែប្រឈមនឹងបញ្ហាសុខភាពដ៏ធ្ងន់ធ្ងរបំផុត។ ប្រទេសទាំងនេះ មានដូចជា សូម៉ាលី ជីប៊ូទី អេត្យ៉ូពី កេនយ៉ា ស៊ូដង់ខាងត្បូង ស៊ូដង់ និងអ៊ូហ្កង់ដាជាដើម។ កុមារនៅតាមប្រទេសទាំងនេះ កំពុងតែរងគ្រោះដោយជំងឺឆ្លងគ្រប់មុខ ព្រមទាំងបញ្ហាខ្វះអាហារូបត្ថម្ភ ដ៏ធ្ងន់ធ្ងរបំផុត។
យោងតាមអង្គការសុខភាពពិភពលោក យ៉ាងហោចណាស់ មានមនុស្សចំនួន ៤៨លាននាក់ នៅក្នុងតំបន់ស្នែងអាហ្វ្រិក ដែលកំពុងតែប្រឈមនឹងគ្រោះអត់ឃ្លាន ដ៏គួរឲ្យព្រួយបារម្ភ។ ក្នុងចំណោមនេះ មាន៦លាននាក់ ដែលស្ថិតនៅក្នុងស្ថានភាពអាសន្ន កម្រិតទី៤ ហើយប្រមាណ ១២៩០០០នាក់ស្ថិតនៅក្នុងកម្រិតទី៥ ដែលស្ថានភាពអាសន្នខ្លាំងបំផុត ប្រឈមនឹងសេចក្តីស្លាប់ដោយដាច់ពោះគ្មានអ្វីបរិភោគ។ ក្នុងចំណោមមនុស្សដែលរងចាំសេចក្តីស្លាប់ដោយដាច់ពោះនេះ គឺមានប្រមាណ៣៣០០០នាក់ នៅស៊ូដង់ខាងត្បូង និង ៩៦០០០នាក់នៅសូម៉ាលី។
គួរបញ្ជាក់ថា យោងតាមមជ្ឈមណ្ឌលព្យាករណ៍អាកាសធាតុ ប្រចាំតំបន់អាហ្វ្រិកខាងកើត ICPAC គឺបច្ចុប្បន្ននេះ តំបន់ស្នែងអាហ្វ្រិក កំពុងតែជួបគ្រោះរាំងស្ងួតធ្ងន់ធ្ងរខ្លាំងជាងកាលពីឆ្នាំ២០១១ទៅទៀត។ គ្រោះរាំងស្ងួត ឆ្នាំ២០១១ ដែលបានសម្លាប់ជីវិតមនុស្សជាច្រើនពាន់នាក់ ដោយសារតែគ្មានអ្វីបរិភោគ។ តំបន់នេះ គឺជាតំបន់ដែលរងគ្រោះខ្លាំងបំផុត ដោយបម្រែបម្រួលអាកាសធាតុ។
រដូវភ្លៀង៥ឆ្នាំជាប់គ្នាមកហើយ ដែលគ្មានភ្លៀងធ្លាក់សោះ ហើយផ្តាច់ជីវិតសត្វពាហនៈរាប់លានក្បាល ព្រមទាំងបានបំផ្លាញផលដំណាំរបស់ប្រជាជន។ ជាមួយនឹងកំដៅស្ងួតហួតហែងនេះ វាបានបង្ខំឲ្យប្រជាជនធ្វើដំណើរចាកចេញពីភូមិស្រុក ដើម្បីទៅរកទីដែលមានទឹក និងស្វែងរកអាហារបរិភោគ។ ក្រៅពីបញ្ហាចំណីគ្មានចំណីអាហារ ប្រជាជនតំបន់នេះ កំពុងតែឆ្លងកាត់នូវជង្ងឺដង្កាត់កាចសាហាវ ជាច្រើនមុខ ដូចជាជំងឺគ្រុនឈាម គ្រុនចាញ់ ជំងឺកញ្ជ្រិល និងអាសន្នរោគជាដើម។ អង្គការសុខភាពពិភពលោក បានអំពាវនាវប្រមូលថវិកាឲ្យបានយ៉ាងហោច ១៧៨លានដុល្លារ ដើម្បីជួយប្រជាជននៅតំបន់នេះ សម្រាប់ឆ្នាំ២០២៣នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ