សន្និសីទ COP២៧ បន្តជជែកយ៉ាងតឹងមាត់អំពី កម្មវត្ថុនិងហិរញ្ញវត្ថុអាកាសធាតុ
សន្និសីទអាកាសធាតុCOP២៧ បានប្រព្រឹត្តទៅអស់ពេញមួយសប្តាហ៍ហើយ ប៉ុន្តែកិច្ចពិភាក្សារវាងក្រុមប្រទេសអ្នកមាន ដែលជាអ្នកមានទំនួលខុសត្រូវធ្វើឱ្យឡើងកម្តៅអាកាសធាតុ និងប្រទេសក្រីក្រដែលទាមទារសុំជំនួយហិរញ្ញវត្ថុ សម្រាប់ប្រឈមនឹងផលវិបាក ហាក់គ្មានសញ្ញានៃការស្រុះស្រួលគ្នាសោះ។ បើទោះបីជាគ្រប់គ្នាសម្គាល់ឃើញអំពីភាពបន្ទាន់នៃការបន្ថយការបញ្ចេញឧស្ម័នផ្ទះកញ្ចក់ក៏ដោយ ក៏ការខ្វែងគំនិតនៅតែមិនរួមតូច។
ចុះផ្សាយនៅថ្ងៃ៖ កែប្រែថ្ងៃទី៖
សប្តាហ៍ទីមួយបានកន្លងផុត ដោយគ្មានឃើញចេញសេចក្តីប្រកាសអ្វីធំដុំទេ។ ម្នាក់ៗហាក់កំពុងទល់ភ្នែកចាំមើលគ្នាទៅវិញ ដោយគិតថាបានធ្វើចំណែករបស់ខ្លួនហើយ។ នេះបើតាមទស្សនៈរបស់លោក Pierre Canet នៃអង្គការក្រៅរដ្ឋាភិបាល WWF។
ក្នុងសន្និសីទអាកាសធាតុCOP២៦ នៅGlasgow កាលពីមួយឆ្នាំមុន ប្រទេសជាសមាជិកអង្គការសហប្រជាជាតិប្រមាណ២០០ បានប្តេជ្ញាគោរពកិច្ចព្រមព្រៀងអាកាសធាតុក្រុងប៉ារីស ឆ្នាំ២០១៥ ដែលចង់កំរិតការឡើងកម្តៅអាកាសធាតុនៅឆ្នាំ២១០០ បើអាចត្រឹម១,៥អង្សា បើប្រៀបធៀបទៅនឹងសម័យមុនឧស្សាហកម្ម ដោយសន្យាដំឡើងកម្មវត្ថុកាត់បន្ថយការបញ្ចេញឧស្ម័នផ្ទះកញ្ចក់ នៅក្នុងCOP២៧។ ប៉ុន្តែមានតែប្រមាណ៣០ប្រទេសបានធ្វើតាមសន្យា ហើយបើតាមអ្នកសង្កេតការណ៍ជាច្រើនផ្សេងទៀត ចិននិងអារ៉ាប៊ីសាអូឌីត បានបង្ហាញគំនិតស្ទាក់ស្ទើរ (ជុំវិញកម្មវត្ថុកំរិតការឡើងកម្តៅអាកាសធាតុក្រោម២អង្សា និងបើអាចត្រឹម១,៥អង្សា) ដែលធ្លាប់បញ្ជាក់ពីមុនៗ ឱ្យមានចែងក្នុងសេចក្តីថ្លែងការណ៍បង្ហើយទៀតផង។
ចំណែកក្រុមប្រទេសកំពុងអភិវឌ្ឍន៍និងប្រទេសកូនកោះក្នុងប៉ាស៊ីហ្វិកវិញ បានទាមទារឱ្យ ក្រុមប្រទេសអ្នកមានដែលមិនគោរពពាក្យសន្យាផ្តល់ប្រាក់១០០ពាន់លានដុល្លារក្នុងមួយឆ្នាំ សម្រាប់ជួយកាត់បន្ថយការបញ្ចេញឧស្ម័នកាបូនិក និងសម្របប្រទេសនៅនឹងផលប៉ះពាល់អាកាសធាតុ ត្រូវការប្រាក់ច្រើនថែមទៀត។ ពួកគេបានសុំឱ្យបង្កើតយន្តការពិសេសមួយទៀត សម្រាប់សងនឹងការបាត់បង់និងខូចខាត កន្លងមក។ ប៉ុន្តែក្រុមប្រទេសអ្នកមានមិនត្រូវការឮទេ។
ប្រេសិតពិសេសអាមេរិកទទួលបន្ទុកអាកាសធាតុ លោក ចនឃែរី បានបញ្ជាក់ថាប្រទេសជាច្រើនមិនចង់ត្រលប់ថយក្រោយទេ និងមិនព្រមឱ្យមានរចនាសម្ព័ន្ធស្របច្បាប់ណាមួយពាក់ព័ន្ធនឹងការផ្តល់ប្រាក់សំណងឬជំងឺចិត្តជាដាច់ខាត។ អាមេរិកត្រៀមខ្លួនចរចារកវិធីសម្រួលការផ្តល់ហិរញ្ញវត្ថុដែលអាចបន្តដល់ឆ្នាំ២០២៤។ ឯខាងអឺរ៉ុបថា បង្កើតយន្តការផ្តល់ហិរញ្ញវត្ថុមិនមែនជាដំណោះស្រាយល្អ ព្រោះមានមូលនិធិបៃតងរួចហើយ។
ក្រុមប្រតិភូត្រូវចាប់ពិភាក្សាជម្រុះភាពខ្វែងគំនិតគ្នាចាប់ពីថ្ងៃអង្គារស្អែកទៅ ដោយសង្ឃឹមថានឹងអាចអនុម័តសេចក្តីថ្លែងការណ៍ចុងក្រោយបាន នៅថ្ងៃសុក្រ ដែលជាថ្ងៃចុងក្រោយរបស់សន្និសីទ។ ប៉ុន្តែ សេចក្តីសម្រេច ត្រូវធ្វើឡើងដោយការស្រុះស្រួលគ្នាទាំងស្រុង ដូច្នេះប្រទេសតែមួយក៏អាចរារាំងការអនុម័តបានដែរ។ កាលពីឆ្នាំទៅ ការទាមទារនៅទីចុងក្រោយរបស់ចិននិងឥណ្ឌា បានរុញឱ្យសន្និសីទត្រូវអូសបន្លាយពេលទម្រាំត្រូវគ្នាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ