ប្រមុខការទូតអាមេរិក ទៅអាហ្វ្រិក បន្សាបឥទ្ធិពលរុស្ស៊ីនិងចិន
បន្ទាប់ពីអាស៊ី រដ្ឋមន្ត្រីការបរទេសអាមេរិក លោក អង់តូនី ប្ល៊ីងកិន បានអញ្ជើញទៅដល់អាហ្វ្រិក។ ថ្ងៃអាទិត្យ ប្រមុខការទូតអាមេរិក បានទៅដល់ អាហ្វ្រិកខាងត្បូង ដែលជាប្រទេសមានសេដ្ឋកិច្ចអភិវឌ្ឍជឿនលឿនមួយនៅទ្វីបអាហ្វ្រិក។ បន្ទាប់ពីប្រទេសនេះ លោកនឹងបន្តទៅប្រទេសពីរថែមទៀត។ នេះជាលើកទី២ហើយ ដែលលោក អង់តូនី ប្ល៊ីងកិន បានទៅជាន់ទឹកដីអាហ្វ្រិកក្នុងឋានៈជារដ្ឋមន្ត្រីការបរទេសអាមេរិក ហើយក៏ត្រូវគេមើលឃើញថា ដើម្បីបន្សាបឥទ្ធិពលរុស្ស៊ីនិងចិន។
ចុះផ្សាយនៅថ្ងៃ៖
ស្តាប់ - ០២:៣៣
នៅថ្ងៃចន្ទ រដ្ឋមន្ត្រីការបរទេសនៃប្រទេសទាំងពីរ អាមេរិក-អាហ្វ្រិកខាងត្បូង នឹងជួបសំណេះសំណាលគ្នា ជុំវិញយុទ្ធសាស្ត្ររបស់រដ្ឋាភិបាលសហរដ្ឋអាមេរិកនៅអាហ្វ្រិក។ ការជជែកពិភាក្សានេះក៏នឹងផ្តោតដែរទៅលើការវិវត្តថ្មីៗ និងស្ថានភាពបច្ចុប្បន្នភាពនៃវិបត្តិភូមិសាស្ត្រដែលកំពុងតែអូសបន្លាយ។ នេះបើតាមសេចក្តីថ្លែងការណ៍របស់រដ្ឋាភិបាលអាហ្វ្រិកខាងត្បូង។
ពីចំណែកភាគីអាមេរិក, ប្រមុខការទូតទាំងពីរប្រទេសនឹងលើកឡើងពីបញ្ហាអាកាសធាតុ ពាណិជ្ជកម្ម សុខភាព និងសន្តិសុខស្បៀង។ ក្រសួងការបរទេសអាមេរិក ធ្លាប់បានប្រកាសតាំងពីចុងខែកក្កដាមក ថាដំណើរទស្សនកិច្ចរបស់លោក អង់តូនី ប្ល៊ីងកិន នឹងបង្ហាញបណ្តារដ្ឋអាហ្វ្រិកឲ្យឃើញថាប្រទេសអាហ្វ្រិកមានតួនាទីស្នូលសំខាន់ និងជាដៃគូដ៏ចាំបាច់នៅក្នុងសតវត្សថ្មី ក្នុងការផ្សព្វផ្សាយពីប្រព័ន្ធអន្តរជាតិដែលបើកចំហនិងមានស្ថិរភាព ហើយក៏ជាដៃគូសម្រាប់ប្រយុទ្ធប្រឆាំងនឹងការកើនកម្តៅផែនដី បញ្ហាអសន្តិសុខស្បៀង និងបញ្ហាវិបត្តិជំងឺឆ្លងសកល ជាដើម។
នេះជាលើកទី២ហើយ តាំងពីចូលកាន់តំណែង ដែលលោក អង់តូនី ប្ល៊ីងកិន បានទៅអាហ្វ្រិក។ កាលពីជើងមុន ក្នុងខែវិច្ឆិកា២០២១ លោកបានទៅជាន់ដីកេនយ៉ា នីហ្សេរីយ៉ា និងសេណេហ្កាល។ ទស្សនកិច្ចលើកមុននោះ គឺផ្តោតសំខាន់រឿងបន្សាបឥទ្ធិពលចិននៅអាហ្វ្រិក ពីព្រោះថា របៀបរកស៊ីរបស់ចិននៅទីនោះ គឺទាក់ចិត្តបណ្តារដ្ឋអាហ្វ្រិកជាច្រើនណាស់ ព្រោះចិនគ្មានដាក់លក្ខខណ្ឌប្រជាធិបតេយ្យ ឬសិទ្ធិមនុស្សអ្វីទេ។ នៅក្នុងទស្សនកិច្ចការលើកនេះទៀត គឺដើម្បីបំណងធំមួយទៀត បន្សាបឥទ្ធិពលរុស្ស៊ីនៅអាហ្វ្រិក។
អ្វីដែលគេត្រូវកត់សម្គាល់ គឺថា ដំណើរទស្សនកិច្ចមួយជុំអាហ្វ្រិករបស់ប្រមុខការទូតសហរដ្ឋអាមេរិក ក្នុងខែសីហានេះ គឺធ្វើឡើងបន្ទាប់ពីរដ្ឋមន្ត្រីការបរទេសរុស្ស៊ី Sergueï Lavrov បានមកជាន់ដីអាហ្វ្រិកកាលពីខែកក្កដាកន្លងទៅ។ គួរជ្រាបថា តាំងពីផ្ទុះសង្គ្រាមរុស្ស៊ីឈ្លានពានអ៊ុយក្រែន នៅថ្ងៃទី២៤កុម្ភៈមក ប្រទេសអាហ្វ្រិកខាងត្បូង ប្រកាន់ជំហរកណ្តាល មិនថ្កោលទោសរុស្ស៊ី និងមិនកាន់ជើងអ៊ុយក្រែន។
តាមគម្រោង នៅពេលបញ្ចប់ទស្សនកិច្ចនៅអាហ្វ្រិកខាងត្បូង រដ្ឋមន្ត្រីការបរទេសអាមេរិក លោក អង់តូនី ប្ល៊ីងកិន នឹងអញ្ជើញបន្តទៅសាធារណរដ្ឋប្រជាធិបតេយ្យកុងហ្គោ និងចេញជាបន្តទៅ Rwanda៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ