សកម្មជនបរិស្ថានអាហ្វ្រិកខាងត្បូងធ្វើបាតុកម្មប្រឆាំងនឹងការរុករកប្រេង
នៅអាហ្វ្រិកខាងត្បូង កាលពីថ្ងៃអាទិត្យ ទី៥ធ្នូម្សិលមិញ ក្រុមអ្នកការពារបរិស្ថានរាប់រយនាក់បានចេញធ្វើបាតុកម្មប្រឆាំងនឹងការរុករកប្រេងនិងឧស្ម័នដោយក្រុមហ៊ុនថាមពលយក្សស្ហ៊ែល (Shell )។ សកម្មជនបរិស្ថាននិយាយថាសកម្មភាពរបស់ក្រុមហ៊ុនស្ហ៊ែលនៅឈូងសមុទ្រអាហ្វ្រិកខាងត្បូងនឹងធ្វើឲ្យប៉ះពាល់ដល់ជីវិតសត្វសមុទ្រ ហើយអាចជះផលប៉ះពាល់ធ្ងន់ធ្ងរខ្លាំងដល់សហគមន៍ដែលរស់នៅពឹងអាស្រ័យលើសមុទ្រ។
ចុះផ្សាយនៅថ្ងៃ៖
ប្រជាជននិងសកម្មជនបរិស្ថានអាហ្រ្វិកខាងត្បូងកំពុងតែបង្កើនការតវ៉ាប្រឆាំងនឹងក្រុមហ៊ុនប្រេងស្ហ៊ែល។ ពួកគេ បានធ្វើដំណើរតាមដងផ្លូវ និងឆ្នេរជាច្រើនកន្លែងក្នុងបំណងរារាំងសកម្មភាពធ្វើតេស្តដីរបស់ក្រុមហ៊ុនដើម្បីឈានទៅកំណត់ទីតាំងសម្រាប់ខួងយកឧស្ម័ននៅតំបន់ឆ្នេរព្រៃ (Wild Coast) ភាគខាងកើតទីក្រុងកំពង់ផែខេប (Cape) របស់អាហ្វ្រិកខាងត្បូង។
ក្នុងទីក្រុងខេបកាលពីថ្ងៃអាទិត្យម្សិលមិញ ក្រុមអ្នកតវ៉ាបានលើកនិមិត្តសញ្ញាសន្តិភាពនិងបដារូបសញ្ញាត្រី snoek fish ដែលជាអាហារដ៏ពេញនិយមនៅអាហ្វ្រិកខាងត្បូងដើម្បីបង្ហាញពីការព្រួយបារម្ភពីផលប៉ះពាល់ដែលអាចកើតមានពីគម្រោងរុករកប្រេង។
ក្រុមអ្នកស្រលាញ់បរិស្ថាន និយាយថាគម្រោងរបស់ក្រុមហ៊ុនស្ហ៊ែលក្នុងការស្វែងរកកន្លែងស្តុកប្រេងនិងឧស្ម័នពីតំបន់ឆ្នេរព្រៃដែលជាកន្លែងទាក់ទាញទេសចរណ៍ដ៏សំខាន់បង្កគ្រោះថ្នាក់ដល់ជីវិតសត្វសមុទ្រ។
សកម្មជនបរិស្ថានសង្ឃឹមថាការដើរតវ៉ារបស់ពួកគេនៅតាមឆ្នេរ អាចលើកកម្ពស់ការយល់ដឹងពីផលប៉ះពាល់នៃការរុករកស្រាវជ្រាវទីតាំងដែលមានប្រេងនិងឧស្ម័ន។ ទាក់ទងរឿងនេះ ក្រុមអ្នកបរិស្ថានវិទ្យាគូសបញ្ជាក់ថា បច្ចេកទេសរុករកប្រេងអាចរំខានដល់ឥរិយាបថ ការផ្តល់ចំណី ការបន្តពូជ និងលំនាំការធ្វើចំណាកស្រុករបស់សត្វ ដោយសារសត្វសមុទ្រជាច្រើនដូចជាត្រីបាឡែនជាដើម ពឹងផ្អែកយ៉ាងខ្លាំងលើការស្តាប់របស់ពួកគេ។
មិនមែនតែសត្វសមុទ្រទេដែលប្រឈមនឹងគ្រោះថ្នាក់ខ្លាំង ប្រជាជនជាច្រើនក៏ប្រឈមគ្រោះដូចគ្នាដែរពីសកម្មភាពរុករកប្រេង។ បើតាមសកម្មជនបរិស្ថានអាហ្វ្រិកខាងត្បូង មានមនុស្សច្រើនរាប់មិនអស់ដែលរស់ពឹងអាស្រ័យលើសមុទ្រ ហើយពួកគេសុទ្ធតែប្រឈមនឹងគ្រោះថ្នាក់ដែលកើតចេញពីសកម្មភាពរុករកប្រេង។
គួរបញ្ជាក់ថាឆ្នេរពៃ្រ (Wild Coast) អាហ្វ្រិកខាងត្បូង មានតំបន់ការពារធម្មជាតិនិងតំបន់ការពារសមុទ្រជាច្រើន។ ក្រុមហ៊ុនស្ហ៊ែលគ្រោងចំណាយពេល៤ ទៅ៥ ខែ ដើម្បីរុករកប្រេងនៅក្នុងតំបន់លើផ្ទៃដីដែលមានទំហំប្រមាណ ៦ ពាន់គីឡូម៉ែត្រការ៉េ។ កាលពីខែមុន ក្រុមហ៊ុនបានប្រាប់ទីភ្នាក់ងារព័ត៌មាន AFP ថានឹងយកចិត្តទុកដាក់ខ្ពស់ក្នុងការការពារ ឬកាត់បន្ថយផលប៉ះពាល់ចំពោះត្រី ថនិកសត្វសមុទ្រ និងសត្វព្រៃដទៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ