របាយការណ៍ ៖ ប្រជាជនអាហ្វ្រិកជាង១០០លាននាក់ រងគំរាមកំហែងដោយសារការឡើងកំដៅផែនដី
ប្រជាជនក្រីក្រនៅទឹកដីអាហ្វ្រិកកំពុងរងការគំរាមកំហែងដោយសារការប្រែប្រួលអាកាសធាតុ។ របាយការណ៍របស់អង្គការសហប្រជាជាតិ ចេញផ្សាយកាលពីថ្ងៃអង្គារទី១៩ តុលា ២០២១ បានព្រមានផងដែរថា ការឡើងកំដៅផែនដី នឹងអាចគំរាមកំហែងធ្វើឲ្យភ្នំទឹកកកដ៏កម្រ ចុងក្រោយ នៅទឹកដីអាហ្រ្វិករលាយអស់គ្មានសល់ យ៉ាងយូរ បំផុតនៅ ឆ្នាំ ២០៤០។
ចុះផ្សាយនៅថ្ងៃ៖
ស្តាប់ - ០២:៣៥
ប៉ុន្មានថ្ងៃមុនបើកសន្និសីទអន្តរជាតិស្តីពីអាកាសធាតុ នៅប្រទេសអង់គ្លេស អង្គការសហប្រជាជាតិបានចេញរបាយការណ៍បង្ហាញ ទ្វីបអាហ្វ្រិកមួយ ដែលកំពុងរងគ្រោះខ្លាំងជាងគេ ដោយសារការប្រែប្រួលអាកាសធាតុ។
របាយការណ៍របស់អង្គការសហប្រជាជាតិដែលជាលទ្ធផលនៃការងារស្រាវជ្រាវរួមគ្នារវាងទីភ្នាក់ងារឧតុនិយមអង្គការសហប្រជាជាតិ គណៈកម្មការអាហ្វ្រិក និងគណៈកម្មការសេដ្ឋកិច្ចអាហ្វ្រិក បានបង្ហាញថា ឆ្នាំ ២០២០ នៅតំបន់អាហ្វ្រិក មិនថា ដីទ្វីប ឬទឹកសមុទ្រ ឆាប់ក្តៅជាងគេ ជាងកន្លែងដទៃ ក្នុងពិភពលោក។ បើធៀបនឹងកម្រិតជាមធ្យម នៅលើផែនដី កំពស់ទឹកសមុទ្រនៅតំបន់អាហ្វ្រិកក៏កើនលឿនជាងគេដែរ។ ចំណែក នៅភ្នំទឹកកកចុងក្រោយ ដែលជាប្រភពទឹកសាបដ៏សំខាន់នៅតំបន់អាហ្វ្រិក ក៏ឆាប់រលាយលឿន។
តាមទីភ្នាក់ងារឧតុនិយមរបស់អង្គការសហប្រជាជាតិ បើសិននិន្នាការនៅតែបន្តយ៉ាងដូច្នេះ ភ្នំទឹកកកចុងក្រោយរបស់អាហ្វ្រិក ដែលមាននៅ កេនយ៉ា អ៊ូហ្កង់ដា និងតង់ហ្សានី នឹងរលាយបាត់រូបរាងពីផែនទីអាហ្វ្រិកនៅយ៉ាងយូរបំផុត ឆ្នាំ ២០៤០។
កំពស់ទឹកសមុទ្រឡើងខ្ពស់ជាងគេ។ មានអាកាសធាតុក្តៅខ្លាំងជាងគេ។ អាហ្វ្រិករងគ្រោះមួយជាន់ទៀត ដោយសារគ្រោះមហន្តរាយធម្មជាតិដែលបង្កឡើងដោយការប្រែប្រួលអាកាសធាតុ ដូចជា គ្រោះរាំងស្ងួត ការរលំបាក់ដី គ្រោះទឹកជំនន់ទឹកភ្លៀង។
ជាលទ្ធផល អង្គការសហប្រជាជាតិវាយតម្លៃថា ពីពេលនេះ រហូតដល់ឆ្នាំ ២០៣០ នឹងមានប្រជាជនអាហ្វ្រិកដ៏ក្រីក្របំផុត ប្រមាណ ១១៨លាននាក់ ដែលត្រូវប្រឈមរងគ្រោះខ្លាំង ដោយសារ ទឹកជំនន់ គ្រោះរាំងស្ងួត អាកាសធាតុក្តៅខ្លាំង បើសិនគេមិនចាត់វិធានការសង្រ្គោះបន្ទាន់នោះទេ។ នៅតំបន់អាហ្វ្រិក ការពិភាក្សាពីបញ្ហាអាកាសធាតុតែងត្រូវគ្របដណ្តប់ដោយបញ្ហាសង្គមផ្សេងទៀត ដូចជាភាពក្រីក្រ គ្រោះអត់ឃ្លាន ជំងឺរាតត្បាត អំពើពុករលួយ ហើយនិងជម្លោះប្រដាប់អាវុធ។
គ្រោះធម្មជាតិដែលបណ្តាលមកពីការប្រែប្រួលអាកាសធាតុ ដូចជាសត្វល្អិតចង្រៃ នៅកេនយ៉ា ឬគ្រោះរាំងស្ងួតរយៈពេលយូរ បានបណ្តាលឲ្យមានគ្រោះអត់ឃ្លានរ៉ាំរ៉ៃ និងបានរុញច្រានប្រជាជនអាហ្វ្រិកឲ្យធ្វើចំណាកស្រុក ដោយមួយចំនួនបានប្រថុយជីវិតធ្វើដំណើរឆ្លងសមុទ្រដ៏មហាគ្រោះថ្នាក់ សំដៅទឹកដីអឺរ៉ុប។
សម្រាប់អង្គការសហប្រជាជាតិ គេនៅតែមានដំណោះស្រាយ សម្រាប់ ជួយប្រជាជនអាហ្វ្រិក ក្នុងការទប់ទល់ការពារខ្លួន ពីផលវិបាកនៃការប្រែប្រួលអាកាសធាតុ។ រដ្ឋាភិបាលនៅអាហ្វ្រិកត្រូវបង្កើតប្រព័ន្ធទាញសញ្ញាអាសន្នជាមុន ដែលអនុញ្ញាតឲ្យប្រជាជនអាចត្រៀមខ្លួននៅមុន គ្រោះធម្មជាតិមកដល់។ ម្យ៉ាងទៀត អាជ្ញាធរត្រូវបង្កើតប្រព័ន្ធធារាសាស្រ្ត ដែលសម្របខ្លួនទៅនឹងកត្តាប្រែប្រួលអាកាសធាតុ ក៏ដូចជាជូនដំណឹងជាប្រចាំដល់ប្រជាជនពីតម្លៃអាហារ ការព្យាករឧតុនិយម និងផ្ញើសារជូនដំណឹងប្រជាកសិករ ពីគ្រាប់ពូជដំណាំដែលគេត្រូវដាំ ក្នុងបរិបទអាកាសធាតុប្រែប្រួល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ