អាហ្វ្រិកដែលខ្វះវ៉ាក់សាំងរួចហើយនោះ កំពុងជួបរលកទី៣នៃជំងឺកូវីដ១៩
យឺតយ៉ាវជាងគេ នៅក្នុងពិភពលោក នៅក្នុងយុទ្ធនាការចាក់វ៉ាក់សាំង បណ្តាប្រទេសអាហ្វ្រិកកំពុងរងគ្រោះ ដោយសាររលកទី៣នៃជំងឺកូវីដ។ នៅថ្ងៃសុក្រ ទី២៥មិថុនា ប្រធានអង្គការសុខភាពពិភពលោកប្រចាំទ្វីបអាហ្វ្រិកបានព្រមាន ពីគ្រោះថ្នាក់នៃរលកទី៣ ដែលវាយសន្ធប់លឿន និងខ្លាំងទៅលើបណ្តាប្រទេសនៅអាហ្វ្រិក ជាទី ដែលប្រព័ន្ធសុខាភិបាល នៅខ្សត់ខ្សោយ ចំណែកមន្ទីរពេទ្យ ចាប់ផ្តើមចាល់ ខ្វះគ្រែ ដើម្បីទទួលដាក់អ្នកជំងឺកូវីដ។
ចុះផ្សាយនៅថ្ងៃ៖
ស្តាប់ - ០៣:១០
មានអ្នកឆ្លងតិចជាង ៥,៣លាននាក់ និងមានអ្នកស្លាប់ដោយសារកូវីដ ប្រមាណ ជាង ១សែននាក់ (១៣៩ ០០០នាក់) ក្នុងចំណោមប្រជាជនសរុបជាង ១៣០០លាននាក់ ទ្វីបអាហ្វ្រិក ធ្លាប់រងគ្រោះតិចតួចដោយសាររលកកូវីដ បើប្រៀបធៀបនឹងប្រទេសឥណ្ឌា និងប្រេស៊ីល។ ប៉ុន្តែ ការកើនឡើង នៃករណី ឆ្លងថ្មី នៅក្នុងប្រទេសអាហ្វ្រិកចំនួន ១២ នៅមួយរយៈចុងក្រោយនេះ បានរុញច្រាន ទ្វីបអាហ្វ្រិកទាំងមូល ទៅក្នុងស្ថានភាពប្រកាសអាសន្ន នៅ ពីរ ឬបី សប្តាហ៍ខាងមុខ។
សម្រាប់ប្រធានអង្គការសុខភាពពិភពលោកប្រចាំទ្វីបអាហ្វ្រិក លោកស្រី Matshidiso Moeti រលកថ្មី រលកទី៣នៃជំងឺកូវីដ មានសន្ទុះឆ្លងលឿនខ្លាំង និងសម្លាប់មនុស្សច្រើនជាងរលកពីរ មុន។
ការផ្ទុះឡើងនៃករណីឆ្លងថ្មី នៅទ្វីបអាហ្វ្រិក កើតឡើង នៅចំពេលដែល រដ្ឋាភិបាលចាប់ផ្តើមបន្ធូរបន្ថយ វិធានការរឹតបន្តឹងសុខាភិបាល បូកផ្សំជាមួយមេរោគបំប្លែងខ្លួនថ្មី ជាពិសេស មេរោគដែលតា ដែលមានលក្ខណៈសាហាវ ឆ្លងខ្លាំង ជាងមេរោគដើម។
ក្រៅពីអាហ្វ្រិកខាងត្បូង ដែលរងគ្រោះខ្លាំងជាងគេដោយសារជំងឺកូវីដ នៅពីរ រលកមុន ប្រទេសអាហ្វ្រិកមួយចំនួន ដែលមិនសូវប៉ះពាល់ ខ្លាំង ដោយសាររលកមុនៗ ដូចជា លីបេរីយ៉ា និង សៀរ៉ាឡេអូន ក៏ត្រូវរងគ្រោះដោយសាររលកថ្មីនៃជំងឺកូវីដលើកនេះ ដែរ។ នៅហ្សំប៊ី រដ្ឋមន្រ្តីក្រសួងសុខាភិបាល បានលើកឡើងពីការកើនឡើងនៃចំនួនមនុស្សស្លាប់ ដោយសារកូវីដ ចំណែក ប្រទេសអ៊ូហ្កង់ដា ស្តីបន្ទោស មេរោគកូវីដបំប្លែងខ្លួនថ្មីថា ជាដើមហេតុ នៃរលកឆ្លងថ្មី។ អ្វីដែលគេកត់សំគាល់ គឺខុសពី ឆ្នាំមុន យុវជនកាន់តែច្រើន ដែលបានឆ្លងមេរោគកូវីដ ត្រូវបានបញ្ជូនទៅព្យាបាលនៅមន្ទីរពេទ្យ។
អាហ្រ្វិកកំពុងជួបរលកទី៣ នៅក្នុងកាលៈទេសៈ ដែលទ្វីបមួយនេះ កំពុងយឺតយ៉ាវ ខ្លាំង នៅក្នុងយុទ្ធនាការចាក់វ៉ាក់សាំង បង្ការកូវីដ។ តាមអង្គការសុខភាពពិភពលោក មានប្រជាជនអាហ្វ្រិកតិច ជាង ១% ដែលបានទទួលវ៉ាក់សាំង ទាំង ២ដូស។
មានប្រជាជន មិនដល់១% ដែលបានទទួលវ៉ាក់សាំង បង្ការកូវីដ ក៏ព្រោះថា ទ្វីបអាហ្វ្រិក បានទទួលវ៉ាក់សាំងតិច និងក្រោយគេ។ ក្រុមប្រទេសG7 ធ្លាប់បានសន្យាផ្តល់វ៉ាក់សាំង ១ពាន់លានដូស។ ប៉ុន្តែ នៅក្នុងស្ថានភាពជាក់ស្តែង ប្រទេសអាហ្វ្រិកជាច្រើនកំពុងជួបវិបត្តិខ្វះវ៉ាក់សាំង ដែលនៅក្នុង នោះ មានប្រទេស អាហ្វ្រិកចំនួន ១៨ ជិតអស់វ៉ាក់សាំងពីក្នុងស្តុក នៅបន្ទាប់ ពី យន្តការកូវ៉ាក់របស់អង្គការសុខភាពពិភពលោក ផ្អាកការបញ្ជូនវ៉ាក់សាំង ទៅអាហ្វ្រិក ដោយសារតែវិបត្តិកូវីដ នៅឥណ្ឌា ដែលជាប្រទេសផលិតវ៉ាក់សាំងធំជាងគេនៅក្នុងពិភពលោក។
ប្រទេសអាហ្វ្រិកខ្លះ កំពុងខ្វះវ៉ាក់សាំង សម្រាប់ចាក់ឲ្យប្រជាជន ប៉ុន្តែ ប្រទេសអាហ្រ្វិកមួយចំនួន បែរជាត្រូវ ដុតចោលវ៉ាក់សាំង ដែលផុតថ្ងៃកំណត់ ដោយសារតែ មានប្រជាជនមិនជឿទុកចិត្ត និងខ្លាចមិនចាក់ វ៉ាក់សាំង។ ជាក់ស្តែង ម៉ាឡាវី បានដុតចោលវ៉ាក់សាំងAstraZeneca ជិត ២ម៉ឺនដូស ចំណែក ស៊ូដង់ខាងត្បូង និងសាធារណរដ្ឋប្រជាធិបតេយ្យកុងហ្គោ ត្រូវបញ្ជូន វ៉ាក់សាំង ជាង ២លានដូស ដើម្បីឲ្យអង្គការសុខភាពពិភពលោកយកទៅចែកដល់ប្រទេសផ្សេង មុនពេល វ៉ាក់សាំង ត្រូវផុតថ្ងៃកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ