អាល់ហ្សេរី ដោះលែងអ្នកទោសមនសិកា ក្នុងឱកាសខួបពីរឆ្នាំនៃការបះបោរប្រជាជន
អ្នកទោសមនសិកា ជាង៣០នាក់ បានទទួលការលើកលែងទោសពីប្រធានាធិបតី និងត្រូវដោះលែងឱ្យមានសេរីភាពវិញ។ នេះបើតាមសេចក្តីថ្លែងការណ៍របស់ក្រសួងយុត្តិធម៌ ដោយពុំមានការបញ្ជាក់លម្អិតអំពីអត្តសញ្ញាអ្នកទាំងអស់នោះទេ។ ការដោះលែងអ្នកទោសមនសិកា ត្រូវបានធ្វើឡើងតែពីរថ្ងៃមុនខួបពីរឆ្នាំនៃការបះបោរប្រជាជនទម្លាក់រដ្ឋាភិបាលចាស់។
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងចំណោមពិរុទ្ធជនប្រមាណ៥៥ទៅ៦០នាក់ដែលបានទទួលការលើកលែងទោសពីប្រធានាធិបតី មាន៣៣នាក់ ជាអ្នកទោសមនសិកា និងគួរឱ្យកត់សម្គាល់ជាងគេគឺ អ្នកឆ្លើយឆ្លងព័ត៌មានឱ្យទូរទស្សន៍TV5Monde និង អង្គការអ្នកយកការណ៍គ្មានព្រំដែន លោក Khaled Drareni ដែលត្រូវបានតុលាការអាល់ហ្សេរីកាត់ទោសកាលពីខែកញ្ញា២០២០ ឱ្យជាប់ពន្ធនាគារពីរឆ្នាំ និងដែលបានក្លាយជានិម្មិត្តរូបនៃការតស៊ូដើម្បីសេរីភាពនៃការបញ្ចេញមតិ។
សកម្មជននយោបាយបក្សប្រឆាំង Rachid Nekkaz ក៏បានទទួលការលើកលែងទោស និងបានទទួលសេរីភាពវិញដែរនៅថ្ងៃសៅរ៍ទី ២០កុម្ភៈនេះ។ នេះបើតាមសេចក្តីជូនដំណឹងរបស់គណៈកម្មការជាតិផ្នែកដោះលែងអ្នកទោស។
បើតាមគណៈកម្មការដោះលែងពិរុទ្ធជន មានអ្នកទោសប្រមាណ៧០នាក់ ជាប់ពន្ធនាគារពីបទមានពាក់ព័ន្ធនឹងចលនាបះបោរហ៊ីរ៉ក់ ឬសេរីភាពនៃការបញ្ចេញមតិ។ យ៉ាងហោចណាស់ ៩០% នៃអ្នកជាប់ទោសនេះ បានរងទោសដោយហេតុតែបានបង្ហោះផ្សាយសាររិះគន់រដ្ឋាភិបាលតាមប្រព័ន្ធសង្គម។
សូមបញ្ជាក់ថា គំនិតផ្តួចផ្តើមរបស់លោកប្រធានាធិបតី ធេប៊ូន ដោះលែងអ្នកទោសមនសិកានេះធ្វើឡើងតែពីរថ្ងៃមុនខួបគម្រប់ពីរឆ្នាំនៃការផ្ទុះចលនាបះបោរប្រជាជន ដែលបានរុញច្រានឱ្យរដ្ឋាភិបាលចាស់ដឹកនាំដោយបុរសខ្លាំងលោក ប៊ូតេហ្លីកា ខ្ទាតពីតំណែងនៅថ្ងៃទី ២មេសា ២០១៩។ ចលនាបះបោរ ដែលនៅតែពុំទាន់ស្ងប់ស្ងាត់នៅឡើយ ដោយបន្តទាមទារឱ្យរំលាយចោលទាំងស្រុងប្រព័ន្ធនយោបាយចាស់គំរិល តាំងពីឆ្នាំ១៩៦២ (ពេលបានទទួលឯករាជ្យភ្លាម)។
ការអំពាវនាវធ្វើបាតុកម្មជាថ្មីនៅថ្ងៃចន្ទទី ២២កុម្ភៈ កំពុងរសាត់ពេញផ្ទៃប្រទេស តាមប្រព័ន្ធសង្គម។ ចលនាបះបោរបានចាប់ផ្តុំជាថ្មីរួចហើយ កាលពីថ្ងៃអង្គារកន្លងទៅ នៅក្រុងខេរ៉ាតា ភាគខាងកើតនៃប្រទេស ដែលគេចាត់ទុកជាឬសគល់ដើមនៃចលនាបះបោរប្រជាជនកាលពីពីរឆ្នាំមុន ដើម្បីទាមទារប្តូរផ្លាស់របបនិងការដោះលែងអ្នកទោសមនសិកា។ នៅថ្ងៃព្រហស្បតិ៍ទី ១៨ កុម្ភៈ លោកប្រធានាធិបតីអាល់ហ្សេរី អាប់ដែលម៉ាឌីដ ធេប៊ូន បានបង្ហាញកាយវិការបន្ធូរបន្ថយភាពតានតឹងជាមួយចលនាប្រឆាំងរដ្ឋាភិបាល តាមរយៈសុន្ទរកថាទៅកាន់ប្រជាជាតិ ប្រកាសដោះលែងអ្នកទោសដែលមានពាក់ព័ន្ធនឹងចលនាបះបោរប្រជាជននៅទីលាន Hirak និងរំលាយសភា និងរៀបចំការបោះឆ្នោតថ្មីមុនកាលកំណត់ ព្រមទាំងរុះរើសមាសភាពរដ្ឋាភិបាលខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ