ទំនាក់ទំនងអ៊ីស្រាអែល-ម៉ារ៉ុក៖ អាល់ហ្សេរីមើលឃើញ ការគំរាមកំហែងនៅនឹងព្រំដែនរបស់ខ្លួន
មួយថ្ងៃក្រោយ ប្រធានាធិបតី អាមេរិកប្រកាសកិច្ចព្រមព្រៀងភ្ជាប់ទំនាក់ទំនងរវាងអ៊ីស្រាអែលជាមួយម៉ារ៉ុក ប្រទេសអារ៉ាប់ មួយទៀត នៅក្នុងតំបន់ អាល់ហ្សេរី បានចេញមុខប្រតិកម្ម រិះគន់ អ៊ីស្រាអែល និងសកម្មភាពបរទេស ដែលសំដៅ បង្កអស្ថិរភាពរបស់ប្រទេសអាល់ហ្សេរី។ កាលពីថ្ងៃសៅរ៍ នាយករដ្ឋមន្រ្តី អាល់ហ្សេរី លោក អាប់ឌែលឡាហ្ស៊ីស ហ្សេរ៉ាដ Abdelaziz Djerad បានចោទប្រកាន់អ៊ីស្រាអែលថា កំពុងមានឆន្ទៈចង់ខិតចូលជិតព្រំដែនអាល់ហ្សេរី។
ចុះផ្សាយនៅថ្ងៃ៖
អាល់ហ្សេរី ដែលមានព្រំដែន ជាប់ជាមួយប្រទេសម៉ារ៉ុក មិនស្វាគមកិច្ចព្រមព្រៀងជាប្រវត្តិសាស្រ្តដែលភ្ជាប់ទំនាក់ទំនងអ៊ីស្រាអែល និងម៉ារ៉ុកនោះទេ។ នៅក្នុងក្រសែភ្នែករបស់អាល់ហ្សេរី ទំនាក់ទំនងជាប្រក្រតីឡើងវិញ រវាងប្រទេសអារ៉ាប់ ដូចជាម៉ារ៉ុកជាមួយរដ្ឋជ្វីហ្វអ៊ីស្រាអែល នឹងបើកផ្លូវឲ្យអ៊ីស្រាអែល ចូលខិតកាន់តែជិត ព្រំដែនរបស់អាល់ហ្សេរី ដែលបើតាមនាយករដ្ឋមន្រ្តី អាល់ហ្សេរី វាមិនមែនជារឿងនោះទេ សម្រាប់ស្ថិរភាពរបស់អាល់ហ្សេរី។
សម្រាប់អ្នកវិភាគនយោបាយអាល់ហ្សេរី លោក Abed Charef ការខិតចូលជិតគ្នារវាងម៉ារ៉ុក និងអ៊ីស្រាអែល ដែលសុទ្ធតែជាសម្ព័ន្ធមិត្តរបស់អាមេរិកដូចគ្នាបានបើកផ្លូវ កាន់តែធំជាងមុន សម្រាប់ឲ្យអ៊ីស្រាអែលអាចទាញយកប្រយោជន៍ពីកងទ័ពម៉ារ៉ុក នៅក្នុងទិដ្ឋភាពជាច្រើន តាំងពីការតាមដានបច្ចេកវិទ្យា ការត្រួតពិនិត្យដែនអាកាស ដ្រូន ចារកម្ម និងការសាបព្រួសឥទ្ធិពលរបស់អ៊ីស្រាអែលលើបណ្តាញគ្រប់គ្រងអ៊ីនធ័រនែតរបស់ម៉ារ៉ុក។
មួយវិញទៀត ការដែលអាមេរិកទទួលស្គាល់តំបន់សាហារ៉ាខាងលិចថា ជាទឹកដី ស្របច្បាប់របស់ម៉ារ៉ុក ក៏នឹងធ្វើឲ្យអាល់ហ្សេរី បាត់បង់ប្រយោជន៍ដែរ ព្រោះថា អាល់ហ្សេរី ជាអ្នកជួយគាំទ្រ ពីក្រោយ ក្រុមរណសិរ្ស ទាមទារឯករាជ្យ ប៉ូលីសារីយ៉ូ ដែលគ្រប់គ្រងទឹកដី មួយផ្នែក នៅសាហារ៉ាខាងលិច។
នៅថ្ងៃសុក្រ លោកប្រធានាធិបតី ដូណាល់ ត្រាំបានប្រកាសពីការចុះកិច្ចព្រមព្រៀងភ្ជាប់ទំនាក់ទំនងអ៊ីស្រាអែល និងម៉ារ៉ុក និងការចុះហត្ថលេខាទទួលស្គាល់តំបន់សាហារ៉ាខាងលិច ថា ជាដែនដីស្របច្បាប់របស់ម៉ារ៉ុក។ រណសិរ្ស ប៉ូលីសារីយ៉ូ ដែលជាក្រុមទាមទារផ្តាច់ទឹកដីនិយមក្នុងតំបន់សាហារ៉ាខាងលិច បានបរិហាផ្តន្ទាទោសលើការសម្រេចចិត្តរបស់លោកត្រាំ។
សូមបញ្ជាក់ថា នៅក្រោយ អេស្ប៉ាញដកខ្លួន លែងធ្វើអាណានិគមទៅលើតំបន់ សាហារ៉ាខាងលិច នៅឆ្នាំ ១៩៧៥ ម៉ារ៉ុក និងម៉ូរីតានីបានប្រយុទ្ធគ្នា ដើម្បី ដណ្តើមគ្រប់គ្រងរៀងៗខ្លួន។ ប៉ុន្តែ នៅពេលម៉ូរីតានីដកខ្លួន នៅឆ្នាំ ១៩៧៩ ម៉ារ៉ុក ត្រូវជាប់ដៃ ប្រយុទ្ធគ្នា ជាមួយក្រុមទាមទារឯករាជ្យ ប៉ូលីសារីយ៉ូ រហូតដល់សព្វថ្ងៃនេះ។ អាមេរិកបានគាំទ្រសព្វាវុធដល់កងទ័ពម៉ារ៉ុក ចំណែក អាល់ហ្សេរីចូលរួមប្រយុទ្ធជួយរណសិរ្សប៉ូលីសារីយ៉ូ ដែលមានកងទ័ពប្រមាណ ១៥ ០០០នាក់។
នៅថ្ងៃសៅរ៍ ក្រៅតែអាល់ហ្សេរី អ៊ីរ៉ង់ ដែលជាសត្រូវសួពូជរបស់អ៊ីស្រាអែលបានចេញមុខថ្កោលទោសផងដែរ កិច្ចព្រមព្រៀងភ្ជាប់ទំនាក់ទំនងអ៊ីស្រាអែល ម៉ារ៉ុក ដែលអ៊ីរ៉ង់ ចាត់ទុកជាការក្បត់នឹងសាសនាអ៊ីស្លាម ហើយនិងប្រជាជនប៉ាឡេស្ទីន។ ទីក្រុងរ៉ាបារបស់ម៉ារ៉ុកបានបញ្ជាក់នៅថ្ងៃព្រហស្បតិ៍ថា ខ្លួននឹងរៀបចំទំនាក់ទំនងជាផ្លូវការ និងការទូតជាមួយភាគីអ៊ីស្រាអែលឲ្យបានឆាប់ជាទីបំផុត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ