ប្រទេសជិតខាងលីប៊ី ជួបជុំគ្នាស្វែងរកដំណោះស្រាយនយោបាយឱ្យលីប៊ី
ក្រោមការផ្តួចផ្តើមរបស់អាល់ហ្សេរី ក្រុមប្រទេសជាប់របងលីប៊ីទាំង៥ បានមកជួបជុំគ្នា នៅថ្ងៃព្រហស្បតិ៍នេះ ទៅទីក្រុងអាល់ហ្សេ ប្រទេសអាល់ហ្សេរី។ កម្មវត្ថុចំបងនៃជំនួប គឺ សាកល្បងស្វែងរកដំណោះស្រាយតាមផ្លូវនយោបាយ ឱ្យវិបត្តិលីប៊ី។ វិបត្តិលីប៊ីដែលបានរីករាលដាលកាន់តែធ្ងន់ធ្ងរ និងបានគំរាមកំហែងស្ថិរភាពតំបន់ទាំងមូល។
ចុះផ្សាយនៅថ្ងៃ៖
ស្តាប់ - ០២:០៦
ក្រុមប្រទេសជិតខាងលីប៊ី មានជាអាទិ៍ រដ្ឋមន្ត្រីក្រសួងការបរទេសទុយនីស៊ី អេហ្ស៊ីប និងឆាដ ព្រមទាំងមន្ត្រីការទូតស៊ូដង់ និងនីហ្សេ បានឡើងថ្លែងសុន្ទរកថាម្នាក់ម្តង មុននឹងបន្តជំនួបពិភាក្សា ដោយបិទទ្វារ។ អាល់ហ្សេរី សង្ឃឹមថាជំនួបថ្នាក់តំបន់នេះនឹងនាំក្រុមប្រទេសជិតខាងឱ្យរកឃើញជំហររួមគ្នាមួយ។
អាល់ហ្សេរី ក៏បានអញ្ជើញរដ្ឋមន្ត្រីការបរទេសអាល្លឺម៉ង់ ឱ្យមកចូលរួមក្នុងជំនួបនេះដែរ ដើម្បីពាំនាំលទ្ធផលលម្អិតនៃសន្និសីទអន្តរជាតិនៅទីក្រុងប៊ែរឡាំង កាលពីថ្ងៃអាទិត្យមកប្រាប់អង្គប្រជុំ ដោយផ្ទាល់។ សន្និសីទអន្តរជាតិបានសម្រេចបិទបញ្ចប់ការជ្រៀតជ្រែករបស់បរទេសនៅក្នុងសង្គ្រាមលីប៊ី និងសម្រេចហាមឃាត់នូវការនាំអាវុធទៅលីប៊ី។ តែស្ថានភាពជាក់ស្តែងក្នុងប្រទេស មិនប្រាកដប្រជាទេ ព្រោះភាគីបក្ខដិបក្ខលីប៊ីទាំងសងខាងបានបដិសេធមិនជួបគ្នាទេ នៅប៊ែរឡាំង។ នៅថ្ងៃនេះអាល់ហ្សេរី ក៏មិនបានអញ្ជើញ ភាគីជាប់ជម្លោះផ្ទាល់ទាំងពីរមកក្រុងអាល់ហ្សេដែរ។ មានន័យស្ថានភាពនៅតែតានតឹងជានិច្ច។
សម្រាប់អាល់ហ្សេរី ជំនួបប្រជុំក្រុមប្រទេសជិតខាងលីប៊ី ស្ថិតក្នុងក្របខ័ណ្ឌនៃកិច្ចខិតខំប្រឹងប្រែងអន្តរជាតិ ដើម្បីរកដំណោះស្រាយឱ្យលីប៊ី បន្តពីសន្និសីទអន្តរជាតិក្រុងប៊ែរឡាំង ប៉ុន្តែបញ្ហានៅត្រង់ថាក្រុមប្រទេសនៅអាហ្វ្រិកមួយភាគធំ មិនពេញចិត្តទេ នៅពេលឃើញសន្និសីទអន្តរជាតិស្តីពីប្រទេសលីប៊ី មិនបានហៅក្រុមប្រទេសជាប់របងលីប៊ី ដែលជាក្រុមប្រទេសពាក់ព័ន្ធផ្ទាល់ជាងគេ ឱ្យមកចូលរួមដោះស្រាយជាមួយនោះ។ តាមរយៈជំនួបនេះ អាល់ហ្សេរី ចង់រំលឹកអំពីតួនាទីរបស់ខ្លួន ដែលធ្លាប់ចូលរួមដោះស្រាយវិបត្តិក្នុងអតីតកាល។ អាល់ហ្សេរី សកម្មខ្លាំងណាស់ក្នុងសំណុំរឿងលីប៊ី ដោយបានស្នើខ្លួនធ្វើជាម្ចាស់ផ្ទះទទួលឱ្យភាគីបក្ខដិបក្ខលីប៊ីមកអង្គុយចរចាគ្នាទៀតផង ទើបត្រូវជួបពិគ្រោះយោបល់ជាមួយគ្រប់ប្រទេសជិតខាងនិងអន្តរជាតិ។
រដ្ឋមន្ត្រីការបរទេសអាល់ហ្សេរី យល់ថាបើលីប៊ីមានសន្តិភាព ទើបប្រទេសជិតខាងបានសុខដែរ។ អាល់ហ្សេរីមានព្រំដែនជាប់លីប៊ីដល់១០០០គីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ