ផៃ ស៊ីផាន៖ដំណើរការរុះរើគណៈរដ្ឋមន្ត្រីមិនទាន់កើតឡើងទេ ប៉ុន្តែនាយករដ្ឋមន្ត្រីបង្ហើបហើយត្រូវតែធ្វើ
លោកនាយករដ្ឋមន្ត្រី ហ៊ុន សែន បានបង្ហើបដោយចំថា លោកនឹងធ្វើការរុះរើគណៈរដ្ឋមន្ត្រីក្នុងឆ្នាំ២០១៦នេះ និង បានចោទជាសំណួរយ៉ាងម៉ឺងម៉ាត់ថា«ខ្ញុំកំពុងពិចារណា ថាគួរតែធ្វើការរុះរើគណៈរដ្ឋមន្ត្រីនៅឆ្នាំ២០១៦នេះឬយ៉ាងណា»? ដើមចមដែរលនាំឲ្យ លោក ហ៊ុន សែន ប្រកាសយ៉ាងដូច្នេះបន្ទាប់ពីលោកមើលឃើញនិងបានស្ដីបន្ទោសខ្លាំងៗទៅ កាន់ក្រសួងចំនួនពីរធ្វើការស្ទក់មិនទាន់សភាពការណ៍។ ការណ៍នេះត្រូវបាន លោកនាយករដ្ឋមន្ត្រី ហ៊ុន សែន យល់ថា នាំឲ្យពលរដ្ឋខឹងគោវាយរទេះ។ តើរហូតមកដល់ពេលនេះដំណើរការរុះរើគណៈរដ្ឋមន្ត្រីចាប់ផ្ដើមហើយ ឬនៅ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
រហូតមកដល់ពេលនេះការរុះរើគណៈរដ្ឋមន្ត្រី តាមការបង្ហើបរបស់លោកនាយករដ្ឋមន្ត្រី ហ៊ុន សែន នៅមិនទាន់កើតឡើងនៅឡើយទេ។ លោក ផៃ ស៊ីផាន អះអាងថា ទោះនៅពេលនេះដំណើរការរុះរើគណៈរដ្ឋមន្ត្រីនៅមិនទាន់កើតឡើងប្រាកដមែន តែអ្វីដែលលោកនាយករដ្ឋមន្ត្រី ហ៊ុន សែន បង្ហើបហើយលោកនឹងធ្វើ។ ស្ថិតនៅក្នុងកាលៈទេសៈនេះគឺលោក ហ៊ុន សែន ត្រូវការពេលវេលា និង ចំណាត់ការ។
អ្នកនាំពាក្យទីស្ដីការគណៈរដ្ឋមន្ត្រីរូបនេះបានបញ្ជាក់ប្រាប់វិទ្យុបារាំងអន្តរជាតិRFIថា បំណងនៃការរុះរើគណៈរដ្ឋមន្ត្រីគឺជាការសម្រេចចិត្តរបស់ លោក ហ៊ុន សែន ដើម្បីឆ្លើយតបទៅនឹងសេចក្ដីត្រូវការរបស់សាធារណៈជន។ ការរុះរើគណៈរដ្ឋមន្ត្រីនឹងធ្វើឡើងតាមរយៈគណៈកម្មការមួយទទួលបន្ទុកលើបញ្ហានេះ។
កន្លងមករដ្ឋាភិបាលរបស់គណបក្សប្រជាជនក៏ធ្លាប់ធ្វើការរុះរើគណៈរដ្ឋមន្ត្រីដែរ ដោយបានធ្វើឡើងតាមរយៈចំណាត់ការរក្សាកិត្តយសដោយមិនបំបាក់មុខមាត់ទេ រវាងអ្នកធ្លាប់បំរើសេវាកម្មរាជការល្អ។ ផ្អែកតាមច្បាប់ការរុះរើគណៈរដ្ឋមន្ត្រីប្រព្រឹត្តទៅបានគឺត្រូវឆ្លងទៅដល់សភាដើម្បីបានការយល់ព្រមពីស្ថាប័នកំពូលថ្នាក់ជាតិមួយនេះ ពោលគឺមិនមែនជាការរុះរើគណៈរដ្ឋមន្ត្រីធ្វើឡើងដោយកំហឹងនោះទេ។ ទន្ទឹមនេះ លោក ឡេង ប៉េងឡុង អគ្គលេខាធិការ រដ្ឋសភាឲ្យដឹងថា រដ្ឋសភានៅមិនទាន់ទទួលបានលិខិតស្ដីពីបញ្ហាអ្វីមួយពីរដ្ឋាភិបាលនោះទេ។
ប្រសិនការរុះរើគណៈរដ្ឋមន្ត្រីកើតមានឡើងនៅក្នុងឆ្នាំ២០១៦នេះមែន។ នេះជាព្រឹត្តការណ៍ទី០១សម្រាប់រដ្ឋាភិបាលដឹកនាំដោយគណបក្សប្រជាជនកម្ពុជានៅក្នុងអាណត្តិទី៥នេះហើយបន្ទាប់ពីប្រធានគណបក្សកាន់អំណាច លោក ហ៊ុន សែន ផ្ដើមធ្វើកំណែទម្រង់ស៊ីជម្រៅតាំងពីដើមអាណត្តិ ដោយបានរម្លឹកជារើយៗទៅកាន់មន្ត្រីរបស់ខ្លួនថា ត្រូវ មុជ ទឹក ដុះ ក្អែល ឆ្លុះ កញ្ចក់ ជាប្រចាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ