បទល្មើសគ្រឿងញៀន៖ កម្ពុជាចាប់ខ្លួនមេក្លោងគ្រឿងញៀនថៃម្នាក់ ខណៈស្លាប់ជនសង្ស័យម្នាក់
សមត្ថកិច្ចប្រឆាំងគ្រឿងញៀនកម្ពុជា ថ្មីៗនេះ បង្ក្រាបបាន មេក្លោងគ្រឿងញៀនជាជនជាតិថៃម្នាក់ មានប្រវត្តិធ្លាប់សម្លាប់ប៉ូលីសថៃ និងជាមុខសញ្ញាដែលមានដីកាចាប់ខ្លួនជាច្រើនករណី។ ក្នុងចំណោមជនជាតិថៃ៤នាក់ ដែលសមត្ថកិច្ចកម្ពុជាចាប់បាននៅខណ្ឌជ្រោយចង្វារ គឺមានសមាជិករបស់គេម្នាក់ បានបាត់បង់ជីវិត ដោយបើតាមសមត្ថកិច្ច មកពីជនសង្ស័យធ្វើសកម្មភាពតដៃមកលើកម្លាំងសមត្ថកិច្ច។
ចុះផ្សាយនៅថ្ងៃ៖
ស្តាប់ - ០១:៥៦
កម្លាំងជំនាញ(ក៥)នៃមន្ទីរប្រឆាំងបទល្មើសគ្រឿងញៀន នៅថ្ងៃទី៣១ សីហាកន្លងទៅ បង្ក្រាបករណីជួញដូរគ្រឿងញៀនឆ្លងដែន ដោយចាប់ខ្លួនជនជាតិថៃចំនួន៤នាក់ និងរឹបអូសគ្រឿងញៀនជិត ៤២ គីឡូក្រាម។ ប្រតិបត្តិការបង្ក្រាបនេះ ធ្វើឡើងបន្ទាប់ពីការស៊ើបអង្កេតអស់រយៈពេលមួយខែ និងបានឈានទៅចាប់ជនសង្ស័យបាន នៅចំណុច ផ្លូវកែវចិន្តា ស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
តាមការអះអាងរបស់សមត្ថកិច្ច ក្នុងចំណោមជនសង្ស័យទាំង៤នាក់ ដែលសមត្ថកិច្ចបង្ក្រាបបាន ក្នុងនោះ មានមេក្លោងម្នាក់ ជាមុខសញ្ញាមានដីកាកំពុងស្វែងរកចាប់ខ្លួនជាច្រើនករណី។ ជាឃាតករ បាញ់សម្លាប់ប៉ូលិសថៃ និងជាមេក្លោងជួញដូរគ្រឿងញៀននៅថៃថែមទៀតផង។ នៅក្នុងការបង្ក្រាបបទល្មើសនេះ ជនសង្ស័យបានបើករថយន្តបំបុក និងប្រើអាវុធបាញ់មកលើសមត្ថកិច្ចចំនួន ០៨គ្រាប់ ខណៈសមត្ថកិច្ចបានប្រើសិទ្ធិការពារខ្លួនបាញ់តបតវិញ បណ្តាលឱ្យជនសង្ស័យ ០១នាក់ ស្លាប់ និង ០១នាក់ទៀតដែលជាមេក្លោង រងរបួស ។
ជនសង្ស័យជនជាតិថៃ ដែលបានបាត់បង់ជីវិត មានឈ្មោះថា NATTHAPONG POLKHAN ភេទប្រុស ជនជាតិ ថៃអាយុ ២៨ឆ្នាំ ។ ដោយឡែក មេក្លោងគ្រឿងញៀនជនជាតិថៃ មានឈ្មោះថា ណា កូ ភេទប្រុស អាយុ ៤៤ឆ្នាំ។ ទន្ទឹមនឹងនេះ សមត្ថកិច្ចបង្ក្រាបបាន គ្រឿងញៀនសរុបជិត ៤២ គ.ក្រ ក្នុងនោះមាន កេតាមីន(KETAMINE)ទម្ងន់ ១២ គ.ក្រ និងអ៊ិចស្តាស៊ី(MDMA)ទម្ងន់ ជិត៣០ គ.ក្រ។ ក្រៅពីនេះ សមត្ថកិច្ចដកហូត វត្ថុតាង បានរថយន្ត 0២គ្រឿង និងកាំភ្លើងខ្លីចំនួន 0២ដើម។
គួរជម្រាបថា នៅក្នុងពេល៨ខែឆ្នាំ២០២២ អាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា បង្ក្រាបបានបទល្មើសគ្រឿងញៀនជិត៤៤០០ករណី ក្នុងចំណោមជនសង្ស័យដែលបង្ក្រាបបាន គឺប្រមាណពាក់កណ្ដាល គឺជាអ្នកសេពគ្រឿងញៀន ខណៈពាក់កណ្ដាលទៀត ជាអ្នកជួញដូរ អ្នកផលិត និងចរាចរគ្រឿងញៀន រួមទាំងជនបរទេសចំនួន១៥៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ