អ្នកសារព័ត៌មាន ជាង ៥០ ស្លាប់ ក្នុងឆ្នាំ២០២២ នៅលើពិភពលោក
ថ្ងៃទី២វិច្ឆិកា ជាទិវាប្រយុទ្ធប្រឆាំងនឹងនិទ្ទណ្ឌភាពចំពោះឧក្រិដ្ឋកម្មលើអ្នកសារព័ត៌មាន។ អ្នកសារព័ត៌មាន ចំនួន ៥០ នាក់ បានស្លាប់បាត់បង់ជីវិត ក្នុងឆ្នាំ២០២២ នៅលើពិភពលោក ក៏ប៉ុន្តែ ៩០% នៃឧក្រិដ្ឋកម្មលើអ្នកកាសែត មិនទាន់ត្រូវផ្តន្ទាទោស នៅឡើយទេ។ ជុំវិញករណីនេះ ព្រះរាជ្ញអាជ្ញា និងរដ្ឋអាជ្ញា ចំនួន ៨ ប្រទេសផ្សេងៗគ្នា បានសម្តែងការយល់ព្រមទទួលស្គាល់និងទទួលដឹងឮថា ពិតជាមានអំពើនិទ្ទណ្ឌភាពដូច្នេះមែន។
ចុះផ្សាយនៅថ្ងៃ៖
ក្នុងរយៈពេលជាង ១០ ឆ្នាំមកនេះ អ្នកសារព័ត៌មាន ចំនួនជាង ១ ០០០ នាក់ ត្រូវគេសម្លាប់ នៅក្នុងទូទាំងពិភពលោក។ បើគិតត្រឹមតែមួយឆ្នាំ ២០២២ នេះ អ្នកកាសែត ជាង ៥០ នាក់ត្រូវបាត់បង់អាយុជីវិត នៅក្នុងពេលបំពេញការងារសារព័ត៌មាន។ នេះបើយោងតាមអង្គការអ្នកកាសែតគ្មានព្រំដែន ដែលបញ្ជាក់ទៀតថា ចាប់ពីឆ្នាំ ២០១៦ មក អ្នកសារព័ត៌មាន ចំនួន ១១៨ នាក់ ត្រូវបាត់ខ្លួន ហើយ អ្នកកាសែត និង សហការីព័ត៌មាន ចំនួនជាង ៥២០ នាក់ កំពុងតែឋិតនៅក្នុងមន្ទីរឃុំឃាំង នៅក្នុងបណ្តាប្រទេសនានា។
ករណីទាំងនេះ គឺជាការសេចក្តីព្រួយបារម្ភនិងសោកស្តាយជាខ្លាំងចំពោះ អង្គការយូណេស្កូ ដែលមានគម្រោងមួយធ្វើការផ្នែកសិទ្ធិសេរីភាពបញ្ចេញមតិនិងសេរីភាពសារព័ត៌មាន។ អង្គការយូណេស្តូ គូសបង្ហាញថា ៩០%នៃឧក្រិដ្ឋកម្មលើអ្នកកាសែត មិនរងការដាក់ទោសទេ។ ជាក់ស្តែង ប្រទេសម៉ិកស៊ិក ៨៨% នៃករណីឃាតកម្មលើអ្នកសារព័ត៌មាន ដែលឃាតករនិងអ្នករួមគំនិត គ្មានត្រូវផ្តន្ទាទោសអ្វីសោះ។ នៅហ្វីលីពីន ករណីមរណភាពអ្នកកាសែត ជាង៣០នាក់ គឺជនល្មើសនិងអ្នកបញ្ជាពីក្រោយខ្នង នៅតែបន្តមានសេរីភាពនៅឡើយ។ អំពើឃាតកម្មផ្តាច់ជីវិតអ្នកសារព័ត៌មាន នៅប្រទេសបួកគីណាហ្វាសូ, កេនយ៉ា, ម៉ាលី, រុស្ស៊ី, តួកគី, អ៊ីរ៉ង់, អ៊ីស្រាអែល, បាគីស្ថាន, ឥណ្ឌា, និងប្រទេសផ្សេងៗ ក៏នៅមិនទាន់មានយុត្តិធម៌នៅឡើយ សម្រាប់មរណជននិងគ្រួសារសព ។
អង្គការអ្នកកាសែតគ្មានព្រំដែន បានដាស់តឿនថា ការមិនអើពើ និងបណ្តោយឲ្យឃាតកម្មលើអ្នកកាសែត ត្រូវរួចទោស គឺនឹងមិនត្រឹមតែធ្វើឲ្យអំពើឧក្រិដ្ឋកម្ម ក្លាយជារឿងធម្មតាប៉ុណ្ណោះទេ ប៉ុន្តែនេះគឺជាការជំរុញឲ្យប្រព្រឹត្តិឧក្រិដ្ឋកម្មថែមទៀត ហើយនិងបង្កការគំរាមកំហែង ធ្វើទុក្ខបុកម្នេញកាន់តែខ្លាំងចំពោះអ្នកសារព័ត៌មាន។ អង្គការការពារអ្នកកាសែតទូទាំងពិភពលោកមួយនេះ ប្រកាសថា ការប្រល័យអាយុជីវិតអ្នកសារព័ត៌មាន គឺបំផ្លាញសិទ្ធិសេរីភាព យកព័ត៌មាននិងទទួលបានព័ត៌មាន ព្រមទាំងបង្ខើចខ្លីសមត្ថភាពពលរដ្ឋក្នុងការដឹងឮនិងសម្រេចចិត្ត ហើយនេះជាការវាយប្រហារសិទ្ធិមនុស្ស យ៉ាងពេញទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ