ក្រសួងព័ត៌មាននឹងប្តឹងទៅតុលាការឱ្យចាត់ការលើទំព័រហ្វេសប៊ុកដែលប្រឌិតព័ត៌មានពាក់ព័ន្ធមេរោគកូរ៉ូណា
ក្រសួងព័ត៌មានកម្ពុជានឹងប្តឹងម្ចាស់គណនី និងទំព័រហ្វេសប៊ុកណាដែលនៅតែបន្តផ្សព្វផ្សាយព័ត៌មានមិនពិតពាក់ព័ន្ធនឹងបញ្ហារីករាលដាលនៃមេរោគកូរ៉ូណាថ្មី។ នេះបើតាមការគូសបញ្ជាក់ឱ្យដឹងពីលោកផុស សុវណ្ណអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានកម្ពុជានៅព្រឹកថ្ងៃសុក្រនេះ។ បើតាមលោកផុស សុវណ្ណ នៅពេលនេះ ក្រសួងព័ត៌មានមិនអាចបណ្តែតបណ្តោយបញ្ហានេះបានទេ ព្រោះវាកំពុងបំពុលយ៉ាងខ្លាំងដល់សង្គមកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៩
ការព្រមានប្តឹងប្តល់ទៅកាន់តុលាការរបស់ក្រសួងព័ត៌មាននេះ ធ្វើឡើងបន្ទាប់ពីគណនី និងទំព័រមុខមួយចំនួននៅតែបន្តផ្សព្វផ្សាយនូវព័ត៌មានមិនពិតពាក់ព័ន្ធនឹងបញ្ហារីករាលដាលនៃមេរោគកូរ៉ូណា។ គណនីហ្វេសប៊ុកខ្លះបានប្រឌិតព័ត៌មានថា មេរោគកូរ៉ូណាកំពុងរាតត្បាតនៅក្នុងមន្ទីរពេទ្យក្នុងរាជធានីភ្នំពេញ ហើយខ្លះទៀតថា មានករណីស្លាប់ដោយសារមេរោគនេះនៅក្នុងផ្សារអូឡាំពិកជាដើម។ ព័ត៌មានទាំងអស់នេះ ត្រូវបានក្រសួងសុខាភិបាលកម្ពុជាចេញមកទាត់ចោលភ្លាមៗ ដោយគូសបញ្ជាក់ថា ជាព័ត៌មានប្រឌិតបំពុលសង្គម និងថា ព័ត៌មានប្រឌិតត្រូវផ្តន្ទាទោសតាមច្បាប់។
ប៉ុន្តែមកដល់ពេលនេះ នៅមិនទាន់ឃើញមានម្ចាស់គណនី និងទំព័រហ្វេសប៊ុកណាម្នាក់ត្រូវបានអាជ្ញាធរនាំខ្លួនមកចាត់ការតាមផ្លូវច្បាប់នៅឡើយទេ។ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ និងជាអ្នកនាំពាក្យក្រសួងព័ត៌មានកម្ពុជា លោកផុស សុវណ្ណ បានអះអាងថា គណនី និងទំព័រហ្វេសប៊ុកដែលបានបន្តផ្សព្វផ្សាយព័ត៌មានមិនពិតពីបញ្ហាមេរោគកូរ៉ូណា គឺស្ថិតនៅក្រៅប្រទេស ដែលនេះធ្វើឱ្យមានការលំបាកបន្តិចក្នុងការចាត់ការតាមផ្លូវច្បាប់។ តែទោះជាបែបនេះក្តី លោកបញ្ជាក់ថា នៅពេលនេះ ក្រសួងព័ត៌មានកំពុងតាមដាន និងកំពុងប្រមូលភស្តុតាងនានាពីគណនី និងទំព័រហ្វេសប៊ុកទាំងអស់នោះ ដើម្បីរៀបចំប្តឹងទៅកាន់តុលាការនៅពេលខាងមុខនេះ។
សូមបញ្ជាក់ថា នៅពេលនេះ ក្រសួងព័ត៌មានកម្ពុជាកំពុងសហការជាមួយក្រសួងប្រៃយ៍ណី និងក្រសួងមហាផ្ទៃ ដើម្បីចាត់ការទៅលើគណនី និងទំព័រហ្វេសប៊ុកដែលពូកែខាងប្រឌិតព័ត៌មានមិនពិតបំពុលសង្គម។ កន្លងទៅថ្មីៗនេះ ក្រសួងព័ត៌មានបានផ្ញើគណនី និងទំព័រហ្វេសប៊ុកចំនួន៥ទៅកាន់ក្រុមហ៊ុនហ្វេសប៊ុក ដើម្បីឱ្យជួយបិទ។ ប៉ុន្តែ ក្រុមហ៊ុនហ្វេសប៊ុក បានបិទតែលើទំព័រមួយឈ្មោះថា «ព័ត៌មានពិត ពីកម្ពុជា» ប៉ុណ្ណោះ។ ការបិទនេះ គឺដោយសារតែទំព័រហ្វេសប៊ុកនេះបានផ្សព្វផ្សាយព័ត៌មានជាបន្តបន្ទាប់ពាក់ព័ន្ធនឹងបញ្ហាមេរោគឆ្លងកូរ៉ូណា។ រីឯ គណនី និងទំព័រហ្វេសប៊ុកផ្សេងទៀត ក្រសួងព័ត៌មានកំពុងរង់ចាំការឆ្លើយតបពីក្រុមហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ