លោកដូណាល់ ត្រាំ តែងតាំងឧត្តមសេនីយ៍កងទ័ពម្នាក់ទៀត ជារដ្ឋមន្ត្រីក្រសួងមហាផ្ទៃ
លោក ដូណាល់ ត្រាំ អនាគតប្រធានាធិបតីអាមេរិក បានជ្រើសរើសអតីតមន្ត្រីយោធាម្នាក់ទៀតហើយ ឱ្យកាន់តំណែងជារដ្ឋមន្ត្រីនៅក្នុងរដ្ឋាបាលថ្មីរបស់លោក។ នោះគឺលោក John Kelly ! ជាអតីតនាយទាហានចូលនិវត្តន៍ លោក ចន ឃែលី នឹងទទួលបន្ទុកដឹកនាំក្រសួងមហាផ្ទៃ និងការពារព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ក្នុងវ័យ៦៦ឆ្នាំ ជាអតីតឧត្តមសេនីយ៍ក្នុងជួរកងទ័ព លោក ចន ឃែលី ជាឥស្សរជនដ៏មានបទពិសោធន៍ ក្នុងវិស័យយោធា និងធ្លាប់បានឆ្លងកាត់សមរភូមិក្តៅជាច្រើន។ លោកចន ឃែលី បានចេញបំរើកងទ័ព នៅអាយុ២០ឆ្នាំ ពេលអាមេរិកកំពុងធ្វើសង្គ្រាមនៅវៀតណាម។ លោកក៏ធ្លាប់បានចេញទៅប្រយុទ្ធក្នុងសមរភូមិ នៅប្រទេសអ៊ីរ៉ាក់ និងជាមេទាហានរងរបស់លោក James Mattis អនាគតរដ្ឋមន្ត្រីក្រសួងការពារអាមេរិករបស់លោក ត្រាំដែរ។
លោកឃែលី បានបាត់បង់កូនប្រុសម្នាក់ ដែលធ្វើជាយោធាដែរ ក្នុងពេលចុះទៅបំពេញបេសកកម្មនៅប្រទេសអាហ្វហ្កានីស្ថាន។ មុននឹងចូលនិវត្តន៍ ពីឆ្នាំ២០១២-២០១៦ លោក ចន ឃែលី មានតួនាទីជាមេបញ្ជាការកងទ័ពអាមេរិកប្រចាំតំបន់អាមេរិកឡាទីន US Southern Command។ ជាមួយតួនាទីនេះ លោកចន ឃែលី គឺជាអ្នកទទួលខុសត្រូវលើពន្ធនាគារយោធាដ៏ចម្រូងចម្រាស Guantanamo នៅកោះគុយបា និងការប្រយុទ្ធប្រឆាំងនឹងការជួញដូរគ្រឿងញៀន។
ស្គាល់ច្បាស់ព្រឹទ្ធសភាអាមេរិក ព្រោះធ្លាប់ធ្វើនាយទាហានប្រចាំសភាពីឆ្នាំ១៩៩៥-១៩៩៩ លោក ឃែលី ក៏បានបម្រើរដ្ឋបាលអូបាម៉ា ដោយមិនលាក់បាំងជំហរប្រឆាំងនឹងរដ្ឋាភិបាលនេះទេ។
ជាមួយនឹងបទពិសោធន៍ដ៏ច្រើនបែបនេះ លោក ចន ឃែលី ពិតជាអាចជួយលោកដូណាល់ ត្រាំ សម្រេចការសាងសង់ជញ្ជាំងនៅតាមព្រំប្រទល់ជាមួយប្រទេសម៉ិចស៊ិក។ “លោក ឃេលីជាឥស្សរជនដ៏សក្តិសម សម្រាប់ដឹកនាំបេសកកម្មបញ្ឈប់លំហូរអន្តោប្រវេសន៍ខុសច្បាប់ ព្រមទាំងធានាឱ្យបាននូវសន្តិសុខតាមព្រំដែន”។ នេះជាប្រសាសន៍របស់លោក ដូណាល់ ត្រាំ នៅក្នុងសេចក្តីថ្លែងការណ៍។
លោក ដូណាល់ ត្រាំ ដែលនឹងចូលកាន់តំណែងជាប្រធានាធិបតីអាមេរិកចាប់ពីថ្ងៃទី ២០ មករា ២០១៧ បានតែងតាំងឧត្តមសេនីយ៍ចូលនិវត្តន៍ម្នាក់ លោក MIchiael Flynn ជាទីប្រឹក្សាសន្តិសុខជាតិ និងឧត្តមសេនីយ៍កងទ័ព James Mattis ជារដ្ឋមន្ត្រីក្រសួងការពារជាតិ។ ជម្រើសយកឧត្តមសេនីយ៍ ដូចយ៉ាង លោក ឃែលី ឬលោក ម៉ាទីស បានធ្វើឱ្យអនាគតរដ្ឋបាលលោកត្រាំ ទទួលការគោរពខ្លាំង ប៉ុន្តែក៏បានបង្កបង្កើតក្តីព្រួយបារម្ភខ្លាំង ព្រោះរដ្ឋាភិបាលថ្មីនេះមានទម្រង់ជាយោធាគ្រប់គ្រងអំណាចស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ