រុស្ស៊ីជួយដូណាល់ ត្រាំឲ្យឈ្នះឆ្នោតមែនទេ? អូបាម៉ាបញ្ជាឲ្យស្រាវជ្រាវលំអិតដើម្បីរកការពិត
ចុះផ្សាយនៅថ្ងៃ៖
ថ្ងៃសុក្រទី ៩ ធ្នូ សារព័ត៌មានWashington Post បានចុះផ្សាយរបាយការណ៍សំងាត់មួយ របស់ភ្នាក់ងារស៊ើបការអាមេរិក CIA ដែលភ្នាក់ងារនេះ បានសន្និដ្ឋានថា គឺរដ្ឋាភិបាលរុស្ស៊ីដែលជាអ្នកនៅពីក្រោយ នៃការបែកធ្លាយឯកសារនានា ទាក់ទិននឹងបេក្ខភាពប្រធានាធិបតីរបស់លោកស្រី គ្លីនតុន។ ជារួម គឺរុស្ស៊ីបានជួយលោកដូណាល់ ត្រាំ ឲ្យឈ្នះការបោះឆ្នោត តាមរយៈការធ្វើឲ្យបែកធ្លាយរឿងអាស្រូវរបស់លោកស្រីគ្លីនតុន។ នៅថ្ងៃសៅរ៍ទី១០ធ្នូនេះ លោកអូបាម៉ា បានបញ្ជាឲ្យគេធ្វើរបាយការណ៍លំអិត ដើម្បីស្វែងរកការពិត ជុំវិញរឿងរ៉ាវនេះ។
CIA ថា រុស្ស៊ីបានចូលរួមចំណែកជួយឲ្យដូណាល់ ត្រាំ ឈ្នះឆ្នោត៖
សារព័ត៌មានWashington Post បានចុះផ្សាយថា ក្រុមការងាររបស់ CIA បានធ្វើបទបង្ហាញស្តីពីការស៊ើបអង្កេត និងការសន្និដ្ឋានរបស់ខ្លួន ទៅកាន់សមាជិកព្រឹទ្ធសភាមួយក្រុម កាលពីមួយសប្តាហ៍កន្លងទៅ។ ការស៊ើបអង្កេតនោះ គឺទាក់ទិនទៅនឹង ការចូលទៅលួចយកសារអ៊ីមែល និងឯកសារនានា ដែលទាក់ទងទៅនឹងលោកស្រីគ្លីនតុន ក្នុងអំឡុងពេលឃោសនាបោះឆ្នោត។ ឯកសារទាំងអស់នេះ ត្រូវបានជនមិនស្គាល់មុខ ដែលជាចោរព័ត៌មានវិទ្យា យកទៅឲ្យគេហទំព័រ Wikileaks ជាអ្នកផ្សាយបន្ត។
បើតាមការសន្និដ្ឋាន របស់ CIA គឺគេប្រាកដណាស់ ថា រុស្ស៊ីគឺជាអ្នកនៅពីក្រោយសកម្មភាពនេះ។ មិនត្រឹមតែប៉ុណ្ណោះ ខាងCIA ថែមទាំងឈានទៅសន្និដ្ឋានអំពីកម្មវត្ថុ របស់រុស្ស៊ី ដែលបានធ្វើទង្វើនេះ ពោលគឺរុស្ស៊ីចង់ឲ្យដូណាល់ ត្រាំឈ្នះឆ្នោត តាមរយៈការបង្អាក់ប្រជាប្រិយភាពរបស់លោកស្រីគ្លីនតុន។
តាមការពិត រឿងរ៉ាវដែលគេចោទថារុស្ស៊ីជាអ្នកនៅពីក្រោយការទំលាយឯកសារនានារបស់លោកស្រីគ្លីនតុននេះ គឺត្រូវបានគេនិយាយតាំងតែពីខែតុលាម្លេះ។ កាលនោះ គឺថ្ងៃទី៧ ខែតុលា ការិយាល័យសន្តិសុខផ្ទៃក្នុង និងនាយកដ្ឋានស៊ើបការណ៍សម្ងាត់របស់អាមេរិក បានចេញរបាយការណ៍រួមគ្នា ដោយលើកឡើងថា រុស្ស៊ីអាចជាអ្នកដែលនៅពីក្រោយការទម្លាយឯកសារទាំងអស់នោះ។
ចំណែក គេហទំព័រ Wikileaks ដែលជាអ្នកផ្សព្វផ្សាយឯកសារសម្ងាត់ទាំងនេះវិញ បានលើកឡើងថា ខ្លួនគ្មានចេទនានយោបាយអ្វីទេ តែខ្លួនបានចាញ់បោកគេ ព្រោះមិនបានដឹងពីព្រភពអ្នកដែលផ្តល់ឯកសារនេះថា ជាភ្នាក់ងារទទួលបញ្ជាពីរុស្ស៊ី។
តែយ៉ាងណា អ្វីៗគឺវាស្ថិតលើការសន្និដ្ឋានទាំងអស់ ព្រោះ កាសែត Washington Post បានឆ្លៀតបញ្ជាក់ថា CIA ពុំមានភស្តុតាងជាក់ស្តែងណាមួយ ដែលសំអាងថា អ្នកដែលលួចយកទិន្ន័យឯកសារទាំងនោះ គឺជាភ្នាក់ងាររបស់រុស្ស៊ីទេ ហើយក៏គ្មានភស្តុតាងបញ្ជាក់ថា ខាងរដ្ឋាភិបាលរុស្ស៊ីជាអ្នកបញ្ជាដែរ។ មិនត្រឹមតែប៉ុណ្ណោះ ការសន្និដ្ឋានរបស់CIA គឺវាជាការសន្និដ្ឋានដែលមិនឆ្លុះបញ្ចាំង អំពីគោលជំហរ របស់ទីភ្នាក់ងារស៊ើបអង្កេតទាំង១៧ផ្សេងទៀត របស់អាមេរិកទេ។
សំអុយបេក្ខជនម្ខាង ដូចជួយលើកបេក្ខជនម្ខាងទៀត៖
និយាយឲ្យងាយយល់ គឺបេក្ខជនឈរឈ្មោះបោះឆ្នោត មានពីរនាក់។ បើកាលណាយើងវាយប្រហារ បញ្ចេញឯកសារសំងាត់ ទំលាយរឿងអាស្រូវរបស់បេក្ខជនតែម្ខាង មានន័យថា យើងចង់ឲ្យមតិសាធារណៈស្អប់បេក្ខជននោះ ហើយ មិនបោះឆ្នោតឲ្យបេក្ខជននោះ អញ្ចឹងមានន័យថា យើងគាំទ្របេក្ខជនមួយទៀត ចង់ឲ្យបេក្ខជនមួយទៀតនោះឈ្នះ។
កាលពីអំឡុងពេលឃោសនាបោះឆ្នោត មានឯកសារជាច្រើន បានបែកធ្លាយជាបន្តបន្ទាប់ ដែលធ្វើឲ្យភាគីខាងលោកស្រីគ្លីនតុនចុះខ្សោយយ៉ាងខ្លាំង។ ជាក់ស្តែង នៅរវាងខែកក្កដា មានការបែកធ្លាយសារអ៊ីមែល ឆ្លើយឆ្លងដែលបង្ហាញថាក្រុមប្រឹក្សាគណបក្សប្រជាធិបតេយ្យ បានមានភាពលំអៀង ចង់ឲ្យលោកស្រីគ្លីនតុន ក្លាយជាបេក្ខជនប្រធានាធិបតី ជាជាងលោក ប៊ែរនី សេនឌើជាដើម។ រឿងអាស្រូវនេះ បានធ្វើឲ្យលោកស្រី ប្រធានគណបក្សប្រជាធិបតេយ្យចុះចេញពីតំណេងភ្លាមៗ។ ក្រោយមកទៀត នៅមានការទំលាយសារអ៊ីមែល របស់អ្នកទទួលបន្ទុកចាត់ចែងការឃោសនាបោះឆ្នោតរបស់លោកស្រីគ្លីនតុន ព្រមទាំងការឆ្លើយឆ្លងនានា រវាងលោកស្រីគ្លីនតុន និងក្រុមប្រធានាធនាគាធំៗ ដែលបង្ហាញពីការស៊ុំគ្រលំគ្នារឿងលុយកាក់។
ជារួម ការបែកធ្លាយរឿងអាស្រូវកន្លងមកនេះ គឺបេក្ខភាពលោកស្រីគ្លីនតុន ជាអ្នករងគ្រោះ ជាអ្នកខាត។ ដូច្នេះហើយបានជាគេសន្និដ្ឋានថា អ្នកដែលនៅពីក្រោយការទម្លាយរឿងរ៉ាងទាំងនេះ គឺមានបំណងតែមួយគត់ គឺចង់ឲ្យលោកស្រីគ្លីនតុនចាញ់ឆ្នោត។
ក្រោយការចុះផ្សាយរបស់ Wikileaks សូម្បីតែFBI ក៏បានធ្វើការសង្ស័យដែរថា គឺភ្នាក់ងាររបស់រុស្ស៊ី ដែលជាអ្នកយកឯកសារទាំងនោះទៅឲ្យWikileaks ចុះផ្សាយ។ មិនត្រឹមតែប៉ុណ្ណោះ គឺលោកដូណាល់ ត្រាំខ្លួនឯងហ្នឹងទៀត ដែលស្រែកថា បើរុស្ស៊ី មានឯកសារសំងាត់ណាទៀត ដែលនិយាយអាក្រក់ពីលោកស្រីគ្លីនតុន សូមទម្លាយវាឲ្យអស់មក។ អញ្ចឹងមានន័យថា លោកត្រាំ គាត់សប្បាយរីករាយណាស់ ព្រោះគាត់ជាអ្នកទទួលផលចំណេញ។
លោកអូបាម៉ា បញ្ជាឲ្យស៊ើបអង្កេតស៊ីជំរៅ និងល្អិតល្អន់ មុនលោកចប់អាណត្តិ៖
លោកអូបាម៉ា នៅសល់ពេលតែជាងមួយខែទៀតប៉ុណ្ណោះ។ ដូច្នេះគាត់ចង់ឲ្យការពិត ទាក់ទិនសំណុំរឿងនេះ ត្រូវបង្ហាញជូនសាធារណៈជន។ លោកអូបាម៉ា ក៏ដូចជាមនុស្សនៅជុំវិញគាត់ ជឿថា បើមិនធ្វើវានៅពេលនេះទេ គឺកុំសង្ឃឹមថាលោកដូណាល់ ត្រាំ ធ្វើរឿងនេះឲ្យសោះ។ លោកត្រាំ និងផ្អឹបសំណុំរឿងនេះចោលនៅគ្រលៀតជញ្ជាំងមិនខានទេ។ ដើមឡើយគឺក្រុមតំណាងរាស្ត្រមកពីគណបក្សប្រជាធិតេយ្យទេដែលបានប្រមូលគ្នា សរសេរលិខិតទៅកាន់លោកអូបាម៉ា សុំឲ្យលោកអូបាម៉ា ដាក់បញ្ជាឲ្យមានកាស៊ើបអង្កេតស៊ីជំរៅ។
លោក Eric Schultz អ្នកនាំពាក្យសេតវិមានបានបញ្ជាក់ថា រដ្ឋាភិបាលលោកអូបាម៉ា សម្រេចបញ្ជា ឲ្យមានការស៊ើបអង្កេតស៊ីជំរៅ គឺមិនមែនចង់មកសើររើលទ្ធផលបោះឆ្នោតកន្លងមកនេះទេ។ តែការស៊ើបអង្កេតរកប្រភព និងចំណុចខ្សោយឲ្យបានល្អិតល្អន់នេះ គឺដើម្បីបង្ការបញ្ហាបែបនេះទៅថ្ងៃក្រោយ។ វាជាការស្វែងយល់ពីបទពិសោធន៍កន្លងមក។ យ៉ាងណាមិញ នេះមិនមែនជាលើកទីមួយទេ ដែលមានការចូលមកលួចយកឯកសារសំងាត់ ហើយផ្សព្វផ្សាយ ដើម្បីចូលច្រៀតជ្រែកក្នុងការបោះឆ្នោតនៅអាមេរិក ពីសំណាក់ប្រទេសដ៏ទៃ។ កាលពីពេលបោះឆ្នោតឆ្នាំ២០០៨ ក៏មានរឿងស្រដៀងគ្នានេះដែរ តែកាលនោះគេស្រាវជ្រាវដឹងថា អ្នកដែលចូលទៅលួច គឺមានប្រភពនៅចិន។
ហេតុផលមួយទៀត ដែលជំរុញឲ្យលោកអូបាម៉ា បញ្ជាឲ្យមានការស៊ើបអង្កេតស៊ីជំរៅ ដ៏តក់ក្រហល់បែបនេះ គឺដោយសារលោកអូបាម៉ា ក៏ដូចជាគណបក្សប្រជាធិបតេយ្យ ចង់យករបាយការណ៍នេះ ទៅវាយបកលោកដូណាល់ត្រាំវិញ នៅថ្ងៃក្រោយ នៅពេលណាដែលលោកត្រាំ សម្រេចបត់ក្បាលនយោបាយអាមេរិក ឲ្យដើរទៅជិតនឹងប្រធានាធិបតីពូទីន។ បើដូណាល់ ត្រាំ និងពូទីនក្លាយជាមិត្តនឹងគ្នាល្អូកល្អឺនទៅថ្ងៃមុខមែន នោះមានន័យថា ការដែលគេសង្ស័យកន្លងមក គឺមិនខុសទេ ហើយប្រជាជនអាមេរិកយកបញ្ហានេះ ទៅពិចារណា ដោយខ្លួនឯងចុះសម្រាប់អាណត្តិក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ