លោកអូបាម៉ា៖សង្រ្គាមប្រឆំាងនឹងអង្គការរដ្ឋអ៊ីស្លាមមិនទទួលបរ៉ាជ័យទេ
ជោគជ័យផ្លូវយោធារបស់អង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងនៅក្នុងប្រទេសស៊ីរីបាន និងកំពុងបន្តឲ្យមានការជជែកដេញដោលយ៉ាងខ្លំាងនៅសហរដ្ឋអាមេរិក។ ក្រុមអ្នកសាធារណរដ្ឋមិនញញើតនឹងរិះគន់ វាយប្រហារលើយុទ្ធសាស្រ្តរបស់លោកអូបាម៉ា និងការសន្យារបស់អាមេរិកមិនគ្រប់គ្រាន់ក្នុងការប្រយុទ្ធប្រឆំាងនឹងពួកជីហាតអង្គការរដ្ឋអ៊ីស្លាម។ តែសេតវិមាន និងក្រសួងការពារជាតិអាមេរិកបានព្យាយាមពន្យល់បកស្រាយចំពោះហេតុការណ៍ថ្មីចុងក្រោយនៃការធ្លាក់ទីក្រុងរ៉ាម៉ាឌីទឹកដីអ៊ីរ៉ាក់ និងទីក្រុងបុរាណប៉ាល់មៀរទឹកដីស៊ីរីទៅក្នុងកណ្តាប់ដៃអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០១:៥៥
ទោះបីជាកម្លំាងសម្ព័ន្ធមិត្តដឹកនំាដោយអាមេរិកកំពុងអាម៉ាស់យ៉ាងខ្លំាងនៅចំពោះមុខការរុលទៅមុខគួរឲ្យគ្រោះថ្នាក់របស់កម្លំាងប្រដាប់អាវុធអង្គការរដ្ឋអ៊ីស្លាមនៅអ៊ីរ៉ាក់ និងស៊ីរីក៏ដោយ ក៏លោកប្រធានាធិបតីអាមេរិកអូបាម៉ាបានបញ្ជាក់ក្តែងៗថា សង្រ្គាមប្រឆំាងនឹងអង្គការរដ្ឋអ៊ីស្លាមមិនទទួលបរ៉ាជ័យទេ។ តែបញ្ហានៅត្រង់ថា សេចក្តីថ្លែងរបស់លោកអូបាម៉ាយ៉ាងដូចនេះត្រូវបានក្រុមអ្នកសាធារណរដ្ឋដែលជាពួកប្រឆំាងនៅសភាធ្វើការសើចចំអក និងរិះគន់យ៉ាងចាស់ដៃ។ ក្រុមអ្នកសាធារណរដ្ឋបានស្តីបន្ទោសលើយុទ្ធសាស្រ្តទន់ខ្សោយរបស់លោកអូបាម៉ានៅក្នុងយុទ្ធនាការប្រឆំាងនឹងពួកជីហាតអង្គការរដ្ឋអ៊ីស្លាម និងបានស្នើឲ្យលោកអូបាម៉ាបញ្ជូនកម្លំាងទ័ពថ្មើរជើងទៅជួយកម្លំាងផ្លូវអាកាស។ គឺជាសំណើមួយដែលសេតវិមានបានបដិសេធតំាងពីដើមមក និងចង់កម្រិតអន្តរាគមន៍តែតាមផ្លូវអាកាសប៉ុណ្ណោះ។
តែបញ្ហានៅត្រង់ថា អន្តរាគមន៍តែតាមផ្លូវអាកាសហាក់ដូចជាគ្មានប្រសិទ្ធិភាព និងបែរជាបានធ្វើឲ្យពួកជីហាតអង្គការរដ្ឋអ៊ីស្លាមកាន់តែឡើងដៃខ្លំាងទៅវិញ។ ជាក់ស្តែងមិនអាចប្រកែកបាន គឺការធ្លាក់ទីក្រុងរ៉ាម៉ាឌីរបស់អ៊ីរ៉ាក់ និងទីក្រុងបុរាណប៉ាល់មៀររបស់ទៅក្នុងកណ្តាប់ដៃអង្គការរដ្ឋអ៊ីស្លាមនាពេលថ្មីៗនេះ។ ការបាត់បង់ទីក្រុងរ៉ាម៉ាឌីរបស់អ៊ីរ៉ាក់ត្រូវបានក្រសួងការពារជាតិអាមេរិកទម្លាក់កំហុសដាក់កម្លំាងទ័ពអ៊ីរ៉ាក់។ មេបញ្ជាការអាមេរិកលោកឧត្តមសេនីយ Dempsey បានបញ្ជាក់ថា កងទ័ពអ៊ីរ៉ាក់មិនត្រូវបានពួកជីហាតអង្គការរដ្ឋអ៊ីស្លាមវាយបណ្តេញចេញពីទីក្រុងរ៉ាម៉ាឌីទេ តែពួកគេបានដកថយដោយខ្លួនឯងដោយគេយល់ច្រឡំថា ស្មានតែកម្លំាងសម្ព័ន្ធមិត្តបើកការវាយប្រហារជួយគំាទ្រតាមផ្លូវអាកាស។
ឧត្តមសេនីយ Dempsey រូបនេះដដែលបានយល់ឃើញថា បរាជ័យរបស់ទ័ពអ៊ីរ៉ាក់នៅរ៉ាម៉ាឌីជាកំហុសឆ្គងយុទ្ធសាស្រ្តមួយយ៉ាងធំ ពោលមិនមែនដោយសារតែពួកជីហាតអង្គការរដ្ឋអ៊ីស្លាមមានកម្លំាងខ្លំាងជាងនោះទេ។ អ្វីដែលឧត្តមសេនីយអាមេរិករូបនេះចង់បញ្ជាក់ គឺភាពទន់ខ្សោយរបស់កម្លំាងទ័ពអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ