លោក ទាវ វណ្ណុល នឹងចូលបំភ្លឺនៅតុលាការតាមបណ្តឹងរបស់រដ្ឋាភិបាល
លោក ទាវ វណ្ណុល ប្រធានគណបក្សភ្លើងទៀននឹងចូលទៅបំភ្លឺនៅអយ្យការអមសាលាដំបូងរាជធានីភ្នំពេញនៅព្រឹកថ្ងៃទី២៥ ខែមេសា ពាក់ព័ន្ធនឹងបណ្ដឹងរបស់មេធាវីតំណាងរដ្ឋាភិបាលកម្ពុជា។ មេធាវីរដ្ឋាភិបាលដែលបានប្តឹងលោក ទាវ វណ្ណុល ថាបានធ្វើឲ្យប៉ះពាល់ដល់កិត្តិយសប្រមុខរដ្ឋាភិបាលនៅក្នុងបទសម្ភាសន៍របស់លោកជាមួយសារព័ត៌មាន Nikkei Asia នាពេលវត្តមាននៅជប៉ុនកាលពីដើមខែកុម្ភៈ។ បទសម្ភាសន៍កាលណោះក៏ត្រូវបានវិទ្យុបារាំង RFI ដកស្រង់ផ្សាយបន្តដែរ តែបានដកស្រង់ចេញពីកាសែតជប៉ុនឈ្មោះ Shimbun Akahata ពោលមិនមែនកាសែត Nikkei Asia ទេ។
ចុះផ្សាយនៅថ្ងៃ៖
ស្តាប់ - ០២:៤៨
ពីដំបូង លោក ទាវ វណ្ណុល ត្រូវបានតុលាការកោះហៅឲ្យចូលបំភ្លឺនៅថ្ងៃទី១០ ខែមេសា តែមេធាវីរបស់លោកបានសុំពន្យារចូលបំភ្លឺនៅថ្ងៃទី២៥ ខែមេសាវិញ បន្ទាប់ពីប្រធានគណបក្សភ្លើងទៀនរូបនេះបានវិលមកពីពិនិត្យសុខភាពនៅសហរដ្ឋអាមេរិករយៈពេលជិត២ខែ។
បណ្តឹងប្រឆាំងលោក ទាវ វណ្ណុលនេះ គឺយោងលើការផ្សាយរបស់សារព័ត៌មានជប៉ុន Nikkei Asia និងវិទ្យុបារាំងអន្តរជាតិ RFI កាលពីថ្ងៃទី៥ ខែកុម្ភៈកន្លងទៅ។ តែនៅក្នុងការផ្សាយរបស់ RFI ក្នុងថ្ងៃទី៥ កុម្ភៈ RFI បានដកស្រង់ខ្លឹមសារនៃការចុះផ្សាយរបស់កាសែតជប៉ុនឈ្មោះ Shimbun Akahata ចេញផ្សាយនៅថ្ងៃទី៤ ខែកុម្ភៈដែលថា លោក ទាវ វណ្ណុល បានប្រាប់លោក Akira Koike អគ្គលេខាធិការបក្សកុម្មុយនីស្តជប៉ុន និងជាសមាជិកសភា ពីការដែលរដ្ឋាភិបាលកម្ពុជាបានដំឡើងកាំម៉ារ៉ាឃ្លាំមើលនៅខាងមុខផ្ទះរបស់លោកក្នុងក្រុងភ្នំពេញ។
ទន្ទឹមគ្នានោះ មេបក្សភ្លើងទៀនរូបនេះ ក៏បានចោទរដ្ឋាភិបាលកម្ពុជាថាបានចាប់ឃុំខ្លួនមន្ត្រីបក្សប្រឆាំង និងពលរដ្ឋដែលរិះគន់រដ្ឋាភិបាលជាបន្តបន្ទាប់។ តែនៅក្នុងសេចក្តីថ្លែងការណ៍មួយចេញផ្សាយកាលពីថ្ងៃទី៧ ខែកុម្ភៈ អ្នកនាំពាក្យរដ្ឋាភិបាលកម្ពុជាបានបដិសេធលើការលើកឡើងរបស់លោក ទាវ វណ្ណុល និងបានចាត់ទុកជា «ការចោទប្រកាន់លើរដ្ឋាភិបាលទាំងបំពាន និងខុសពីការពិត»។ បន្ទាប់មក រឿងនេះក៏ត្រូវបានមេធាវីរដ្ឋាភិបាលប្តឹង លោកទាវ វណ្ណុល ទៅតុលាការ។
ទោះជាយ៉ាងណា តាមការចុះផ្សាយរបស់កាសែតជប៉ុនឈ្មោះ Shimbun Akahata ក្នុងថ្ងៃទី៤ ខែកុម្ភៈ អគ្គលេខាធិការបក្សកុម្មុយនីស្តជប៉ុន និងជាសមាជិកសភាលោក Akira Koike បានប្រាប់លោកទាវ វណ្ណុលថា ការរំលោភសិទ្ធិមនុស្សធ្ងន់ធ្ងរមិនគួរកើតមាននៅកម្ពុជា និងថា សេរីភាពនៃការបញ្ចេញមតិ និងការបោះឆ្នោតដោយសេរី ត្រឹមត្រូវ និងយុត្តិធម៌ជាមូលដ្ឋាននៃលទ្ធិប្រជាធិបតេយ្យ។
បើតាមគណបក្សភ្លើងទៀន នៅក្នុងដំណើរទស្សនកិច្ចទៅជប៉ុនកាលពីដើមខែកុម្ភៈ លោក ទាវ វណ្ណុល បានផ្តល់សម្ភាសឲ្យសារព័ត៌មានជប៉ុនជាច្រើន ដូចជា Shimbun Akahata, Nippon TV Yomiuri Shimbun NHK Kyodo News Asahi Shimbun និង Sankei Shimbun តែមិនបានរំលេចពីការផ្តល់បទសម្ភាសឲ្យ Nikkei Asia ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ