ព្រែកជីកហ្វូណន៖ អាមេរិកថាខ្លួនមិនពាក់ព័ន្ធតែចង់ឃើញការពិភាក្សាប្រកបដោយតម្លាភាព
ស្ថានទូតអាមេរិកប្រចាំកម្ពុជាបានបញ្ជាក់ប្រាប់វិទ្យុបារាំង RFI នៅថ្ងៃពុធ ទី០១ ខែឧសភានេះថា អាមេរិកមិនពាក់ព័ន្ធនឹងបញ្ហាព្រែកជីកហ្វូណនទេ ក៏ប៉ុន្តែអាមេរិកស្នើឲ្យកម្ពុជាអនុវត្តការជីកព្រែកនេះ ប្រកបដោយតម្លាភាព។ ការលើកឡើងរបស់សហរដ្ឋអាមេរិក ស្របពេលដែលនាយករដ្ឋមន្ត្រីកម្ពុជា លោក ហ៊ុន ម៉ាណែត បានប្រកាសជំហរសាជាថ្មីថា កម្ពុជាត្រូវតែជីកព្រែកហ្វូណននេះឲ្យបាន។
ចុះផ្សាយនៅថ្ងៃ៖
ស្តាប់ - ០២:៣៤
ជុំវិញបញ្ហាព្រែកជីកហ្វូណនដ៏ចម្រូងចម្រាសរបស់កម្ពុជា សហរដ្ឋអាមេរិក តាមរយៈស្ថានទូតនៅទីក្រុងភ្នំពេញអះអាងថា អាមេរិកមិនជ្រៀតជ្រែកចូលក្នុងផ្នែកសេដ្ឋកិច្ច និងការភិវឌ្ឍន៍ ដែលជាការសម្រេចចិត្តរបស់ប្រជាជនកម្ពុជា។ អ្នកនាំពាក្យស្ថានទូតអាមេរិកប្រចាំកម្ពុជាលោក Wesley Holzer បានប្រាប់វិទ្យុបារាំងRFI នៅថ្ងៃពុធនេះថា អាមេរិកក្នុងនាមជាមិត្តកម្ពុជា និងជាមិត្តជាមួយប្រទេសផ្សេងទៀត នៅក្នុងតំបន់ លើកទឹកចិត្តឲ្យកម្ពុជាប្រើប្រាស់យន្តការតំបន់ដើម្បីពិភាក្សាជាមួយប្រទេសជិតខាងប្រកបដោយតម្លាភាព។ បើតាមអ្នកនាំពាក្យស្ថានទូតអាមេរិក ការដោះស្រាយបញ្ហា និងកង្វល់នានា ដែលបានឮចេញពីគ្នាទៅវិញទៅមក គឺជាដំណោះស្រាយដ៏ល្អ។
តែលោក ហ៊ុន សែន ប្រធានព្រឹទ្ធសភាកម្ពុជា កាលពីថ្ងៃទី២៦ ខែមេសាកន្លងទៅ បានបញ្ជាក់ច្បាស់ៗរឿងគម្រោងព្រែកជីកហ្វូណននេះថា កម្ពុជានឹងមិនចរចាជាមួយវៀតណាម ឬប្រទេសជាសមាជិកនៃគណៈកម្មាការទន្លេមេគង្គណាទាំងអស់។
នៅថ្ងៃពុធនេះដែរ លោកនាយករដ្ឋមន្ត្រី ហ៊ុន ម៉ាណែត បានប្រកាសជាថ្មីថា ដាច់ខាតកម្ពុជាត្រូវតែធ្វើឲ្យបានរឿងព្រែកជីកហ្វូណន ទោះជាមានឬមិនមានការវិនិយោគពីក្រុមហ៊ុនបរទេសក៏ដោយ។ ដោយផ្តោតសំខាន់ទៅលើទឹកចិត្តគាំទ្រដ៏ធំធេងពីពលរដ្ឋ លោកនាយករដ្ឋមន្ត្រីបញ្ជាក់ជាថ្មីថា រដ្ឋាភិបាលគ្មានគម្រោងរៃអង្គាសថវិកាពីប្រជាពលរដ្ឋទេ ខណៈពលរដ្ឋជាច្រើនចង់ឲ្យមានមូលនិធិព្រែកជីកហ្វូណន។ លោក ហ៊ុន ម៉ាណែត បញ្ជាក់ថា ការជីកព្រែកនេះ នឹងត្រូវធ្វើឡើងនៅឆ្នាំ២០២៤នេះ ឬយ៉ាងយូរនៅក្នុងឆ្នាំ២០២៥។
ប្រមុខរដ្ឋាភិបាល នៅបានបកស្រាយទៅនឹងការលើកឡើងដែលថា ព្រែកជីកធ្វើឲ្យទឹកសាបហូរចាក់អស់ ទៅសមុទ្រ។ បើតាមលោក ហ៊ុន ម៉ាណែត បច្ចុប្បន្នទឹកហូរតាមធម្មជាតិពីទន្លេមេគង្គ និងទន្លេបាសាក់ទៅកាន់សមុទ្រមានចំណុះ ១៨ ០០០ម៉ែត្រគូបក្នុង១វិនាទី។ ផ្ទុយទៅវិញទឹកហូរពីទន្លេមេគង្គ និងទន្លេបាសាក់ទៅសមុទ្រមានតែ ៣,៦ម៉ែត្រគូបក្នុង១វិនាទី ទៅកាន់សមុទ្រតាមព្រែកជីក។ នេះបើតាមការប្រៀបធៀបរបស់លោក ហ៊ុន ម៉ាណែត។
សូមបញ្ជាក់ថាគម្រោងព្រែកជីកហ្វូណនប្រវែង១៨០គីឡូម៉ែត្រ ពីភ្នំពេញទៅកាន់ខេត្តកែប ហើយដែលនឹងត្រូវចំណាយថវិកាជិត ២ពាន់លានដុល្លារ បានបង្កឲ្យមានភាពចម្រូងចម្រាសជាច្រើន ក្នុងនោះរវាងខ្មែរនិងខ្មែរគ្នាឯង និងរវាងខ្មែរ និងវៀតណាម។ ទោះយ៉ាងណា លោក ហ៊ុន ម៉ាណែត នៅថ្ងៃនេះដែរ បានអំពាវនាវដល់ពលរដ្ឋខ្មែរឲ្យគិតពីប្រយោជន៍ជាតិជាធំ ហើយទុកនិន្នាការនយោបាយដោយឡែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ