តួកគីបញ្ជនទ័ពចូលទឹកដីស៊ីរីដើម្បីជម្លៀសឆ្មាំយាមផ្នូរបុរាណអូតូម៉ង់
នៅយប់ថ្ងៃសៅរ៍ឈានចូលថ្ងៃអាទិត្យ តួកគីបានបើកប្រតិបត្តិការយោធាទ្រង់ទ្រាយធំមួយ នៅក្នុងទឹកដីស៊ីរី ដើម្បីជម្លៀសផ្នូរបុរាណនៃអតីតចក្រភពអូតូម៉ង់ ដែលស្ថិតនៅក្នុងតំបន់ក្រោមការគ្រប់គ្រងរបស់ក្រុមជីហាតរដ្ឋអ៊ីស្លាម។ នៅក្នុងប្រតិបត្តិការនេះកងទ័ពតួកគីបានជម្លៀសចេញពីផ្នូរបុរាណនូវសាកសពឥស្សរជនអូតូម៉ង់ រួមជាមួយនឹងទាហានតួកគី ៤០នាក់ ដែលនៅយាមផ្នូរបុរាណនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ទាហានតួកគីជិត ៦០០នាក់ អមដោយរថក្រោះ និងរថពាសដែកប្រមាណជា ១០០គ្រឿង បានឆ្លងដែនចូលទៅក្នុងទឹកដីស៊ីរី នៅម៉ោង ៩យប់ថ្ងៃសៅរ៍ (ម៉ោងក្នុងស្រុក) ហើយបញ្ចប់ប្រតិបត្តិការនៅព្រឹកថ្ងៃអាទិត្យ។ នេះបើតាមការអះអាងរបស់លោក Ahmet Davutoglu នាយករដ្ឋមន្រ្តីតួកគី ដែលបានបញ្ជាក់ថា នៅក្នុងប្រតិបត្តិការនេះកងទ័ពតួកគីមិនបានប៉ះប្រយុទ្ធនឹងកងកម្លាំងណាមួយនោះទេ។
នៅក្នុងសន្និសីទសារព័ត៌មានអមជាមួយនឹងរដ្ឋមន្រ្តីការពារជាតិ នៅព្រឹកថ្ងៃអាទិត្យនេះ លោកនាយករដ្ឋមន្រ្តីតួកគីបានឲ្យដឹងថា តួកគីសម្រេចបើកប្រតិបត្តិការជម្លៀសផ្នូរបុរាណនេះ គឺដោយសារតែតួកគីមានការព្រួយបារម្ភអំពីបញ្ហាសន្តិសុខ ដែលកំពុងចោទឡើងកាន់តែខ្លាំង នៅក្នុងតំបន់ជុំវិញផ្នូរបុរាណ។
គួរបញ្ជាក់ថា ផ្នូរបុរាណដែលកងទ័ពតួកគីចូលទៅជម្លៀសចេញពីស៊ីរីនេះ គឺជាផ្នូរ Souleiman Shah ដែលត្រូវជាជីតារបស់អធិរាជដំបូងបង្អស់នៃចក្រភពអូតូម៉ង់។ ផ្នូរបុរាណនេះស្ថិតនៅប៉ែកខាងជើងប្រទេសស៊ីរី ក៏ប៉ុន្តែ បរិវេណនៃផ្នូរបុរាណនេះត្រូវបានគេកំណត់ នៅក្នុងសន្ធិសញ្ញាឆ្នាំ១៩២១ថាជាទឹកដីដែលស្ថិតក្រោមអធិបតេយ្យភាពរបស់តួកគី។
កាលពីខែមីនាឆ្នាំ២០១៤កន្លងទៅ ក្រុមជីហាតរដ្ឋអ៊ីស្លាមធ្លាប់បានព្រមានថានឹងបើកការវាយប្រហារលើផ្នូរបុរាណរបស់អូតូម៉ង់នេះ ប្រសិនបើតួកគីមិនដកទាហានយាមផ្នូរចេញក្នុងរយៈពេល៣ថ្ងៃ។ ក៏ប៉ុន្តែ ទីចុងបំផុតទៅការវាយប្រហាររបស់ក្រុមជីហាតមិនបានកើតឡើងដូចការព្រមាននេះទេ បើទោះបីជាតួកគីបដិសេធមិនដកទ័ពក៏ដោយ។ ប្រមុខដឹកនាំតួកគីធ្លាប់បានព្រមានថា ការវាយប្រហារទៅលើទីតាំងផ្នូរបុរាណនេះនឹងត្រូវចាត់ទុកថាជាការវាយប្រហារដោយផ្ទាល់ទៅលើទឹកដីតួកគី ពោលគឺជាការវាយប្រហារទៅលើប្រទេសជាសមាជិកអង្គការអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ