អូតង់ពង្រាយគ្រាប់មីស្ស៊ីល Patriot ក្នុងប្រទេសតួកគីដើម្បីទប់នឹងការគំរាមកំហែងពីប្រទេសស៊ីរី
នៅថ្ងៃសុក្រ ទី៤ មករាម្សិលមិញ អូតង់បានដាក់ពង្រាយគ្រាប់មីស្ស៊ីល Patriot ក្នុងប្រទេសតួកគី។ គោលដៅ គឺដើម្បីការពារទឹកដីតួកគីប្រឆំាងនឹងការវាយប្រហារជាយថាហេតុពីប្រទេសស៊ីរី។ ការដាក់ពង្រាយគ្រាប់មីស្ស៊ីល Patriot ពេលនេះបានធ្វើឡើង បន្ទាប់ពីទីក្រុងអង់ការ៉ាបានធ្វើសំណើទៅអង្គការអូតង់កាលពីថ្ងៃទី ២១ វិច្ឆិកា ឆ្នំា ២០១២។ យ៉ាងណាក៏ដោយគេត្រូវរង់ចំារហូតដល់ដើមខែកុម្ភៈទើបអាចដាក់ឲ្យដំណើរនូវគ្រាប់មីស្ស៊ីល Patriot នេះ។
ចុះផ្សាយនៅថ្ងៃ៖
ស្តាប់ - ០១:៥៧
ជាសរុប មានទីតំាងដាក់តម្កល់គ្រាប់មីស្ស៊ីល Patriot ចំនួន ៦កន្លែងត្រូវបានគេដាក់ពង្រាយនៅប៉ែកខាងត្បូងប្រទេសតួកគី។ ២ កន្លែងជារបស់ប្រទេសហូឡង់ ២កន្លែងជារបស់ប្រទេសអាល្លឺម៉ង់ និង២កន្លែងទៀតជារបស់សហរដ្ឋអាមេរិក។ ប្រទេសទំាង៣ខាងលើនេះនឹងត្រូវចាប់ផ្តើមបោះទីតំាងកន្លែងដាក់គ្រាប់មីស្ស៊ីល Patriot មុនគេ។ ទាហានអាមេរិកំាងចំនួន ២៧នាក់បានទៅដល់មូលដ្ឋានទ័ពអាកាស Incirlik ក្បែរ Adana ជាមួយនឹងគ្រឿងបរិក្ខារមួយចំនួនសម្រាប់បោះទីតំាងលើកដំបូង។ គ្រឿងបរិក្ខារខ្លះត្រូវតម្លើងនៅមូលដ្ឋានទ័ពអាកាស Incirlik ដោយមានការជួយការពារពីសំណាក់ទាហានអូតង់។ ចំណែកគ្រឿងបរិក្ខារមួយចំនួនទៀតនឹងត្រូវយកទៅតម្លើងនៅក្បែរព្រំដែនជាមួយប្រទេសស៊ីរី។
ចំណែកគ្រឿងបរិក្ខារសំខាន់ៗមួយចំនួនទៀតដូចយ៉ាងគ្រាប់មីស្ស៊ីល Patriot នឹងត្រូវទៅដល់ប្រទេសតួកគីតាមកប៉ាល់នៅចុងខែមករានេះ។ យ៉ាងណាក៏ដោយ គេត្រូវរង់ចំាយ៉ាងតិចរហូតដល់ពាក់កណ្តាលខែកុម្ភៈខាងមុខ ទើបគេអាចដាក់ឲ្យដំណើរនូវគ្រាប់មីស្ស៊ីល Patriot នេះបាន ពោលគឺក្រោយពេលរដ្ឋសភាតួកគីបោះឆ្នោតអនុញ្ញាតឲ្យមានវត្តមានទាហានបរទេសលើទឹកដីរបស់ខ្លួន។
ម្យ៉ាងទៀត ដើម្បីអាចនឹងតម្លើងប្រព័ន្ធគ្រាប់មីស្ស៊ីល Patriot ឲ្យចប់សព្វគ្រប់បាន ប្រទេសអ្នកផ្តល់គ្រាប់មីស្ស៊ីល Patriot ទំាង ៣ប្រទេសត្រូវបញ្ជូនទាហានចំនួន ៤០០នាក់ក្នុងមួយប្រទេស។ សំណួរដែលចោទនោះគឺថា តើជាមួយនឹងការដាក់ពង្រាយគ្រាប់មីស្ស៊ីល Patriot នៅពេលនេះ អាចនឹងធ្វើឲ្យប្រទេសតួកគីទទួលបានការកក់ក្តៅ លែងបារម្ភពីការវាយប្រហារជាយថាហេតុពីប្រទេសស៊ីរីដែរ ឬទេ ?
សូមជម្រាបជូនថា អ្វីដែលជាក្តីបារម្ភធំបំផុតនោះ គឺប្រសិទ្ធិភាពរបស់ គ្រាប់មីស្ស៊ីល Patriot ព្រោះថាកន្លងមក បទពិសោធន៍នៅក្នុងអតីតកាល ពិសេសសង្រ្គាមនៅឈូងសមុទ្រពែក្សបានបង្ហាញយ៉ាងច្បាស់អំពីចំណុចខ្សោយរបស់គ្រាប់មីស្ស៊ីល Patriot ប្រឈមនឹងគ្រាប់មីស្ស៊ីល Scud។ មួយវិញទៀត បច្ចុប្បន្ននេះ ប្រទេសស៊ីរីមានបំពាក់ទៅដោយគ្រាប់មីស្ស៊ីលរុស្ស៊ីប្រភេទ SAM-៣០០ ដែលមានឥទ្ធិពលខ្លំាងជាងគ្រាប់មីស្ស៊ីល Patriot ឆ្ងាយណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ