លោកអូបាម៉ាបានជូនដំណឹងពីការបញ្ជូនទាហានអាមេរិកបន្ថែមទៀតទៅស៊ីរី
នាពេលទស្សនៈកិច្ចនៅប្រទេសអាល្លឺម៉ង់ លោកប្រធានាធិបតីអាមេរិក អូបាម៉ានៅថ្ងៃចន្ទទី២៥មេសានេះ បានប្រកាសជូនដំណឹងពីការបញ្ជូនទាហានអាមេរិកបន្ថែមទៀតរហូតដល់ចំនួន២៥០នាក់ទៅកាន់ប្រទេសស៊ីរី ដើម្បីជួយដល់កងទ័ពដៃគូរបស់ខ្លួនដែលកំពុងធ្វើការប្រយុទ្ធប្រឆាំងទល់នឹងពួកអ៊ីស្លាមអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:១៦
ក្នុងគោលដៅដើម្បីពង្រឹងការគាំទ្ររបស់អាមេរិកដល់កងទ័ពជាដៃគូរបស់ខ្លួននៅក្នុងតំបន់ ជាអាទិ៍កងកម្លាំងសន្តិសុខអ៊ីរ៉ាក់ ក៏ព្រមទាំងកងកម្លាំងនៅក្នុងប្រទេសស៊ីរី ដែលកំពុងតស៊ូប្រយុទ្ធប្រឆាំងទល់នឹងពួកជីហាតនៃអង្គការរដ្ឋអ៊ីស្លាម លោកអូបាម៉ា នៅក្រុង Hanovre ភាគខាងជើងប្រទេសអាល្លឺម៉ង់ បានប្រកាសជូនដំណឹងនៅថ្ងៃចន្ទនេះថាលោកនឹងបញ្ជូនទាហានអាមេរិកបន្ថែមទៀតរហូតដល់២៥០នាក់ទៅកាន់ស៊ីរី។
កងទ័ពអាមេរិកនៅលើទឹកដីស៊ីរី មានបេសសកម្មណែនាំនិងជួយដល់ក្រុមឧទ្ទាមស៊ីរីនិងកងកម្លាំងនានាដែលកំពុងវាយប្រយុទ្ធប្រឆាំងទល់នឹងពួកជីហាតអង្គការរដ្ឋអ៊ីស្លាម។ អង្គការរដ្ឋអ៊ីស្លាមដែលកំពុងកាន់កាប់ត្រួតត្រាលើទឹកដីអ៊ីរ៉ាក់និងស៊ីរីយ៉ាងធំធេង។
មួយវិញទៀត ប្រឈមនឹងការរលត់រលាយនៃបទឈប់បាញ់គ្នានៅស៊ីរីនាបច្ចុប្បន្ននេះ លោកប្រធានាធិបតីអាមេរិក បានអំពាវនាវកាលពីម្សិលមិញ សុំឲ្យមានការរៀបចំឡើងវិញ បទឈប់បាញ់គ្នា ដោយលោកបានអះអាងដែរថា លោកបានពិភាក្សាលើបញ្ហានេះ រួចហើយដែរជាមួយលោកប្រធានាធិបតីរុស្ស៊ីPoutine កាលពីដើមសប្តាហ៍មុន។
នៅក្រុង Hanovre ក្នុងថ្ងៃនេះដែរ លោកអូបាម៉ានិងថ្នាក់ដឹកនាំអឺរ៉ុបសំខាន់ៗដូចជាលោកស្រីប្រមុខរដ្ឋាភិបាលអាល្លឺម៉ង់ Angela Merkel និងប្រមុខរដ្ឋាភិបាលអង់គ្លេសនិងអ៊ីតាលី លោក David Cameron និងលោក Matteo RenZi ក៏ព្រមទាំងប្រធានាធិបតីបារាំងលោក Francois Holland ធ្វើការរួមប្រជុំគ្នានៅក្នុងជំនួបតូចមួយដែលឧទ្ទិសជាពិសេស លើការប្រយុទ្ធប្រឆាំងទល់នឹងអង្គការរដ្ឋអ៊ីស្លាម។
នៅក្នុងបញ្ហាសង្គ្រាមនៅប្រទេសស៊ីរីនេះ បណ្តាប្រទេសអ៊ឺរ៉ុបជាច្រើនដែលជាសម្ព័ន្ធមិត្តរបស់អាមេរិក បានដាក់គំនាបកាន់តែខ្លាំងលើរូបលោកអូបាម៉ានិងបានធ្វើការបន្ទោសថា “លោកអូបាម៉ា មិនបានជួយជ្រោមជ្រែងឲ្យបានពេញដៃពេញជើងឡើយ នៅក្នុងការទប់ស្តាត់ការបង្ហូរឈាមនៅក្នុងប្រទេសស៊ីរី។
ប្រទេសស៊ីរី ដែលបានផុងក្នុងសង្គ្រាមស៊ីវីលដ៏រាំរៃមួយចាប់តាំងពីឆ្នាំ២០១១មក និងដែលបានធ្វើឲ្យប្រជាជនខ្លួនស្លាប់អស់ជាង២៧ម៉ឺននាក់ក៏ព្រមទាំងជនបន្លាស់ទីយ៉ាងតិចចំនួនពាក់កណ្តាលនៃប្រជាជននៅក្នុងប្រទេសផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ