វិបត្តិស៊ីរីជាវិញ្ញាសាថ្មីមួយទៀតសម្រាប់នយោបាយការទូតអាមេរិកនៅដើមបូព៌ា!
លោកប្រមុខការទូតអាមេរិកចន ឃ៊ែរីកំពុងបំពេញទស្សនកិច្ចនៅក្នុងប្រទេសអារ៉ាប៊ីសាអូឌីត។ លោកឃ៊ែរីបានថ្លែងឲ្យដឹងនៅថ្ងៃសៅរ៍ ទី១២ មីនានេះថា លោកចង់ឃើញកិច្ចចរចាសន្តិភាពស្តីពីប្រទេសស៊ីរីដែលគ្រោងរៀបចំនៅថ្ងៃចន្ទ ទី១៤ មីនាសប្តាហ៍ក្រោយប្រព្រឹត្តទៅដូចបានគ្រោងទុក។ ទន្ទឹមគ្នានេះ លោកប្រមុខការទូតអាមេរិកក៏បានបញ្ជាក់ពីកិច្ចប្រជុំក្រុមការងាររបស់អាមេរិក និងរុស្ស៊ីដើម្បីជជែកពីបទឈប់បាញ់នៅស៊ីរីដែលបានចូលជាធរមានតាំងពីថ្ងៃទី២៧ កុម្ភៈ។ បន្ទាប់ពីប្រទេសអារ៉ាប៊ីសាអូឌីត លោកឃ៊ែរីនឹងបន្តដំណើរទៅកាន់ប្រទេសបារាំងដើម្បីនិយាយពីបញ្ហាស៊ីរីជាមួយសមភាគីអឺរ៉ុបទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣២
បទឈប់បាញ់នៅស៊ីរីដែលបានចូលជាធរមានកាលពីថ្ងៃទី២៧ កុម្ភៈ គឺជាលទ្ធផលបានមកពីការងាររួមគ្នារវាងអាមេរិក និងរុស្ស៊ី។ នៅក្នុងជំនួបជាមួយស្តេចអារ៉ាប៊ីសាអូឌីតសាលម៉ាន លោកប្រមុខការទូតអាមេរិកចន ឃ៊ែរីបានទទួលស្គាល់ថា បទឈប់បាញ់ត្រូវបានគោរពជាទូទៅដោយបានចូលរួមកាត់បន្ថយអំពើហិង្សារវាងក្រុមប្រឆាំង និងរដ្ឋាភិបាលពី ៨០ ទៅ ៩០% និងបន្ថែមថា លោកចង់កាត់បន្ថយឲ្យបានច្រើនជាងនេះ។ តែទន្ទឹមគ្នានេះ និងជាលើកទីមួយ លោកឃ៊ែរីក៏បានចង្អុលចំមុខរដ្ឋាភិបាលស៊ីរីថាបានឆ្លៀតរំលោភបំពានលើបទឈប់បាញ់។
ភ្ជាប់នឹងការចង្អុលមុខរបបស៊ីរីរបស់លោកអាសាដ លោកឃ៊ែរីក៏បានព្រមានត្រង់ៗថា របបអាសាដមិនអាចឆ្លៀតប្រើយន្តការបទឈប់បាញ់នេះដើម្បីកេងចំណេញស្ថានការណ៍បានឡើយ និងថា ភាពអត់ធ្មត់របស់សហគមន៍អន្តរជាតិមានកម្រិត។ ការរំលោភបទឈប់បាញ់ពីសំណាក់កម្លាំងរដ្ឋាភិបាលស៊ីរីនេះត្រូវបានលោកប្រមុខការទូតអាមេរិកបានប្រកាសឲ្យដឹងថា កិច្ចប្រជុំការងារមួយរវាងភាគីអាមេរិក និងរុស្ស៊ីត្រូវរៀបចំនៅថ្ងៃសៅរ៍នេះក្នុងទីក្រុងហ្ស៊ឺណែវ ប្រទេសស្វ៊ីស និងទីក្រុងអាម៉ាន់ ប្រទេសហ្សកដានី។ ស្របពេលគ្នានេះ លោកឃ៊ែរីក៏បានស្នើឲ្យមានកិច្ចសន្ទនាតាមទូរស័ព្ទរវាងលោកជាមួយនឹងសមភាគីរុស្ស៊ីលោកស៊ែរហ្កី ឡាវឺរ៉ូសដែរ។
ហេតុអ្វីបានជាយុទ្ធនាការរបស់លោកចន ឃ៊ែរីផ្តោតសំខាន់លើស៊ីរីពេលនេះ?
បេសកកម្មដ៏មមាញឹករបស់លោកឃ៊ែរីពេលនេះបានធ្វើឡើង ២ថ្ងៃមុនការបើកកិច្ចចរចាស្វែងរកសន្តិភាពឲ្យស៊ីរីដែលគ្រោងធ្វើរយៈពេល ១០ថ្ងៃ ដោយចាប់ផ្តើមពីថ្ងៃទី១៤ ដល់ថ្ងៃទី២៤ មីនាខាងមុខក្នុងទីក្រុងហ្សឺណែវ ប្រទេសស្វ៊ីស។ ការប្រឹងប្រែងនៅនាទីចុងក្រោយរបស់លោកឃ៊ែរី គឺមកពីលោកចង់ឲ្យកិច្ចចរចានៅសប្តាហ៍ក្រោយប្រព្រឹត្តដូចបានគ្រោងទុក ពោលមិនចង់ឲ្យមានភាពរអាក់រអួលដូចកើតមាននាពេលកន្លងមក។ ចូរកុំភ្លេចថា គឺបទឈប់បាញ់កាលពីថ្ងៃទី២៧ កុម្ភៈដែលបានជំរុញឲ្យភាគីជម្លោះផ្ទៃក្នុងស៊ីរីយល់ព្រមចូលអង្គុយតុចរចា។
សម្រាប់លោកឃ៊ែរីគឺច្បាស់ណាស់ បរាជ័យក្នុងការបើកកិច្ចចរចាស្វែងរកសន្តិភាពឲ្យស៊ីរីនៅសប្តាហ៍ក្រោយមានន័យស្មើនឹងបរាជ័យរបស់នយោបាយការទូតអាមេរិក និងរុស្ស៊ី។ រហូតមកដល់ថ្ងៃនេះ ភាគីជម្លោះផ្ទៃក្នុងស៊ីរីបានប្រកាសយល់ព្រមចូលរួមនៅក្នុងកិច្ចចរចា តែគេក៏ហ៊ានទទួលស្គាល់ថា អាចនឹងមានភាគីណាមួយបដិសេធមិនចូលរួមនៅនាទីចុងក្រោយដូចដែលធ្លាប់មានកន្លងមក ពិសេសគឺភាគីខាងក្រុមប្រឆាំង។
កិច្ចចរចាស្វែងរកសន្តិភាពឲ្យស៊ីរីដែលគ្រោងបើកធ្វើនៅសប្តាហ៍ក្រោយបានធ្វើឡើង ចំខួបគម្រប់ ៥ឆ្នាំនៃការងើបបះបោររបស់ប្រជាជនស៊ីរីប្រឆាំងនឹងរដ្ឋាភិបាលលោកអាសាដ។ ការងើបបះបោរដែលបានប្រែក្លាយទៅជាសង្រ្គាមស៊ីវិលដោយបានបណ្តាលឲ្យមានមនុស្សស្លាប់ ២៥ម៉ឺននាក់ និងមានជនភៀសខ្លួនជាច្រើនលាននាក់នៅអឺរ៉ុប និងមជ្ឈិមបូព៌ាក្នុងរយៈពេល ៥ឆ្នាំកន្លងទៅ។
បុគ្គលអាសាដនៅបន្តជាប្រធានរឿងស្មុគស្មាញពិបាកដោះស្រាយ
មានប្រធានបទសំខាន់ចំនួន ៣ ដែលកិច្ចចរចាគ្រោងនឹងលើកយកទៅជជែកនៅសប្តាហ៍ក្រោយ ទី១ ការបង្កើតរដ្ឋាភិបាលអន្តរកាលមួយដែលមានការចូលរួមពីគ្រប់ភាគីជម្លោះ ទី២ ការរៀបចំតាក់តែងរដ្ឋធម្មនុញ្ញថ្មី និងទី៣ ការរៀបចំបោះឆ្នោតប្រធានាធិបតី និងសភា។ នៅក្នុងការរៀបចំបោះឆ្នោតប្រធានាធិបតី និងសភានេះត្រូវបានលោកស្តាហ្វាន មីស្ទូរ៉ា ប្រេសិតពិសេសរបស់អង្គការសហប្រជាជាតិទទួលបន្ទុកវិបត្តិស៊ីរីបញ្ជាក់នៅថ្ងៃសុក្រ ទី១១ មីនាថា គ្រោងធ្វើនៅ ១៨ខែទៀតដោយរាប់ចាប់ពីថ្ងៃទី១៤ មីនាសប្តាហ៍ក្រោយដែលជាថ្ងៃបើកកិច្ចចរចា ហើយការរៀបចំបោះឆ្នោតនឹងត្រូវរៀបចំឡើងដោយអង្គការសហប្រជាជាតិ។
ក៏ប៉ុន្តែ និងបើទោះបីជាភាគីជម្លោះយល់ព្រមលើកយកប្រធានបទសំខាន់ទាំង ៣ ទៅជជែកក៏ដោយ ក៏ប្រធានរឿងទាក់ទងនឹងបុគ្គលអាសាដនៅបន្តជាឧបសគ្គដែលមិនងាយនឹងដោះស្រាយរួច។ ក្រុមប្រឆាំងដែលបានយល់ព្រមទៅចូលរួមកិច្ចចរចានាសប្តាហ៍ក្រោយនៅតែអះអាងថា អនាគតស៊ីរីមិនមានកន្លែងសម្រាប់លោកអាសាដទេ។ តែយ៉ាងណាក៏ដោយនៅចំពោះមុខពេលនេះ ភាគីក្រុមប្រឆាំង និងភាគីបស្ចិមលោកហាក់ដូចមិនចង់លើកយកបុគ្គលអាសាដធ្វើជាឧបសគ្គចម្បងដូចដែលពួកគេធ្លាប់បានទាមទារកន្លងមកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ